ସତ୍ୟଶିଖା,(ନୂଆଦିଲ୍ଲୀ) ୨୨.୦୩ .୨୦୨୧ :ସନ୍ତାନ ପ୍ରାପ୍ତି ପାଇଁ ନରବଳି। ଅନ୍ଧବିଶ୍ଵାସର ବିଶ୍ଵାସର ବଶବର୍ତ୍ତୀ ହୋଇ ଜଣେ ମହିଳା ପଡିଶା ଘରର ଛୋଟ ପୁଅକୁ ବଳି ଦେଇଛି। ଦେଶର ରାଜଧାନୀ ଦିଲ୍ଲୀର ରୋହିଣୀ ରିଠାଲା ଅଞ୍ଚଳରେ ଏହି ଘଟଣା ଘଟିଛି।
ଖବର ଅନ୍ୟଯାୟୀ ରୋହିଣୀସ୍ଥିତ ରିଠାଲା ଅଞ୍ଚଳରେ ଶନିବାର ସକାଳେ ଜଣଙ୍କର କୁନି ପୁଅ ହଠାତ ଗାଏବ ହୋଇଯାଇଥିଲା। ପରିବାର ଲୋକେ ଖୋଜାଖୋଜି କରିଥିଲେ ହେଁ ପାଇନଥିଲେ। ଶିଶୁ ନିଖୋଜ ନେଇ ଥାନାରେ ଅଭିଯୋଗ କରାଯିବାରୁ ପୋଲିସ ଛାନଭିନ ଆରମ୍ଭ କରିଥିଲା। ଏହି ସମୟରେ ଜଣେ ବ୍ୟକ୍ତିଙ୍କ ଘର ପଛପତୁ ଏକ ଅଖା ପଡ଼ିଥିବା ଦେଖିବାକୁ ମିଳିଥିଲା। ଅଖାଟି ଖୋଲିବା ପରେ ସେଥିରେ ଥିଲା କୁନି ପୁଅର ମୃତଦେହ। ପୋଲିସ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇ ଆପାର୍ଟମେଣ୍ଟରେ ରହୁଥିବା ଲୋକଙ୍କୁ ପଚରା ଉଚରା କରିଥିଲା।
ସେହି ଆପାର୍ଟମେଣ୍ଟରେ ଭଡ଼ାରେ ରହୁଥିବା ଜଣେ ମହିଳାଙ୍କ ଉପରେ ପୋଲିସର ସନ୍ଦେହ ହେବାରୁ ଥାନାକୁ ନେଇ ପୋଲିସ ପଚରା ଉଚରା କରିବାରୁ ସେ ସତ ସ୍ଵୀକାର କରିଥିଲେ। ମହିଳା କହିଥିଲେ ବିବାହର ଅନେକ ବର୍ଷ ପରେ ତାଙ୍କର ପିଲା ନାହିଁ। ସେ ନିଃସନ୍ତାନ ଥିବାରୁ ସନ୍ତାନ ପ୍ରାପ୍ତି ପାଇଁ ଜଣେ ତାନ୍ତ୍ରିକ ପାଖରୁ ତନ୍ତ୍ର ବିଦ୍ୟା ଶିଖିଥିଲେ। ତାନ୍ତ୍ରିକର ପରାମର୍ଶ ଅନୁଯାୟୀ ପିଲାଟିକୁ ବଳି ଦେଇଛନ୍ତି। ପ୍ରକୃତ ଘଟଣା ଜଣାପଡ଼ିବା ପରେ ପୋଲିସ ମହିଳାକୁ ଗିରଫ କରିଥିବା ବେଳେ ତାନ୍ତ୍ରିକକୁ ଧରିବା ପାଇଁ ପୋଲିସ ଟିମ୍ ଗଠନ କରାଯାଇଥିବା ଜଣାପଡ଼ିଛି।
