ସତ୍ୟଶିଖା (ଲମତାପୁଟ) ୦୫.୧୦.୨୦୨୦ : କୋରାପୁଟ ଜିଲ୍ଲା ଜଲାପୁଟ ଅଞ୍ଚଳରୁ ଅଧ କୋଟି ଟଙ୍କାର ଗଞ୍ଜେଇ ଜବତ ହୋଇଛି । ଏହାସହ ୨ ଅଟକ ଅଛନ୍ତି । ବିହାର ଚାଲାଣ ବେଳେ ଲମତାପୁଟ ପୋଲିସ ଏକ ଟ୍ରକରୁ ଗଞ୍ଜେଇ ଜବତ କରିଛି । ଗଞ୍ଜେଇ ଚାଲାଣ ନେଇ ଖବର ମିଳିବା ପରେ କୋରାପୁଟ ଏସପିଙ୍କ ନିର୍ଦ୍ଦେଶରେ ନନ୍ଦପୁର ଏସଡିପିଓ ଏବଂ ଲମତାପୁଟ ଫାଣ୍ଡି ଅଧିକାରୀ ଚାଙ୍ଗୁଡ଼ିପଡ଼ା ଛକରୁ ଗଞ୍ଜେଇ ଜବତ କରିଛନ୍ତି । ତେବେ ସବୁଠାରୁ ଆଶ୍ଚର୍ଯ୍ୟକର ଘଟଣା ହେଉଛି, ପୋଲିସ ଟ୍ରକକୁ ପ୍ରାୟ ଏକ ଘଣ୍ଟା ଧରି ଯାଞ୍ଚ କରିବା ପରେ ଯାଇ ଗଞ୍ଜେଇର ସୁରାଗ ମିଳିଥିଲା । ଟ୍ରକରେ ସ୍ଵତନ୍ତ୍ର ଚ୍ୟାମ୍ବର କରାଯାଇ ଗଞ୍ଜେଇ ଚାଲାଣ ହେଉଥିଲା । ଅଟକ ଦୁଇ ଯୁବକ ବିହାରର ବୋଲି ଜଣାପଡ଼ିଛି । ସେମାନେ ଝାଡ଼ଖଣ୍ଡରୁ ଟମାଟୋ ନେଇ ଜୟପୁର ଆସିଥିଲେ । ଜୟପୁରରେ ଟମାଟୋ ଖାଲି କରିବା ପରେ ଜଲାପୁଟରୁ ଗଞ୍ଜେଇ ନେଇ ବିହାର ଯାଉଥିଲେ । ଉଭୟ ଅଭିଯୁକ୍ତ ପୂର୍ବରୁ ବହୁ ବାର ଗଞ୍ଜେଇ ଚାଲାଣ କରିଥିବା ପୋଲିସ ନିକଟରେ ସ୍ୱୀକାର କରିଛନ୍ତି ।
