ସତ୍ୟଶିଖା (ଭୁବନେଶ୍ୱର )୦୪.୧୧.୨୦୨୩ : ଆଜି ଅନୁଷ୍ଠିତ ହେବ ଶ୍ରୀମନ୍ଦିର ପରିଚାଳନା କମିଟି ବୈଠକ । ବୈଠକରେ ଶ୍ରୀମନ୍ଦିର ଯାତ୍ରୀ ପରିକ୍ରମା ପ୍ରକଳ୍ପର ପ୍ରତିଷ୍ଠା ପୂଜା ଓ ଲୋକାର୍ପଣ ଉପରେ ବିଶେଷ ଆଲୋଚନା ହେବାସହ ଗତକାଲି ନୀତି ସବକମିଟି ବୈଠକରେ ହୋଇଥିବା ଚୂଡାନ୍ତ ସମୟ ଓ ଦିନ ଉପରେ ମୋହର ମରାଯିବ । ଅନ୍ୟପଟେ ଆଜି ପରିଚାଳନା କମିଟି ବୈଠକରେ ରତ୍ନଭଣ୍ଡାର ପ୍ରସଙ୍ଗ ଉଠିବ କି ନାହିଁ ସେନେଇ କୋଟି କୋଟି ଜଗନ୍ନାଥ ପ୍ରେମୀଙ୍କ ନଜର ରହିଥିବା ବେଳେ ବୈଠକର ଏଜେଣ୍ଡାରେ କିନ୍ତୁ ରତ୍ନଭଣ୍ଡାର ପ୍ରସଙ୍ଗ ସ୍ଥାନ ପାଇଛି ।
ଗତ ଅଗଷ୍ଟ ୪ ତାରିଖରେ ଅନୁଷ୍ଠିତ ହୋଇଥିବା ପରିଚାଳନା କମିଟିର ନିଷ୍ପତ୍ତିକୁ ଆଜି ବୈଠକରେ ବିବରଣୀ ପଠନ ସହ ଦୃଢୀକରଣ କରାଯିବ । ଅର୍ଥାତ ଗତ ଅଗଷ୍ଟ ମାସରେ ଅନୁଷ୍ଠିତ ପରିଚାଳନା କମିଟି ବୈଠକରେ ରତ୍ନଭଣ୍ଡାର ପ୍ରସଙ୍ଗରେ ରାଜ୍ୟ ସରକାରଙ୍କୁ ହାଇଲେବଲ୍ ଟିମ୍ ଗଠନ ପାଇଁ ଚିଠି ଲେଖାଯିବ ବୋଲି ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ପ୍ରତିକ୍ରିୟା ରଖିଥିଲେ ।
ତେବେ ରତ୍ନଭଣ୍ଡାର ଖୋଲି ରତ୍ନ ଅଳଙ୍କାର ଗଣତି ପ୍ରସଙ୍ଗରେ ପରିଚାଳନା କମିଟି ରାଜ୍ୟ ସରକାରଙ୍କୁ ଚିଠି ଲେଖିବାର ଦୁଇମାସ ମଧ୍ୟରେ ସରକାର ଉଚ୍ଚସ୍ତରୀୟ ଟିମ୍ ଗଠନ କରିବେ ବୋଲି ହାଇକୋର୍ଟ ନିର୍ଦ୍ଦେଶ ଦେଇଥିବା ବେଳେ ଆଜିର ବୈଠକରେ ଏ ସଂକ୍ରାନ୍ତରେ ଆଲୋଚନା ହେଉଛି କି ନାହିଁ ତାହା ଉପରେ ସମସ୍ତଙ୍କ ନଜର ରହିଛି । ଏହାଛଡା ବୈଠକରେ ମହାପ୍ରଭୁଙ୍କ ଜମି ବିକ୍ରି ସମ୍ପର୍କରେ ଆଲୋଚନା ହେବାସହ ଆଦର୍ଶ ଗୁରୁକୂଳ ଅଗ୍ରଗତି ସମ୍ପର୍କରେ ମଧ୍ୟ ଆଲୋଚନା ହେବ । ଏହାଛଡା ସେବକ ବାସଗୃହ, ବାଉଳୀମଠ ଉନ୍ନତିକରଣ ସମ୍ପର୍କରେ ମଧ୍ୟ ଆଲୋଚନା ହେବ ।
