ଯାଜପୁର ଗୋଡ଼ଉନ ରେ ନିଆଁ ଲାଗିଗଲା

ସତ୍ୟଶିଖା (ଯାଜପୁର) ୧୩/୧୦/୨୦୨୦ : ଗୋଦାମରେ ଭୟାବହ ଅଗ୍ନିକାଣ୍ଡ । ଯାଜପୁର ଜିଲ୍ଲା ପୌରାଞ୍ଚଳ ହାବେଳୀ ବଜାର ନିକଟରେ ଥିବା ୨ ଗୋଦାମରେ ଭୟାବହ ଅଗ୍ନିକାଣ୍ଡ ଘଟିଛି । ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର ସମ୍ପତ୍ତି ପୋଡ଼ି ପାଉଁଶ ହୋଇଛି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିବା ସୂଚନା ରହିଛି । ମିଳିଥିବା ସୂଚନା ଅନୁଯାୟୀ, ଆଜି ଭୋର୍ ସମୟରେ ଗୋବିନ୍ଦ ତ୍ରିପାଠୀଙ୍କ ଅଫିସ ଷ୍ଟେସନାରି ୨ଟି ଗୋଦାମ ଘରେ ନିଆଁ ଲାଗିଯାଇଥିଲା । ଯାହାଫଳରେ କି ସେଠାରେ ଗଚ୍ଛିତ ଥିବା ଲକ୍ଷାଧିକ ଟଙ୍କାର ଅଫିସ ଷ୍ଟେସନାରି ଏବଂ କାଗଜ ଜଳିପୋଡ଼ି ପାଉଁଶ ହୋଇଯାଇଛି।ଘଟଣାସଂପର୍କରେ ଖବର ପାଇ ଯାଜପୁର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିବା ଜଣାଯାଇଛି। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଅଗ୍ନିକାଣ୍ଡର ପ୍ରକୃତ ତଥ୍ୟ ସାମ୍ନାକୁ ଆସିନାହିଁ । ଗୋବିନ୍ଦ ତ୍ରିପାଠୀ ଗୋଦାମର ଘରେ ସକାଳେ ପୂଜା କରିବା ପରେ କବାଟରେ ଜଳନ୍ତା ଧୂପକାଠିକୁ ରଖି ଆସିଥିଲେ । ଧୂପକାଠିର ନିଆଁରେ ଏଭଳି ଅଘଟଣ ଘଟିଥିବା ଆଶଙ୍କା କରାଯାଉଛି ।