ସତ୍ୟଶିଖା (ମୁମ୍ବାଇ) ୦୭/୧୧/୨୦୨୦ : ବଲିଉଡ ଅଭିନେତା -ମଡେଲ୍ ମିଲିନ୍ଦ ସୋମନ ନିକଟରେ ଗୋଆ ବିଚ୍ରେ ନଗ୍ନ ହୋଇ ଦୌଡ଼ୁଥିବାର ନଜର ଆସିଥିଲେ । ସେ ଏହି ଫଟୋ ସୋସିଆଲ୍ ମିଡିଆ ଆକାଉଣ୍ଟରୁ ସେୟାର ମଧ୍ୟ କରିଥିଲେ । ଏବେ ଏହି ମାମଲାକୁ ନେଇ ତାଙ୍କ ବିରୋଧରେ ମାମଲା ରୁଜୁ ହୋଇଛି । ଏହି ଫଟୋ ତାଙ୍କ ପତ୍ନୀ କ୍ଲିକ୍ କରିଥିଲେ ଏବଂ ଏହାର କ୍ୟାପସନରେ ମିଲିନ୍ଦ ଲେଖିଥିଲେ-୫୫ ଆଣ୍ଡ ରନିଂ ।
ସାଉଥ ଗୋଆର ଏସପି ପଙ୍କଜ ସିଂହ କହିଛନ୍ତି ଯେ କୋଲଭା ପୋଲିସ୍ ଷ୍ଟେସନରେ ଆଇପିସିର ଧାରା ୨୯୪ ଏବଂ ଆଇଟି ଆକ୍ଟର ଧାରା ୬୭ ଅନୁସାରେ ମିଲିନ୍ଦ ସୋମନଙ୍କ ବିରୋଧରେ କେସ୍ ରେଜିଷ୍ଟାର କରାଯାଇଛି । ଧାରା ୨୯୪ ଅଶ୍ଳୀଳ ଅଭିନୟ ଏବଂ ଗୀତ ପାଇଁ ଏବଂ ଆଇଟି ଆକ୍ଟର ଧାରା ୬୭ ଅଶ୍ଳୀଳ ସାମଗ୍ରୀକୁ ଇଲେକ୍ଟୋନିକ୍ ଫର୍ମରେ ପବ୍ଲିଶ୍ ଏବଂ ସେୟାର କରିବା ବିରୋଧରେ ରହିଛି ।
ଏସପିଙ୍କ କହିବା ଅନୁସାରେ ଏହି ଅଭିଯୋଗ ଗୋଆ ସୁରକ୍ଷା ମଞ୍ଚ ଦ୍ବାରା ଦିଆଯାଇଥିବା ଅଭିଯୋଗ ପରେ ରୁଜୁ କରାଯାଇଛି । ନିକଟରେ ମଡେଲ୍-ଅଭିନେତ୍ରୀ ପୁନମ୍ ପାଣ୍ଡେଙ୍କ ବିରୋଧରେ ମଧ୍ୟ ଗୋଆରେ ନ୍ୟୁଡ ସୁଟ୍ କରିବା ବିରୋଧରେ ମାମଲା ରୁଜୁ କରାଯାଇଥିଲା ।
