ମାଓ ସଙ୍ଗଠନ ପାଇଁ ଏକ ବଡ଼ ଝଟକା, ଆତ୍ମସମର୍ପଣ କଲେ କନା ମାଡ଼ି ଓ ଲାକେ ପୁନେମ l

ସତ୍ୟଶିଖା ( ମାଲକାନଗିରି ) ସ୍ମୃତି ରଞ୍ଜନ ନାୟକ : ମାଲକାନଗିରି ପୋଲିସର ଆଉ ଏକ ସଫଳତା l ଆଜି ୨ ଜଣ ହାର୍ଡକୋର ମାଓବାଦୀ ମାଲକାନଗିରି ପୋଲିସଙ୍କ ପାଖରେ ନିଜକୁ ସମର୍ପିତ କରିଛନ୍ତି । ଏମାନଙ୍କ ମଧ୍ୟରେ ଜଣେ ପୁରୁଷ ଥିବାବେଳେ ଅନ୍ୟ ଜଣକ ମହିଳା ମାଓବାଦୀ ଅଟନ୍ତି । ପୁରୁଷ ମାଓବାଦୀଙ୍କ ନାମ କାନା ମାଡ଼ି ଓ ମହିଳା ମାଓବାଦୀ ଲାକେ ପୁନେମ ଦୀର୍ଘଦିନ ଧରି ଉଭୟେ ମାଓ ସଙ୍ଗଠନରେ ସକ୍ରିୟ ରହିଥିଲେ । ତେବେ ଏମାନେ ନିଜର ମନ ପରିବର୍ତନ କରି ସମସ୍ତଙ୍କ ଭଳି ଦେଶର ମୁଖ୍ୟ ସ୍ରୋତରେ ସାମିଲ ହେବାକୁ ନିଷ୍ପତ୍ତି ନେଇଛନ୍ତି । ଆଉ ଏହା ମାଓ ସଙ୍ଗଠନକୁ ଏକ ବଡ଼ ଝଟକା ବୋଲି କୁହାଯାଇପାରେ ।

ସୂଚନା ମୁତାବକ, କାନା ମାଡ଼ି ମାଓ ସଙ୍ଗଠନରେ ଏସିଏମ ଭାବେ କାର୍ଯ୍ୟ କରୁଥିଲା । ତା ନାଁରେ ୪ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା । ସେହିପରି ଲାକେ ପୁନେମ୍ ମାଓ ସଂଗଠନର ସଦସ୍ୟା ଥିଲେ । ତାଙ୍କ ନାମରେ ମଧ୍ୟ ୨ ଲକ୍ଷ ଟଙ୍କାର ପୁରସ୍କାର ରାଶି ଥିଲା । ଏମାନେ ଉଭୟ ବିଚ୍ଛିନ୍ନ ଅଞ୍ଚଳ ମାଓ ସଙ୍ଗଠନରେ କାର୍ଯ୍ୟରତ ଥିଲେ ।

ମାଲକାନଗିରିର ବିଚ୍ଛିନ୍ନ ଅଞ୍ଚଳ, ସ୍ୱାଭିମାନ ଅଞ୍ଚଳ ରୂପେ ପରିଣତ ହେବା ସହ ଏହାର ବିକାଶ ଧାରା ସେମାନଙ୍କୁ ଦେଇଛି ଏକ ନୂତନ ଦିଗଦର୍ଶନ l ଏହା ସହ ପୋଲିସର ଉତ୍ତମ ପଦକ୍ଷେପ ଇତ୍ୟାଦି ସେମାନଙ୍କୁ ମାଓ ସଙ୍ଗଠନ ଛାଡ଼ିବାକୁ ପ୍ରେରଣା ଦେଇଛି ବୋଲି କହିଛନ୍ତି ଉଭୟ ମାଓବାଦୀ l

ଜିଲ୍ଲା ପୋଲିସର ଈନଭେସ୍ଟିଗସନ ଓ ସେ ଦୁହିଁ ଙ୍କ ଷ୍ଟେଟମେଣ୍ଟ ଅନୁଯାଇ ସିଲାକୋଟା ଏନକାଉଣ୍ଟର ଏବଂ ଜଣେ ବିଧାୟକଙ୍କ ହତ୍ୟାକାଣ୍ଡ ଇତ୍ୟାଦି ବଡ଼ ବଡ଼ ମାଓ କାର୍ଯ୍ୟକଳାପରେ ଏମାନେ ସାମିଲ ଥିଲେ । ପୋଲିସ ଏମାନଙ୍କ ନାଁରେ ପୁରସ୍କାର ରାଶି ମଧ୍ୟ ଘୋଷଣା କରିଥିଲା ।

ତେବେ ଉଭୟ କାନା ମାଡ଼ି ଓ ଲାକେ ପୁନେମ ସମର୍ପଣ କରିବା ପରେ ମାଓ ସଙ୍ଗଠନର ପୋଲ୍ ଖୋଲିଛନ୍ତି ଏହି ଦୁଇ ମାଓବାଦୀ l ମାଓ ସଙ୍ଗଠନରେ ତେଲଗୁ କ୍ୟାଡରଙ୍କ ବିଶେଷ ପ୍ରଭାବ ରହିଥିବା ଏମାନେ ଅଭିଯୋଗ ଆଣିଛନ୍ତି । ମାଓ ସଙ୍ଗଠନରେ କାର୍ଯ୍ୟ କରୁଥିବା ବେଳେ କିଭଳି ତେଲୁଗୁ କ୍ୟାଡ଼ରମାନେ ଅନ୍ୟ ମାଓବାଦୀଙ୍କୁ ଶୋଷଣ କରୁଥିବା କଥା ମଧ୍ୟ ବୟାନ କରିଛନ୍ତି l

ତେବେ ଏମାନେ ଆତ୍ମସମର୍ପଣ କରିବା ପରେ ଅନ୍ୟ ମାଓବାଦୀଙ୍କୁ ମଧ୍ୟ ମୁଖ୍ୟସ୍ରୋତରେ ସାମିଲ ହେବା ପାଇଁ ଅନୁରୋଧ କରିଛନ୍ତି ମାଲକାନଗିରି ଏସପି ।