ସତ୍ୟଶିଖା ୧୯/୦୭/୨୦୨୫:ଆମେରିକାରେ ଫଲ୍ ସେମିଷ୍ଟାର ଆରମ୍ଭ ହେବାକୁ ଆଉ ରହିଲା ମାତ୍ର ଦୁଇ ସପ୍ତାହରୁ କମ୍ ସମୟ । ଏଭଳି ସ୍ଥିତିରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଭିଜା କଟକଣା ଭାରତୀୟ ଛାତ୍ରଛାତ୍ରୀଙ୍କ ଆମେରିକା ସ୍ୱପ୍ନଙ୍କୁ ଭାଙ୍ଗି ମାଟିରେ ମିଶାଇଛି । ବିଦେଶୀ ଛାତ୍ରଛାତ୍ରୀଙ୍କ ପାଇଁ ଭିଜା ଇଣ୍ଟର୍ଭ୍ୟୁ ସ୍ଲଟ୍ ଖୋଲୁନି । ଏହାସହିତ ଭିଜା ରିଜେକ୍ସନ ହାରରେ ବି ଦେଖାଦେଇଛି ବଡ଼ ବୃଦ୍ଧି । ଏଭଳି ସ୍ଥିତିରେ ଚଳିତବର୍ଷ ବର୍ଷ ଆମେରିକୀୟ ବିଶ୍ୱବିଦ୍ୟାଳୟଗୁଡ଼ିକରେ ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟା ୭୦% ଖସିପାରେ ବୋଲି ଏକ ରିପୋର୍ଟରେ ଅନୁମାନ କରାଯାଇଛି । ସାଧାରଣତଃ ବର୍ତ୍ତମାନ ସୁଦ୍ଧା ଅଧିକାଂଶ ଛାତ୍ରଛାତ୍ରୀ ସେମାନଙ୍କ ଭିଜା ଇଣ୍ଟର୍ଭ୍ୟୁ ଦେଇସାରିଥାନ୍ତି ଏବଂ ଆମେରିକା ଉଡ଼ିବା ପାଇଁ ପ୍ରସ୍ତୁତ ହେଉଥାନ୍ତି । ଚଳିତବର୍ଷ ପରିସ୍ଥିତି ଭିନ୍ନ ।
ହାଇଦ୍ରାବାଦ ଓଭର୍ସିଜ୍ କନ୍ସଲ୍ଟାଣ୍ଟରୁ ସଞ୍ଜୀବ ରାଏ କୁହନ୍ତି, ସ୍ଲଟ୍କୁ ଆମେ ଅନାଇ ରହିଛୁ । ପ୍ରତିଦିନ ପୋର୍ଟାଲ୍କୁ ରିଫ୍ରେସ୍ କରି ନିରାଶ ହେବାକୁ ପଡୁଛି । ସ୍ଲଟ୍ ଖୋଲୁନାହିଁ । ବିଗତ ବର୍ଷଗୁଡ଼ିକ ମଧ୍ୟରେ ଏହା ସବୁଠାରୁ ଖରାପ ବର୍ଷ । ଛାତ୍ରଛାତ୍ରୀମାନେ ଦୋଛକିରେ । ଯଦିଓ ଆମେରିକା କର୍ତ୍ତୃପକ୍ଷ ପୂର୍ବରୁ ଆଶ୍ୱସ୍ତ କରିଥିଲେ ଯେ, ପର୍ଯ୍ୟାୟ କ୍ରମେ ଅଧିକ ଭିଜା ସ୍ଲଟ୍ ଜାରି ହେବ କିନ୍ତୁ ଏଥିରେ କିଛି ସ୍ପଷ୍ଟତା ରହୁନାହିଁ । ଏହା ଛାତ୍ରଛାତ୍ରୀଙ୍କୁ ହରଡ଼ ଘଣାରେ ପକାଇଛି । ସେମାନେ ଏକ ପ୍ରକାର ଦିଗହରା ହୋଇଗଲେଣି । ୱିଣ୍ଡୋ ଓଭର୍ସିଜ୍ ଏଜୁକେଶନ୍ କନ୍ସଲ୍ଟାନ୍ସିରୁ ଅଙ୍କିତ ଜୈନ କୁହନ୍ତି, ଯଦିଓ ସପ୍ତାହ ମଧ୍ୟଭାଗରେ କିଛିଟା ସ୍ଲଟ୍ ଖୋଲିଥିଲା, ଯେଉଁମାନେ ବୁକ୍ କରିବାକୁ ସକ୍ଷମ ହୋଇପାରିଥିଲେ ସେମାନଙ୍କୁ ଏଯାଏ କୌଣସି କନ୍ଫର୍ମେଶନ୍ ମିଳିନାହିଁ । ବୁକିଂ କନ୍ଫର୍ମ ନ କରି ହାତଗଣତି ସ୍ଲଟ୍ ଖୋଲିବାର କୌଣସି ଯଥାର୍ଥତା ନାହିଁ । ଏହାସହିତ ଅନେକ ଆବେଦନ ପ୍ରତ୍ୟାହାର ହୋଇଚାଲିଛି । ବର୍ତ୍ତମାନ ସ୍ଥିତିରେ ଛାତ୍ରଛାତ୍ରୀମାନେ ଅନ୍ୟାନ୍ୟ ବିକଳ୍ପ ଦେଖୁଛନ୍ତି ।
ହାଇଦ୍ରାବାଦର ଜଣେ ୨୩ ବର୍ଷୀୟ ଛାତ୍ରୀ କୁହନ୍ତି, ଆଉ ଅପେକ୍ଷା କରିବାକୁ ଧୈର୍ଯ୍ୟ ନାହିଁ । ଅପେକ୍ଷା କଲେ ଗୋଟିଏ ବର୍ଷ ନଷ୍ଟ ହୋଇଯିବ । ଏଣୁ ଆବେଦନକୁ ପ୍ରତ୍ୟାହାର କରିବାକୁ ନିଷ୍ପତ୍ତି ନେଲି । ବର୍ତ୍ତମାନ ଏହି ଛାତ୍ରୀଜଣକ ଅଟୋମୋଟିଭ୍ ଇଞ୍ଜିନିୟରିଂରେ ସ୍ନାତକ କରିବା ନିମନ୍ତେ ଜର୍ମାନୀରେ ସୁଯୋଗ ଦେଖୁଥିବା ପ୍ରକାଶ କରିଛନ୍ତି । ଯଦି ଶୀଘ୍ର ଭିଜା ଇଣ୍ଟର୍ଭ୍ୟୁ ସ୍ଲଟ୍ ନ ଖୋଲେ ତେବେ ଆମେରିକାରେ ପଢ଼ିବା ପାଇଁ ହଜାର ହଜାର ଛାତ୍ରଛାତ୍ରୀଙ୍କ ସ୍ୱପ୍ନ ଚୁରମାର ହୋଇଯିବ । ୧୨୦ ଫିଭର କନ୍ସଲ୍ଟାନ୍ସିର ଅରବିନ୍ଦ ମାଣ୍ଡୁଭା କୁହନ୍ତି, ଏ ବର୍ଷ ଆମେରିକା ବିଶ୍ୱବିଦ୍ୟାଳୟରେ ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟା ୮୦% ଖସିଯାଇପାରେ । ପ୍ରତିଦିନ ବ୍ୟସ୍ତବିବ୍ରତ ଛାତ୍ରଛାତ୍ରୀ ଏବଂ ଅଭିଭାବକଙ୍କ ଫୋନ୍ କଲ୍ ଆସୁଥିବା ମାଣ୍ଡୁଭା କହିଛନ୍ତି । ମାର୍ଚ୍ଚ ପ୍ରଥମାର୍ଦ୍ଧରେ ଭିଜା ଆବେଦନ କରିଥିବା ଛାତ୍ରଛାତ୍ରୀମାନଙ୍କ ଆପ୍ଲିକେଶନ୍ ବଡ଼ ଆକାରରେ ଖାରଜ ହେଉଛି । ସେମାନଙ୍କ ସୋସିଆଲ ମିଡିଆ ସ୍ୱଚ୍ଛ ରହିଥିବା ସତ୍ତେ୍ୱ ସେମାନଙ୍କୁ ରିଜେକ୍ସନର ସାମ୍ନା କରିବାକୁ ପଡୁଛି ।
ଏହାର କାରଣ ହେଉଛି ସମସ୍ତେ ୨୧୪ବି ଭିଜା ଚାହୁଁଛନ୍ତି । ଆମେରିକାକୁ ଅନ୍ତର୍ଜାତୀୟ ଛାତ୍ରଛାତ୍ରୀ ପଠାଉଥିବା ପ୍ରମୁଖ ରାଷ୍ଟ୍ର ହେଉଛି ଭାରତ । ଗତବର୍ଷ ଭାରତରୁ ୩.୩ ଲକ୍ଷ ଛାତ୍ରଛାତ୍ରୀ ଆମେରିକା ଯାଇଥିଲେ । ଏ କ୍ଷେତ୍ରରେ ପ୍ରଥମ ଥର ପାଇଁ ଚୀନ୍କୁ ପଛରେ ପକାଇଥିଲା ଭାରତ । ଟେକ୍ସାସସ୍ଥିତ ଡଲାସ୍ର ଏକ ଇମମିଗ୍ରେସନ୍ କନ୍ସଲ୍ଟିଂ ସଂସ୍ଥାର ରବି ଲୋଥୁମାଲା କୁହନ୍ତି, ଆମେରିକା ଯିବା ପାଇଁ ମାସ ମାସ ଧରି ପ୍ରସ୍ତୁତ ହେଉଥିବା ଅଧିକାଂଶ ଛାତ୍ରଛାତ୍ରୀଙ୍କ ସ୍ୱପ୍ନ ଚୁରମାର ହୋଇଯାଇଛି । ଆମେରିକା କର୍ତ୍ତୃପକ୍ଷ ଯାହା କରୁଛନ୍ତି ତାହା କିଛି ନୂଆ ନୁହେଁ
