ସତ୍ୟଶିଖା( ପୁରୀ)୨୮.୧୧.୨୦୨୨: ଶ୍ରୀମନ୍ଦିର ନାଟମଣ୍ଡପ ବିମ୍ରେ ସୃଷ୍ଟି ହୋଇଥିବା ଫାଟ ଅପରିବର୍ତ୍ତିତ ରହିଛି। ୨୦୧୮ ମସିହାରେ ବିମ୍ରେ କ୍ରାକ୍ ମିଟର ଲଗାଇ ଯାଞ୍ଚ କରାଯାଇଥିବା ବେଳେ ୪ ବର୍ଷ ତଳର ସ୍ଥିତି ଏବଂ ଏବେକାର ସ୍ଥିତିରେ କୌଣସି ପରିବର୍ତ୍ତନ ହୋଇନାହିଁ। ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ସଂସ୍ଥା(ଏଏସ୍ଆଇ)ର ବିଶେଷଜ୍ଞ ଦଳ ରବିବାର ଦିନ ଶ୍ରୀମନ୍ଦିରର ନାଟମଣ୍ଡପ ସ୍ଥିତି ଯାଞ୍ଚ ପରେ ଏହା କହିଛନ୍ତି। ତେବେ କ୍ରାକ୍ ମିଟର୍ ରିଡିଂକୁ ପରଖିବା ପରେ ଖୁବ୍ଶୀଘ୍ର ଏହାର ମରାମତି ପାଇଁ ପଦକ୍ଷେପ ନିଆଯିବ ଏବଂ ଆସନ୍ତା ମାର୍ଚ୍ଚ କିମ୍ବା ଏପ୍ରିଲ୍ ସୁଦ୍ଧା କାମ ଶେଷହେବ ବୋଲି କହିଛନ୍ତି।
ରବିବାର ପୂର୍ବାହ୍ନରେ ଆଇଆଇଟି ମାଡ୍ରାସର ବିଶେଷଜ୍ଞ ପ୍ରଫେସର ଅରୁଣ ମେନନ, ଏଏସ୍ଆଇ ଅତିରିକ୍ତ ଡିଜି ଜାହ୍ନବୀ ଶର୍ମା, ଏଏସ୍ଆଇ ଭୁବନେଶ୍ବର ମଣ୍ଡଳ ଅଧୀକ୍ଷକ ଅରୁଣ ମଲ୍ଲିକ, ଆମିକସ୍ କ୍ୟୁରି ଏନ୍କେ ମହାନ୍ତି ଓ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ ଜେନା ଶ୍ରୀମନ୍ଦିରକୁ ଯାଇ ନାଟମଣ୍ଡପ ଓ ଜଗମୋହନର ସ୍ଥିତି ଯାଞ୍ଚ୍ କରିଥିଲେ । ବିଶେଷଜ୍ଞ ଦଳର ଆଗମନକୁ ଦୃଷ୍ଟିରେ ରଖି ପୂର୍ବରୁ ନାଟମଣ୍ଡପରେ ଭାରା ବନ୍ଧା ଯାଇଥିଲା। ଜଗମୋହନର ସଂଯୋଗ ସ୍ଥଳ ଉପରକୁ ଯାଇ ବିଶେଷଜ୍ଞମାନେ ପରୀକ୍ଷାନୀରିକ୍ଷା କରିଥିଲେ। ଚୂନ ତଳେ ସ୍ଥିତି କ’ଣ ରହିଛି, ତାହା ବି କ୍ରାକ୍ ମିଟର୍ ରିଡିଂ ଆଧାରରେ ନୀରିକ୍ଷଣ କରିଥିଲେ। ଆଗକୁ ମରାମତି ସମୟରେ ମଧ୍ୟ କ୍ରାକ୍ ମିଟର୍ ଜରିଆରେ ସ୍ଥିତି ଅନୁଧ୍ୟାନ କରାଯିବ। ସେହିଭଳି, ଯାଞ୍ଚ୍ ପରେ ଦୁଇପ୍ରକାରର ମରାମତି ନେଇ ଆଲୋଚନା ହୋଇଥିଲା। ନାଟମଣ୍ଡପ ଓ ଜଗମୋହନ ସଂଯୋଗ ସ୍ଥଳ ଫାଟରେ କ’ଣ ସପୋର୍ଟ ଦିଆଯିବ, ସେନେଇ ବି ଆଲୋଚନା ହୋଇଥିଲା।
ତେବେ, ଏ ସମ୍ପର୍କରେ ସମ୍ପୂର୍ଣ୍ଣ ବିବରଣୀ ଦିଆଯାଇନାହିଁ। ଖୁବ୍ଶୀଘ୍ର ବିଶେଷଜ୍ଞ ଦଳର ପ୍ରସ୍ତାବ ସମ୍ପର୍କରେ ଉଚ୍ଚସ୍ତରୀୟ ବୈଠକରେ ଆଲୋଚନା କରାଯିବ ବୋଲି ଜଣାପଡ଼ିଛି।
ଆମିକସ୍ କ୍ୟୁରି ଏନ୍କେ ମହାନ୍ତି କହିଛନ୍ତି, ନାଟମଣ୍ଡପ ବିମ୍ରେ ଫାଟକୁ ନେଇ ବିଶେଷ କିଛି ସମସ୍ୟା ନାହିଁ। ମାତ୍ର ଏହାର ମରାମତି କାମ କିଭଳି ସମ୍ପନ୍ନ ହେବ, ସେନେଇ ଆଲୋଚନା ହୋଇଛି। ଖୁବ୍ଶୀଘ୍ର ମିଳିତ ଭାବେ ଏ ସମ୍ପର୍କରେ ବୈଠକରେ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି। ଏଏସ୍ଆଇ ଅଧୀକ୍ଷକ(ଓଡ଼ିଶା) ଅରୁଣ ମଲ୍ଲିକ କହିଛନ୍ତି, ଶ୍ରୀମନ୍ଦିରରେ ୧୯ଟି ସ୍ଥାନରେ ମରାମତି କାମ ଜାରି ରହିଛି। ଆଜି ନାଟମଣ୍ଡପ ଓ ଜଗମୋହନ କାମ ନୀରିକ୍ଷଣ କରାଯାଇଛି। ୪ ବର୍ଷ ହେଲା କ୍ରାକ୍ ମିଟର୍ରେ ସ୍ଥିତି ଅନୁଧ୍ୟାନ କରାଯାଉଥିବା ବେଳେ ଏହାର ପ୍ରତିକାର ପାଇଁ ବ୍ୟବସ୍ଥା ହୋଇଛି। ଖୁବ୍ଶୀଘ୍ର ମରାମତି କାମ ଆରମ୍ଭ କରାଯିବ ବୋଲି ସେ କହିଛନ୍ତି। ମରାମତି ଦାୟିତ୍ବ ପାଇଥିବା ବିଶିଷ୍ଟ ସ୍ଥପତି ସୁଦର୍ଶନ ସାହୁ କହିଛନ୍ତି, ନାଟମଣ୍ଡପ ବିମ୍ ଗଳିବାର ଆଶଙ୍କା ନାହିଁ। ସେ ୪ ଦିନ ପରେ ଆସି ଆଉଥରେ ସ୍ଥିତି ପରଖିବେ। ଉଭୟ ଗୁଣ୍ଡିଚା ମନ୍ଦିର ଓ ଶ୍ରୀମନ୍ଦିରର କାମ ରହିଥିବାରୁ ଯଦି ଗୁଣ୍ଡିଚା ମନ୍ଦିରର କାମ ବିଳମ୍ବରେ ହେବ ତେବେ ନାଟମଣ୍ଡପର କାମ ଶୀଘ୍ର ଆରମ୍ଭ କରାଯିବ ବୋଲି ସେ କହିଛନ୍ତି।
ଏଠାରେ ଉଲ୍ଲେଖଯୋଗ୍ୟ ଯେ ୨୦୧୬ ମସିହାରୁ ହାଇକୋର୍ଟରେ ଏ ସଂକ୍ରାନ୍ତରେ ଜନସ୍ବାର୍ଥ ମାମଲା ବିଚାରାଧୀନ ରହିଛି। ଗତ ସେପ୍ଟେମ୍ବର ମାସରେ ଆମିକସ୍ କ୍ୟୁରି ଶ୍ରୀମନ୍ଦିର ଯାଇ ମରାମତି କାର୍ଯ୍ୟ ଅନୁଧ୍ୟାନ କରିବା ସହ ଏଏସ୍ଆଇ ଓ ଶ୍ରୀମନ୍ଦିର ପ୍ରଶାସନ ସହ ଆଲୋଚନା କରିଥିଲେ। ଅନ୍ୟପକ୍ଷରେ ୨୦୨୩ ମସିହା ଜାନୁଆରି ୫ ତାରିଖରେ ହାଇକୋର୍ଟରେ ଥିବା ମାମଲାର ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ ହୋଇଛି। ପରବର୍ତ୍ତୀ ଶୁଣାଣି ସମୟରେ ଏଏସ୍ଆଇ ଓ ଅନ୍ୟ ପ୍ରତିପକ୍ଷ ଶ୍ରୀମନ୍ଦିରର ସାନି ସ୍ଥିତି ସମ୍ପର୍କରେ ଅବଗତ କରିବାକୁ ହାଇକୋର୍ଟ କହିଛନ୍ତି। ବିମ୍ରେ ଥିବା ଫାଟର ଜରୁରି ସଂରକ୍ଷଣ ଓ ମରାମତି ଆବଶ୍ୟକ ଥିବା ଅମିକସ୍କ୍ୟୁରି ଏନ୍କେ ମହାନ୍ତି ରିପୋର୍ଟ ଦେଇସାରିଛନ୍ତି। ଅଥଚ ବାରମ୍ବାର ଯାଞ୍ଚ୍ କରାଯାଉଥିଲେ ହେଁ ମରାମତି କାମ ଆରମ୍ଭ ହୋଇପାରିନାହିଁ।
