ସତ୍ୟଶିଖା( ନୂଆଦିଲ୍ଲୀ )୨୬.୧୦.୨୦୨୨: ଦୀପାବଳିର ଦିନକ ପରେ ଦିଲ୍ଲୀର ବାୟୁ ପ୍ରଦୂଷଣ ସ୍ତର ବିପଜ୍ଜନକ ସ୍ତରରେ ପହଞ୍ଚିଛି । ମଙ୍ଗଳବାର ସକାଳ ୬ଟା ବେଳେ ଜାତୀୟ ରାଜଧାନୀର ଏୟାର୍ କ୍ୱାଲିଟି ଇଣ୍ଡେକ୍ସ (ଏଆଇକ୍ୟୁ) ୩୨୩ ଥିବାବେଳେ ସାଢ଼େ ୯ଟା ବେଳେ ୩୫୩ରେ ପହଞ୍ଚିଥିଲା । ବାୟୁରେ ପାର୍ଟିକୁଲେଟ୍ ମାଟର୍ (ପିଏମ୍ ୨.୫)ର ସ୍ତର ହାରାହାରି ୩୧୯ ମପାଯାଇଛି । ଦୀପାବଳିରେ ଫୁଟାଯାଇଥିବା ବାଣ ଏହାର କାରଣ ବୋଲି କୁହାଯାଉଛି । ପ୍ରତିବନ୍ଧକ ସତ୍ତ୍ୱେ ଏଠାରେ ସାରା ରାତି ବାଣଫୁଟାର ଶବ୍ଦ ସହ ଧୂଆଁ ଉଡ଼ୁଥିବା ଦେଖିବାକୁ ମିଳିଥିଲା । ସକାଳ ହେବା ବେଳକୁ ଦିଲ୍ଲୀର ପବନ ନିଃଶ୍ୱାସ ନେବା ଅବସ୍ଥାରେ ନଥିଲା ।
ଦିଲ୍ଲୀ ନିକଟବର୍ତ୍ତୀ ନୋଏଡା, ଗୁରୁଗ୍ରାମ ଏବଂ ଫରିଦାବାଦରେ ମଧ୍ୟ ବାୟୁ ପ୍ରଦୂଷଣ ସ୍ତର ବହୁ ଅଧିକ ହୋଇଛି । ସକାଳ ସାଢ଼େ ୯ଟା ବେଳେ ନୋଏଡାର ଏଆଇକ୍ୟୁ ୩୪୪, ଗୁରୁଗ୍ରାମର ୩୪୧ ଏବଂ ଫରିଦାବାଦର ଏଆଇକ୍ୟୁ ୩୪୭ ରେକର୍ଡ କରାଯାଇଥିଲା । ଦୀପାବଳି ପରେ ଦିଲ୍ଲୀରେ ବାୟୁର ମାନ ବିପଜ୍ଜନକ ସ୍ତରରେ ରହିଥିଲେ ମଧ୍ୟ ଚାରିବର୍ଷରେ ବାୟୁ ପ୍ରଦଷଣ ସ୍ତର ସବୁଠୁ କମ୍ ଥିଲା । ସେଣ୍ଟ୍ରାଲ୍ ପଲ୍ୟୁସନ୍ କଣ୍ଟ୍ରୋଲ୍ ବୋର୍ଡ (ସିପିସିବି) ଅନୁସାରେ ଚଳିତ ବର୍ଷ ୨୪ ଘଣ୍ଟାରେ ହାରାହାରି ଏଆଇକ୍ୟୁ ୩୧୨ ରହିଛି । ୨୦୨୧ରେ ଏହା ହାରାହାରି ୨୮୨ ଥିବାବେଳେ ୨୦୨୦ରେ ୪୧୪ ଏବଂ ୨୦୧୯ରେ ୩୩୭ ଥିଲା । ସୂଚନାଯୋଗ୍ୟ, କେଜରିୱାଲ୍ ସରକାର ଦିଲ୍ଲୀରେ ବାଣ ଫୁଟାଇବାକୁ ବ୍ୟାନ୍ ଘୋଷଣା କରିଥିଲେ । ଏହାର ଉଲ୍ଲଂଘନ କଲେ ୫୦୦୦ ହଜାର ଟଙ୍କା ଜୋରିମାନା ସହ ୬ ମାସ ଜେଲ୍ର ବ୍ୟବସ୍ଥା ରହିଛି ।
