ନୂଆଦିଲ୍ଲୀ: ସମଗ୍ର ବିଶ୍ୱ ଅଦୃଶ୍ୟ ଶତ୍ରୁ କରୋନା ଭାଇରସ ବିରୋଧରେ ଲଢ଼େଇ କରୁଥିବା ବେଳେ ପାକିସ୍ତାନରେ ସକ୍ରିୟ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ଭାରତରେ ଆକ୍ରମଣ କରିବାକୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛି। ଆସନ୍ତା ୧୧ ତାରିଖରେ ଜୈଶର ସଦସ୍ୟମାନେ ଜମ୍ମୁ-କଶ୍ମୀରରେ ଯୋଜନାବଦ୍ଧ ଭାବେ ଏକାଧିକ ଆତ୍ମଘାତୀ ହମଲା କରିବାକୁ ଯୋଜନା କରିଛନ୍ତି। ଏ ସମ୍ପର୍କରେ ଆଜି ଗୁଇନ୍ଦା ବିଭାଗ ସୂଚନା ଦେବା ପରେ ହାଇଆଲର୍ଟ ଜାରି କରାଯାଇଛି।
ଆତଙ୍କବାଦୀ ନିରୋଧ ଅପରେସନରେ ସାମିଲ ଥିବା ଜଣେ ବରିଷ୍ଠ ଅଧିକାରୀ କହିଛନ୍ତି, ଆତ୍ମଘାତୀ ହମଲା ସମ୍ପର୍କରେ ଆମେ ସୂଚନା ପାଇଛୁ। ଆତଙ୍କବାଦୀମାନେ ଆର୍ମି ଓ ଅର୍ଦ୍ଧସାମରିକ ବାହିନୀକୁ ଟାର୍ଗେଟ କରି ଆକ୍ରମଣ କରିବାକୁ ଯୋଜନା କରିଛନ୍ତି। ଏପ୍ରିଲ ମାସରେ ଜମ୍ମୁ-କଶ୍ମୀରରେ ୨୮ ଜଣ ଆତଙ୍କବାଦୀ ନିହତ ହୋଇଛନ୍ତି।
ଆହୁରି ପଢ଼ନ୍ତୁ
ଭାରତୀୟ ସୁରକ୍ଷାକର୍ମୀଙ୍କ କାଉଣ୍ଟର ଆଟାକ ଯୋଗୁ ଆତଙ୍କବାଦୀ ନିଜ ଯୋଜନାରେ ସଫଳ ହୋଇପାରୁନାହାନ୍ତି। ଏପରି କି ପାକିସ୍ତାନ ସରକାର ମଧ୍ୟ ୨୮ ଜଣ ଆତଙ୍କବାଦୀଙ୍କ ନିହତକୁ ନେଇ ରାଜନୀତି ଆରମ୍ଭ କରିଛି। ଆତଙ୍କବାଦୀଙ୍କୁ ପାକିସ୍ତାନ ବୈଦେଶିକ ମନ୍ତ୍ରଣାଳୟ ନୀରିହ ଲୋକ ବୋଲି ଦର୍ଶାଇଛି। ଏହାର ବଦଲା ନେବାକୁ ଆତଙ୍କବାଦୀମାନେ ଯୋଜନା କରିଛନ୍ତି।
ଏନେଇ କୁଖ୍ୟାତ ଆତଙ୍କବାଦୀ ମୁଫତି ଅବଦୁଲ ରଫ ଅସଗର ଆଜି ପାକିସ୍ତାନ ଗୁଇନ୍ଦା ସଂସ୍ଥା ଆଇଏସଆଇର ବରିଷ୍ଠ ଅଧିକାରୀମାନଙ୍କୁ ରାୱଲପିଣ୍ଡିରେ ଭେଟିଛି। ଏହାପରେ ସେ ମେ’ ୧୧ରେ ହେବାକୁ ଥିବା ହମଲା ସମ୍ପର୍କରେ ତା’ ହ୍ୟାଣ୍ଡଲରମାନଙ୍କ ସହ ଆଲୋଚନା କରିଛି।
ହମଲାକୁ ସଫଳ କରିବା ପାଇଁ ୨୫ରୁ ୩୦ ଜଣ ଆତଙ୍କବାଦୀ ଜମ୍ମୁ-କଶ୍ମୀରରେ ପ୍ରବେଶ କରିଛନ୍ତି। ସେହିପରି ଆଉ ୭୦ରୁ ୮୦ ଆତଙ୍କବାଦୀ ସୀମାରେ ଅନୁପ୍ରବେଶ ପାଇଁ ଅପେକ୍ଷା କରି ରହିଛନ୍ତି। ଲୀପା ଭ୍ୟାଲି ନିକଟରେ ସେମାନେ ସୁଯୋଗ ଅପେକ୍ଷାରେ ରହିଛନ୍ତି। ଏହା ଜଣାପଡ଼ିବା ପରେ ସମଗ୍ର ଜମ୍ମୁ-କଶ୍ମୀରରେ ହାଇଆଲର୍ଟ ଜାରି କରାଯାଇଛି।
