ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କୁ ଆଶ୍ୱସ୍ତି, ବିଧାନ ପରିଷଦ ନିର୍ବାଚନ କରିବାକୁ ରାଜ୍ୟପାଳଙ୍କ ପରାମର୍ଶ

ମୁମ୍ବାଇ: ବିନା ନିର୍ବାଚନରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇଥିବା ଉଦ୍ଧବ ଠାକରେଙ୍କୁ ବଡ଼ ଆଶ୍ୱସ୍ତି ମିଳିଛି। କରୋନା ମହାଲଢ଼େଇ ଭିତରେ ଖାଲି ପଡ଼ିଥିବା ୯ ବିଧାନ ପରିଷଦ ଆସନ ପାଇଁ ତାରିଖ ଯଥାଶୀଘ୍ର ଘୋଷଣା କରିବାକୁ ଆଜି ରାଜ୍ୟପାଳ ଭଗତ ସିଂହ କୋଶିୟାରୀ ନିର୍ବାଚନ କମିଶନଙ୍କୁ ଅନୁରୋଧ କରିଛନ୍ତି।

ମୁଖ୍ୟମନ୍ତ୍ରୀ ପଦ ବଜାୟୀ ରଖିବାକୁ ହେଲେ ଉଦ୍ଧବ ଠାକରେଙ୍କୁ ମେ’ ୨୮ ସୁଦ୍ଧା ବିଧାନସଭାକୁ ନିର୍ବାଚିତ ହେବାକୁ ପଡ଼ିବ। ଏଥିପାଇଁ ତାଙ୍କୁ ନିର୍ବାଚନ ହେବାକୁ ଥିବା ୯ ବିଧାନ ପରିଷଦ ମଧ୍ୟରୁ ଗୋଟିକରେ ଜିତିବାକୁ ପଡ଼ିବ। ଯଦି ସେ ବିଧାୟକ କିମ୍ବା ବିଧାନ ପରିଷଦ ସଦସ୍ୟ ଭାବେ ବିଧାନସଭାକୁ ନିର୍ବାଚିତ ହୋଇପାରିବେ ନାହିଁ, ତା’ହେଲେ ତାଙ୍କୁ ମୁଖ୍ୟମନ୍ତ୍ରୀ ପଦ ଛାଡ଼ିବାକୁ ପଡ଼ିବ।

ରାଜ୍ୟପାଳ ନିର୍ବାଚନ କମିଶନଙ୍କୁ ଲେଖିଥିବା ଚିଠିରେ କହିଛନ୍ତି ଯେ କରୋନା ମହାମାରୀ ଲକଡାଉନ ମଧ୍ୟରେ କେନ୍ଦ୍ର ସରକାର କିଛି କୋହଳ ନୀତି ଅବଲମ୍ବନ କରିବାକୁ ଗାଇଡଲାଇନ ଜାରି କରିଛନ୍ତି। ଏହାକୁ ଦୃଷ୍ଟିରେ ରଖି ନିର୍ବାଚନ କମିଶନ ମହାରାଷ୍ଟ୍ର ବିଧାନ ପରିଷଦ ନିର୍ବାଚନ ଅନୁଷ୍ଠିତ କରିବାକୁ ତାରିଖ ଘୋଷଣା କରନ୍ତୁ। ନିର୍ବାଚନ ହେବାକୁ ଥିଲେ ମଧ୍ୟ ସମସ୍ତ ଗାଇଡଲାଇନ ପାଳନ କରିବାକୁ ରାଜ୍ୟପାଳ ଚିଠିରେ ଉଲ୍ଲେଖ କରିଛନ୍ତି।

କରୋନା ମହାମାରୀ ଯୋଗୁ ନିର୍ବାଚନ କମିଶନ ମହାରାଷ୍ଟ୍ରରେ ଖାଲି ପଡ଼ିଥିବା ୯ଟି ଯାକ ବିଧାନ ପରିଷଦ ଆସନ ପାଇଁ ହେବାକୁ ଥିବା ନିର୍ବାଚନକୁ ସ୍ଥଗିତ ରଖିଥିଲେ। ଉଦ୍ଧବ ଠାକରେ ୨୦୧୯ ନଭେମ୍ବର ୨୮ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ନିୟମ ଅନୁଯାୟୀ, ୬ ମାସ ଅର୍ଥାତ ମେ’ ୨୮ ମଧ୍ୟରେ ତାଙ୍କୁ ବିଧାନସଭାକୁ ନିର୍ବାଚିତ ହେବାକୁ ପଡ଼ିବ।