ସତ୍ୟଶିଖା( ଭୁବନେଶ୍ୱର )୨୦.୦୭ . ୨୦୨୨: ୨୦୨୨-୨୩ ଶିକ୍ଷାବର୍ଷ ପାଇଁ ସରକାରୀ ଓ ସରକାରୀ ଅନୁଦାନପ୍ରାପ୍ତ ସ୍କୁଲ ସମେତ ଅନୁସୂଚିତ ଜାତି ଓ ଜନଜାତି ବିଭାଗ ଅଧୀନ ସ୍କୁଲଗୁଡ଼ିକରେ ଛାତ୍ରଛାତ୍ରୀଙ୍କୁ ମାଗଣା ପୋଷାକ ଓ ଜୋତା ବଣ୍ଟାଯିବ । ପ୍ରତି ପିଲା ପିଛା ୪୦୦ ଟଙ୍କା ମୂଲ୍ୟରେ ଦୁଇ ହଳ ପୋଷାକ, ୨୦୦ ଟଙ୍କା ମୂଲ୍ୟରେ ହଳେ ଜୋତା ଓ ଦୁଇ ହଳ ମୋଜା ଦିଆଯିବ । ସ୍ଥାନୀୟ ଅଞ୍ଚଳର ଶିକ୍ଷାବିତ୍, ବିଶିଷ୍ଟ ବ୍ୟକ୍ତି, ସମାଜସେବୀ, ସ୍ୱାଧୀନତା ସଂଗ୍ରାମୀଙ୍କ ଉପସ୍ଥିତିରେ ଅଗଷ୍ଟ ୫ ସୁଦ୍ଧା ପୋଷାକ/ଜୋତା ବଣ୍ଟନ ପ୍ରକ୍ରିୟା ଶେଷ କରିବାକୁ ଓସେପା ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଅନୁପମ ଶାହା ନିର୍ଦେଶ ଦେଇଛନ୍ତି । ଚଳିତବର୍ଷ ପୋଷାକର ରଙ୍ଗ ଓ ପରିପାଟୀରେ କୌଣସି ପରିବର୍ତ୍ତନ ହେବନାହିଁ । ସମସ୍ତ ଛାତ୍ରଙ୍କ ଲାଗି ନୀଳ ପ୍ୟାଣ୍ଟ ଓ ଧଳା ସାର୍ଟ, ପ୍ରଥମରୁ ୫ମ ଶ୍ରେଣୀ ଛାତ୍ରୀଙ୍କୁ ନୀଳ ଫ୍ରକ୍ ଓ ଷଷ୍ଠରୁ ୮ମ ଶ୍ରେଣୀର ଛାତ୍ରୀଙ୍କୁ ନୀଳ କମିଜ୍ ଓ ଧଳା ସାଲୱାର ଦିଆଯିବ । ଛାତ୍ରଛାତ୍ରୀଙ୍କୁ କଳା ରଙ୍ଗର ଜୋତା ଓ ଦୁଇ ହଳ ଧଳା ମୋଜା ବଣ୍ଟନ ହେବ ।
ଯେଉଁ ମାଧ୍ୟମିକ ବିଦ୍ୟାଳୟରେ ୮ମ କିମ୍ବା ତଳ ଶ୍ରେଣୀ ଥିବ, ସେଠାରେ ଏହି ପୋଷାକ କୋଡ୍ ଲାଗୁ ହେବନାହିଁ । ସେଠାକାର ପିଲାମାନେ ନିଜ ବିଦ୍ୟାଳୟ ଲାଗି ଉଦ୍ଦିଷ୍ଟ ନିର୍ଦ୍ଦିଷ୍ଟ ରଙ୍ଗର ପୋଷାକ ପିନ୍ଧିବେ । ପ୍ରତ୍ୟେକ ସାର୍ଟ, ପ୍ୟାଣ୍ଟ ଓ ଫ୍ରକ୍ର କଲରରେ ୨୦୨୨ ଲେଖାଯାଇଥିବା ସ୍ଥାୟୀ ଟ୍ୟାଗ୍ ଲାଗିବ ।ପୋଷାକ ଓ ଜୋତା ଲାଗି ୫ ହଜାର ଟଙ୍କା କିମ୍ବା ତା’ଠାରୁ କମ୍ ରାଶି ଜମା ହୋଇଥିବା ବିଦ୍ୟାଳୟ ଲାଗି ସ୍କୁଲ ପରିଚାଳନା କମିଟି (ଏସ୍ଏମ୍ସି)ର ସଦସ୍ୟମାନେ ନିକଟସ୍ଥ ବଜାରକୁ ଯାଇ ନିର୍ଦ୍ଧାରିତ ମୂଲ୍ୟରେ ଗୁଣବତ୍ତା ବିଶିଷ୍ଟ ସାମଗ୍ରୀ ବିକ୍ରି କରୁଥିବା ଦୋକାନୀ/ବିତରକଙ୍କୁ ଚିହ୍ନଟ କରିବେ । ଏସ୍ଏମ୍ସି ଅଧିବେଶନରେ ଦୋକାନୀ ତଥା ବିତରକଙ୍କ ନାମ ପ୍ରସ୍ତାବ ଦେବେ ଏବଂ ସଦସ୍ୟଙ୍କ ଅନୁମୋଦନକ୍ରମେ ସଠିକ୍ ମୂଲ୍ୟରେ ଉପଯୁକ୍ତ ସାମଗ୍ରୀ ବରାଦ ଦିଆଯିବ । ୫ ହଜାର ଟଙ୍କାରୁ ଅଧିକ ପୋଷାକ, ଜୋତା ଲାଗି ଏସ୍ଏମ୍ସି ଖୋଲା ବଜାରରୁ ପୋଷାକ, ଜୋତା କିଣିବା ସକାଶେ ୩ଟି ଭିନ୍ନ ଭିନ୍ନ ଦ୍ରବ୍ୟ ଓ ସେବାକର ପଞ୍ଜୀକୃତ ବିତରକଙ୍କଠାରୁ କୋଟେସନ୍ ସଂଗ୍ରହ କରିବେ । ଏସ୍ଏମ୍ସି ଅଧିବେଶନରେ ଉକ୍ତ କୋଟେସନ୍ ଯାଞ୍ଚ କରାଯିବ ।
ସବୁଠାରୁ କମ୍ ମୂଲ୍ୟର କୋଟେସନ୍କୁ ବୈଠକରେ ଅନୁମୋଦନ କରାଯିବ । ଏସ୍ଏମ୍ସି କମିଟି ଆକାଉଣ୍ଟକୁ ସାମଗ୍ରୀ ବାବଦ ଅର୍ଥ ଯୋଗାଇ ଦିଆଯିବ ଏବଂ ସେମାନେ ବିତରଣ ଦାୟିତ୍ୱ ବହନ କରିବେ । କିଣିବା ବା ତିଆରି କରି ବିତରଣରେ ଯେପରି ସାଧୁତା, ସ୍ୱଚ୍ଛତା ଓ ନିରପେକ୍ଷତା ଅବଲମ୍ବନ କରାଯିବ, ସେନେଇ ଡିଇଓ, ଡିପିସି, ବିଇଓ, ଏବିଇଓ, ସିଆରସିସି ନଜର ରଖିବେ । ପ୍ରଧାନଶିକ୍ଷକ ନିଜ ପାଖରେ ଗୋଟିଏ ହଳ ପୋଷାକ, ଜୋତା ନମୁନା ଭାବେ ରଖିବେ ।
ଏଥିପାଇଁ ଡିଇଓ ତଥା ଡିପିସି ତଥ୍ୟ ସଂଗ୍ରହ କରିବେ । ବିଦ୍ୟାଳୟର ପ୍ରଧାନଶିକ୍ଷକ ମାର୍ଗଦର୍ଶିକା ଅନୁସାରେ ସମସ୍ତ ପିଲା ଉତ୍ତମମାନର ପୋଷାକ ଏବଂ ଜୋତା ପାଇଛନ୍ତି ବୋଲି ଏକ ପ୍ରମାଣପତ୍ର ଦେବେ । ପ୍ରଧାନଶିକ୍ଷକଙ୍କ ପ୍ରମାଣପତ୍ରକୁ ଆଧାର କରି ପ୍ରତି ବ୍ଲକ ଶିକ୍ଷା ଅଧିକାରୀ ଏକ ସାର୍ଟିଫିକେଟ୍ ଜିଲ୍ଲା ପ୍ରକଳ୍ପ ସଂଯୋଜକ(ଡିପିସି)ଙ୍କୁ ପଠାଇବେ । ସେହି ଅନୁଯାୟୀ ଛାତ୍ରଛାତ୍ରୀ ଉତ୍ତମମାନର ପୋଷାକ ପାଇଛନ୍ତି ବୋଲି ଡିପିସି ଏକ ସାର୍ଟିଫିକେଟ୍ ଓସେପାକୁ ପଠାଇବେ । ଜଣେ ବି ପିଲା ଯେପରି ପୋଷାକ/ଜୋତା ପାଇବାରୁ ବଞ୍ଚିତ ନ ହୁଅନ୍ତି, ସେଥିପ୍ରତି ଦୃଷ୍ଟି ଦେବାକୁ କୁହାଯାଇଛି ।
