ନୂଆଦିଲ୍ଲୀ: ମହାମାରୀ କରୋନାର ଦ୍ରୁତ ପରୀକ୍ଷା ପାଇଁ ଚାଇନାଠୁ ଆଣିବାକୁ ଥିବା ବଳକା ରାପିଡ ଆଣ୍ଟିବଡି ଟେଷ୍ଟ କିଟ୍ର ଅର୍ଡରକୁ ଆଜି ଭାରତ ସରକାର ବାତିଲ କରିଦେଇଛନ୍ତି। ଚାଇନାଠାରୁ ଆସିଥିବା କିଟ୍ ଗୁଡ଼ିକ ତ୍ରୁଟିପୂର୍ଣ୍ଣ ବୋଲି ଜଣାପଡ଼ିବା ପରେ ଏଭଳି ନିଷ୍ପତ୍ତି ନିଆଯାଇଛି।
ଏହାର ଅର୍ଥ ଏଣିକି ଚାଇନାଠାରୁ ଆଉ କୌଣସି ମେଡିକାଲ କିଟ ଅଣାଯିବ ନାହିଁ ବୋଲି ସ୍ୱାସ୍ଥ୍ୟମନ୍ତ୍ରଣାଳୟ ପକ୍ଷରୁ ଘୋଷଣା କରାଯାଇଛି। ତେବେ ଅର୍ଡର ବାତିଲ କରାଯାଇଥିବାରୁ ଭାରତକୁ ଆର୍ଥିକ ସ୍ତରରେ କ୍ଷତି ସହିବାକୁ ପଡ଼ିବ ବୋଲି ଚର୍ଚ୍ଚା ଆରମ୍ଭ ହୋଇଥିଲା। ତେବେ ଭାରତ ସରକାର କହିଛନ୍ତି ଯେ ଅର୍ଡର ବାତିଲ କରାଯାଇଥିଲେ ମଧ୍ୟ ଗୋଟିଏ ହେଲେ ଟଙ୍କା କ୍ଷତି ହେବନାହିଁ।
ଆହୁରି ପଢ଼ନ୍ତୁ
ରାପିଡ କିଟ୍ଗୁଡ଼ିକ ତ୍ରୁଟିପୂର୍ଣ୍ଣ ଥିବା ଜଣାପଡ଼ିବା ପରେ ଆଇସିଏମଆର ପକ୍ଷରୁ ଏହାର ଯାଞ୍ଚ କରାଯାଇଥିଲା। ଏହାପରେ ରାଜ୍ୟଗୁଡ଼ିକ ତ୍ରୁଟିପୂର୍ଣ୍ଣ କିଟ୍ ସମ୍ପର୍କରେ ଯେଉଁ ଅଭିଯୋଗ କରିଛନ୍ତି, ସେଥିରେ ସତ୍ୟତା ଥିବା ସ୍ପଷ୍ଟ ହୋଇଥିଲା। ଏଥିପାଇଁ ଆଇସିଏମଆର ରାଜ୍ୟଗୁଡ଼ିକୁ ଏହାର ବ୍ୟବହାର ପାଇଁ ବାରଣ କରିଛି।
ଏଥିସହ କିଟ୍ଗୁଡ଼ିକ ଫେରାଇ ଦେବାକୁ ନିର୍ଦ୍ଦେଶ ମଧ୍ୟ ଦେଇଥିଲା। ଆଇସିଏମଆର କିଟ୍ଗୁଡ଼ିକୁ ତ୍ରୁଟିପୂର୍ଣ୍ଣ କହିବାରୁ ଭାରତ ସରକାର ଚାଇନାକୁ ଦେଇଥିବା ଅର୍ଡରକୁ ବାତିଲ କରିଛନ୍ତି। ଚାଇନାର ଦୁଇଟି କମ୍ପାନୀରୁ ପ୍ରାୟ ୫ ଲକ୍ଷ ରାପିଡ ଟେଷ୍ଟ କିଟ ଭାରତକୁ ଅଣାଯାଇଥିଲା। ଏଗୁଡ଼ିକୁ ରାଜ୍ୟମାନଙ୍କୁ ଦିଆଯାଇଥିଲା।
