ସତ୍ୟଶିଖା( କିଭ୍ )୦୪.୦୩.୨୦୨୨ : ୟୁରୋପର ସବୁଠାରୁ ବଡ଼ ପରମାଣୁ ପ୍ଲାଣ୍ଟ ଉପରେ ରୁଷ ହମଲା କରିବା ପରେ ସମଗ୍ର ବିଶ୍ୱ ପ୍ରତି ବିପଦ ସୃଷ୍ଟି ହୋଇଛି। ଜାପୋରିଝଝିଆରେ ଥିବା ଏହି ନ୍ୟୁକ୍ଲିୟର ପ୍ଲାଣ୍ଟ ଉପରେ ରୁଷ ବୋମା ମାଡ଼ କରିବାରୁ ଏଥିରେ ନିଆଁ ଲାଗି ଯାଇଛି। ଯଦି ଏହାକୁ ଠିକଣା ସମୟରେ ନିୟନ୍ତ୍ରଣ ନ କରାଯିବ, ତା’ହେଲେ ପ୍ଳାଣ୍ଟରୁ ନିର୍ଗତ ହେବାକୁ ଥିବା ନ୍ୟୁକ୍ଲିୟର ବିକିରଣ ସମଗ୍ର ୟୁରୋପକୁ ଛାରଖାର କରିଦେବ ବୋଲି ଆଶାଙ୍କା ପ୍ରକାଶ ପାଇଛି।
ନିଆଁ ଲାଗିଥିଲେ ମଧ୍ୟ ରୁଷ ଏହାକୁ ଲିଭାଉ ନାହିଁ କିମ୍ବା ୟୁକ୍ରେନର ଅଗ୍ନିଶମ କର୍ମଚାରୀଙ୍କୁ ସେଠାକୁ ଛାଡ଼ୁନି। ଏପରି ଏକ ବିପଦପୂର୍ଣ୍ଣ ମୁହୂର୍ତ୍ତରେ ଆମେରିକା ରାଷ୍ଟ୍ରପତି ଜୋ ବାଇଡେନ ରୁଷକୁ ସହାୟତା କରିବାକୁ ନିବେଦନ କରିଛନ୍ତି। ୟୁକ୍ରେନର ଏହି ନ୍ୟୁକ୍ଲିୟନ ପ୍ଲାଣ୍ଟ ନିକଟରେ ମିଲିଟାରୀ କାର୍ଯ୍ୟକଳାପ ବନ୍ଦ କରି ରୁଷ ଜରୁରି କାଳୀନ ଟିମ୍କୁ ସ୍ଥିତି ନିୟନ୍ତ୍ରଣ କରିବାକୁ ଅନୁମତି ଦେଉ ବୋଲି ବାଇଡେନ ଅନୁରୋଧ କରିଛନ୍ତି।
