ସତ୍ୟଶିଖା ୧୯/୦୮/୨୦୧୧ : ସ୍ୱାଧିନତା ଦିବସରେ ମୁଖ୍ୟମନ୍ତ୍ରୀ କରିଥିବା ଘୋଷଣା ଆସନ୍ତକାଲିଠାରୁ କାର୍ଯ୍ୟକାରୀ ହେବାକୁ ଯାଉଛି । ମାଲକାନଗିରିରୁ ବିଜୁ ସ୍ମାର୍ଟ ହେଲଥ କାର୍ଡ ବଣ୍ଟନର ଶୁଭାରମ୍ଭ କରିବେ ରାଜ୍ୟ ସରକାର । ଏଥିପାଇଁ ବ୍ୟାପକ ପ୍ରସ୍ତୁତି ହୋଇଥିବା ବେଳେ ବିରୋଧୀ ଏହାକୁ ନେଇ ପ୍ରଶ୍ନ ଉଠାଇଛନ୍ତି । କାର୍ଡର ବୈଧତା ଏବଂ ଉପଯୋଗିତା ଉପରେ ସନ୍ଦେହ ପ୍ରକାଶ କରିଥିବା ବେଳେ ବିଜେଡି ବିଧାୟକ ଦେବୀ ମିଶ୍ର କହିଛନ୍ତି, କାହିଁକି ଅସହିଷ୍ଣୁ ହୋଇପଡୁଛନ୍ତି ବିରୋଧୀ ।
ନୂଆ ସ୍ମାର୍ଟ ହେଲଥ କାର୍ଡକୁ ନେଇ ରାଜନୀତି । ବିଜେଡି-ବିରୋଧୀ ମୁହାଁମୁହିଁ । ୨୦ ତାରିଖରୁ ମାଲକାନଗିରିରେ ଆରମ୍ଭ ହେବାକୁ ଯାଉଛି ରାଜ୍ୟ ସରକାରଙ୍କ ନୂଆ ସ୍ମାର୍ଟ ହେଲଥ କାର୍ଡ । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାକୁ ନୂଆ ରୂପରେ କାର୍ଯ୍ୟକାରୀ କରିବାକୁ ଯାଉଛନ୍ତି ରାଜ୍ୟ ସରକାର । ମାଲକାନଗିରିରେ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ହିତାଧିକାରୀଙ୍କୁ ସ୍ମାର୍ଟ କାର୍ଡ ବିତରଣ କରାଯିବ । ତେବେ ଏହାକୁ ନେଇ ରାଜନୀତି ତେଜିବାରେ ଲାଗିଛି । ମାଲକାନଗିରିରେ ବିଜେପି ସାମ୍ବାଦିକ ସମ୍ମିଳନୀ କରି ଅଭିଯୋଗ କରିଛି ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଯୋଜନା କାମ କରୁଥିବା ବେଳେ ସ୍ମାର୍ଟ ହେଲଥ କାର୍ଡ ଏକ ଧୂଆଁବାଣ । ନୂଆ ରୂପରେ ଆସୁଛି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା । ୯୬ ଲକ୍ଷ ପରିବାରକୁ ମିଳିବ ସ୍ମାର୍ଟ ହେଲଥ କାର୍ଡ । ଉପକୃତ ହେବେ ରାଜ୍ୟର ସାଢ଼େ ୩ କୋଟି ଲୋକ । ହେଲେ ଏହାକୁ ନେଇ ବିରୋଧୀ ପ୍ରଶ୍ନ ଉଠାଇ ଚାଲିଛନ୍ତି । ବିଜେଡି ବିଧାୟକ ଦେବୀ ମିଶ୍ର କହିଛନ୍ତି, ବିରୋଧୀ କାହିଁକି ଅସହିଷ୍ଣୁ ହେଉଛନ୍ତି । ସେପଟେ ସ୍ୱାସ୍ଥ୍ୟମନ୍ତ୍ରୀ ନବ ଦାସ କହିଛନ୍ତି, ନୂଆ ସ୍କାର୍ଟ କାର୍ଡ ଲାଗୁ ହେବା ପରେ ଓଡିଶା ଟ୍ରିଟମେଣ୍ଟ ପାଣ୍ଠି ସହ ପୂର୍ବରୁ ଥିବା ବିଜୁ କୃଷକ କଲ୍ୟାଣ ଯୋଜନା ସହ ରାଷ୍ଟ୍ରୀୟ ସ୍ୱାସ୍ଥ୍ୟ ବୀମା ଯୋଜନା ପରି ବିଭିନ୍ନ କାର୍ଡ ଅକାମୀ ହୋଇଯିବ ।
ନଜର ପକାନ୍ତୁ କ’ଣ ଏହି ସ୍ମାର୍ଟ ହେଲଥ କାର୍ଡ
ଜାତୀୟ ଖାଦ୍ୟ ସୁରକ୍ଷା ହିତାଧିକାରୀ, ରାଜ୍ୟ ଖାଦ୍ୟ ସୁରକ୍ଷା ହିତାଧିକାରୀ, ଅନ୍ନପୂର୍ଣ୍ଣା ଓ ଅନ୍ତଦ୍ୟୋୟ ହିତାଧିକାରୀଙ୍କୁ ମିଳିବ ହେଲଥ୍ କାର୍ଡ
ପ୍ରତିବର୍ଷ ପ୍ରତ୍ୟେକ ପରିବାର ପାଇଁ ୫ ଲକ୍ଷ ଟଙ୍କା ଓ ମହିଳାଙ୍କ ପାଇଁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସୁବିଧା ମିଳିବ
ରାଜ୍ୟ ତଥା ଦେଶର ୨୦୦ରୁ ଅଧିକ ଘରୋଇ ହସ୍ପିଟାଲରେ ମାଗଣା ଚିକିତ୍ସା ସୁବିଧା ରହିଛି
ସ୍ମାର୍ଟ ହେଲଥ କାର୍ଡ ଦେବାରେ ଓଡ଼ିଶା ହେବ ଦେଶର ପ୍ରଥମ ରାଜ୍ୟ
