ଖେଳଦେଶ

୪୧ ବର୍ଷ ପରେ ଅଲିମ୍ପିକ୍ସ ହକିରେ ଚମକିଲା ଭାରତ, ଜର୍ମାନୀକୁ ୫-୪ ଗୋଲ୍ ରେ ପରାସ୍ତ କରି ବ୍ରୋଞ୍ଜ ପଦକ ହାସଲ

ସତ୍ୟଶିଖା(ନୂଆଦିଲ୍ଲୀ) ୦୫.୦୮ .୨୦୨୧:

ଦୀର୍ଘ ୪୧ ବର୍ଷ ପରେ ହକିରେ ଅଲିମ୍ପିକ୍ସ ପଦ ଜିତିଛି ଭାରତ । ଟୋକିଓ ଅଲିମ୍ପିକ୍ସର ରୋମାଞ୍ଚକର ମ୍ୟାଚ୍ ରେ ଜର୍ମାନୀକୁ ୫-୪ ଗୋଲ୍ ରେ ପରାସ୍ତ କରି ବ୍ରୋଞ୍ଚ ପଦକ ହାସଲ କରିଛନ୍ତି ଭାରତୀୟ ପୁରୁଷ ଦଳ । ୧୯୮୦ ମସିହା ପରେ ଭାରତକୁ ହକିରେ ପ୍ରଥମ ଅଲିମ୍ପିକ୍ସ ପଦକ ମିଳିଛି । ୧୯୮୦ ମସ୍କୋ ଅଲିମ୍ପିକ୍ସ ପୁରୁଷ ହକିରେ ଭାରତକୁ ସ୍ୱର୍ଣ୍ଣପଦକ ମିଳିଥିଲା ।

ଆଜିର ମ୍ୟାଚ୍ ଟି ଭାରତୀୟ ଟିମ୍ ପାଇଁ ପ୍ରଥମରୁ ସଂଘର୍ଷପୂର୍ଣ୍ଣ ଥିଲା । ପ୍ରଥମ କ୍ୱାର୍ଟରରେ ଭାରତୀୟ ଡିଫେନସ୍ କୁ ଅଡୁଆରେ ପକାଇ ଅଗ୍ରଣୀ ଥିଲେ ଜର୍ମାନୀ ଟିମ୍ । ଦ୍ୱିତୀୟ କ୍ୱାର୍ଟରରେ ସିମରନଜିତ୍ ସିଂ ଭଲ ସଟ୍ ଖେଳିଥିଲେ ମଧ୍ୟ ଡିଫେନସିଭ୍ ତ୍ରୁଟି ଯୋଗୁଁ ଜର୍ମାନୀ ଦୁଇ ମିନିଟ୍ ରେ ଦୁଇଟି ଗୋଲ୍ ଦେବାରେ ସକ୍ଷମ ହୋଇଥିଲା । ଭାରତ ସଙ୍କଟରେ ଥିବା ବେଳେ ଦୁଇଟି ପେନାଲଟି କର୍ଣ୍ଣର ଭାରତ ପାଇଁ ଆଶିର୍ବାଦ ହେଲା । ହାର୍ଦ୍ଦିକ ଏବଂ ହରମନପ୍ରୀତ ଗୋଟିଏ ଲେଖାଏଁ ଗୋଲ୍ ସ୍କୋର୍ କରି ହାଫ୍ ଟାଇମ୍ ସୁଦ୍ଧା ୩-୩ ରେ ମ୍ୟାଚ୍ ବରାବରକୁ ନେଇ ଆସିଥିଲେ । ତୃତୀୟ କ୍ୱାର୍ଟରଟି ଅବଶ୍ୟ ଭାରତ ସପକ୍ଷରେ ଯାଇଥିଲା ।

ମୋଟାମୋଟି ଏହି ମ୍ୟାଚ୍ ରେ ସିମରନଜିତ୍ ସିଂହ ବ୍ୟକ୍ତିଗତ ଭାବେ ଦୁଇଟି ଗୋଲ୍ ସ୍କୋର କରିଥିଲା ବେଳେ ରୁପିନ୍ଦର ପାଲ ସିଂ, ହାର୍ଦ୍ଦିକ ସିଂ ଏବଂ ହରମନପ୍ରୀତ ସିଂ ଗୋଟିଏ ଲେଖାଏଁ ଗୋଲ୍ ସ୍କୋର କରିଥିଲେ । ଶେଷ ୬.୮ ସେକେଣ୍ଡରେ ଜର୍ମାନୀକୁ ଏକ ପେନାଲଟି କର୍ଣ୍ଣର ମିଳିଥିଲେ ମଧ୍ୟ ଭାରତୀୟ ଗୋଲକିପର୍ ପିଆର ଶ୍ରୀଜେଶ ତାକୁ ପଣ୍ଡ କରିଥିଲେ ।

୪୧ ବର୍ଷ ପରେ ଭାରତକୁ ପ୍ରଥମ ଅଲିମ୍ପିକ ହକି ପଦକ ମିଳିଥିବାରୁ ସାରା ଭାରତରେ ଖୁସିର ଉତ୍ସବ ଦେଖିବାକୁ ମିଳିଛି । ଏହି ଖୁସିର ସବୁଠାରୁ ବଡ଼ ଭାଗିଦାରୀ ରହିଛି ଓଡ଼ିଶା । ଭାରତୀୟ ହକି ଦଳର ପ୍ରାୟୋଜକ ଭାବେ ଓଡ଼ିଶା ସରକାରଙ୍କ ପ୍ରୋତ୍ସାହନକୁ ସବୁଆଡୁ ପ୍ରଶଂସା ମିଳିଛି । ୨୦୧୮ ମସିହାରୁ ଉଭୟ ପୁରୁଷ ଓ ମହିଳା ଭାରତୀୟ ହକି ଦଳର ପ୍ରାୟୋଜକ ଅଛନ୍ତି ଓଡ଼ିଶା ସରକାର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବ୍ୟକ୍ତିଗତ ଭାବେ ଭାରତୀୟ ହକି ଦଳକୁ ପ୍ରୋତ୍ସାହନ ଦେଇ ଆସୁଛନ୍ତି ।

ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାରତୀୟ ପୁରୁଷ ହକି ଦଳର ଏହି ଚିତ୍ତାକର୍ଷକ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି । ରାଷ୍ଟ୍ରପତି ତାଙ୍କ ଶୁଭେଚ୍ଛା ବାର୍ତ୍ତାରେ ଏହାକୁ ଏକ ଐତିହାସିକ ବିଜୟ ସହ ନୂଆ ଯୁଗର ଆରମ୍ଭ ହେଲା ବୋଲି ଉଲ୍ଲେଖ କରିଛନ୍ତି । ଅଲିମ୍ପିକ୍ସରେ ଭାରତୀୟ ଦଳ ଅତୁଳନୀୟ କୁଶଳ, ସ୍ଥିରତା ଓ ସଂକଳ୍ପ ଦେଖାଇଲେ । ଆଗାମୀ ପୀଢ଼ିକୁ ଏହା ପ୍ରେରଣା ଯୋଗାଇବ ବୋଲି ରାଷ୍ଟ୍ରପତି କହିଛନ୍ତି ।

ପ୍ରଧାନମନ୍ତ୍ରୀ ତାଙ୍କ ଶୁଭେଚ୍ଛା ବାର୍ତ୍ତାରେ ଏହା ଐତିହାସିକ ଦିନ ବୋଲି କହିଛନ୍ତି । ଦେଶବାସୀଙ୍କ ସ୍ୱପ୍ନକୁ ସାକାର କରିବାରେ ହକି ଟିମ୍ ସଫଳ ହୋଇଛି । ହକି ଟିମ୍ ପାଇଁ ଭାରତବାସୀ ଆଜି ଗର୍ବିତ ବୋଲି ପ୍ରଧାନମନ୍ତ୍ରୀ ଟ୍ୱିଟ୍ କରିଛନ୍ତି ।

ମୁଖ୍ୟମନ୍ତ୍ରୀ ଭାରତୀୟ ଦଳକୁ ବ୍ରିଲିଆଣ୍ଟ ଇନ୍ ବ୍ଲୁ କହି ଅଭିନନ୍ଦନ ଜଣାଇଛନ୍ତି । ଏହା ଏକ ଏତିହାସିକ ବିଜୟ ଏବଂ କ୍ରୀଡ଼ାବିତଙ୍କ ପାଇଁ ପ୍ରେରଣାର ଉତ୍ସ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଟ୍ୱିଟ୍ କରିଛନ୍ତି ।

ସୂଚନାଯୋଗ୍ୟ, ଭାରତୀୟ ପୁରୁଷ ହକିରେ ଅଛନ୍ତି ଦୁଇ ଓଡ଼ିଆ ଖେଳାଳୀ ଅମିତ ରୋହିଦାସ ଓ ବୀରେନ୍ଦ୍ର ଲାକ୍ରା ।

Show More
Back to top button