ସତ୍ୟଶିଖା (ନୂଆଦିଲ୍ଲୀ) ୦୬/୦୨/୨୦୨୧ : ନୂତନ କୃଷି ଆଇନ୍କୁ ବିରୋଧ କରି ଆଜି ଦେଶବ୍ୟାପୀ ‘ଚକା ଜାମ୍’ ହେଉଥିବା ବେଳେ ଦିଲ୍ଲୀର ମେଟ୍ରୋ ଷ୍ଟେସନଗୁଡ଼ିକରେ ହାଇ ଆର୍ଲଟ ଜାରି କରାଯାଇଛି । ଏଥିସହ ଲାଲ୍ କିଲ୍ଲାରେ କଡ଼ା ସୁରକ୍ଷା ବ୍ୟବସ୍ଥା ଲାଗୁ ହୋଇଛି । ରିପୋର୍ଟରୁ ଜାଣିବାକୁ ମିଳିଛି ଯେ ଦିଲ୍ଲୀ ପୁଲିସ୍ ଚିଠି ଲେଖି ଦିଲ୍ଲୀ ମେଟ୍ରୋ ରେଲ୍ କର୍ପୋରେସନ୍(ଡିଏମ୍ଆର୍ସି)କୁ ଆବଶ୍ୟକ ପଡ଼ିଲେ ପ୍ରାୟ ୧୨ଟି ମେଟ୍ରୋ ଷ୍ଟେସନ୍କୁ ସଟ୍ଡାଉନ୍ କରିବାକୁ ପ୍ରସ୍ତୁତ ରହିବାକୁ କହିଛି । ନୂଆଦିଲ୍ଲୀର ଡିସିପି ଡିଏମ୍ଆର୍ସିକୁ ଏହି ନିର୍ଦ୍ଦେଶ ଦେଇଛନ୍ତି । ଡିସିପି କହିଛନ୍ତି ଯେ ଆଇନ ଶୃଙ୍ଖଳା ପରିସ୍ଥିତି ତଥା ଜନତାଙ୍କୁ ନିୟନ୍ତ୍ରଣ କରିବା ପାଇଁ ମେଟ୍ରୋ କର୍ମଚାରୀମାନେ ପ୍ରସ୍ତୁତ ରହିବା ଉଚିତ ।
ଏପଟେ ଭାରତୀୟ କିସାନ ୟୁନିୟନ(ବିକେୟୁ)ର ଅଧ୍ୟକ୍ଷ ରାକେଶ ଟିକାୟତ ମଧ୍ୟାହ୍ନ ୧୨ଟୁ ଅପରାହ୍ନ ୩ଟା ମଧ୍ୟରେ ହେବକୁ ଥିବା ତିନି ଘଣ୍ଟିଆ ‘ଚକା ଜାମ’ ଦିଲ୍ଲୀ, ଉତ୍ତରପ୍ରଦେଶ ଓ ଉତ୍ତରାଖଣ୍ଡରେ ହେବ ନାହିଁ ବୋଲି କହିଛନ୍ତି । ପରିସ୍ଥତିକୁ ନିୟନ୍ତ୍ରଣରେ ରଖିବା ପାଇଁ ଗାଜିପୁର ସୀମାରେ ପାଣିମାଡ଼ କରିବାକୁ ଦମକଳ ବାହିନୀଙ୍କୁ ନିୟୋଜିତ କରାଯାଇଛି । ଏହାବ୍ୟତୀତ ଶନିବାର ଆଇନ ଶୃଙ୍ଖଳା ପରିସ୍ଥିତିକୁ ବଜାୟ ରଖିବା ପାଇଁ ଦିଲ୍ଲୀ-ଏନ୍ସିଆର୍ ଅଞ୍ଚଳରେ ଦିଲ୍ଲୀ ପୁଲିସ୍, ପାରାମିଲିଟାରୀ ଏବଂ ରିଜର୍ଭ ଫୋର୍ସର ପ୍ରାୟ ୫୦ ହଜାର କର୍ମଚାରୀଙ୍କୁ ନିୟୋଜିତ କରାଯାଇଛି । ଉଲ୍ଲେଖଯୋଗ୍ୟ, କେନ୍ଦ୍ର ସରକାରଙ୍କର ନୂତନ ୩ଟି କୃଷି ଆଇନ୍କୁ ବିରୋଧ କରି ଗତ ନଭେମ୍ବର ମାସରୁ କୃଷକମାନେ ଜାତୀୟ ରାଜଧାନୀ ଦିଲ୍ଲୀର ବିଭିନ୍ନ ସୀମାରେ ଆନ୍ଦୋଳନ କରି ଆସୁଛନ୍ତି ।
