ସତ୍ୟଶିଖା ୨୯/୧୨/୨୦୨୦ : ଡାକ୍ତରୀ ଓ ଇଞ୍ଜିନିୟରିଂ ପାଠ୍ୟକ୍ରମରେ ନାମଲେଖା ବେଳେ ସରକାରୀ ବିଦ୍ୟାଳୟ ଛାତ୍ରଛାତ୍ରୀଙ୍କ ପାଇଁ ସଂରକ୍ଷଣ ବ୍ୟବସ୍ଥା ରହିବ । ୨୦୨୦-୨୧ ଶିକ୍ଷାବର୍ଷରୁ ଏହି ବ୍ୟବସ୍ଥା ଲାଗୁ କରିବାକୁ ରାଜ୍ୟ କ୍ୟାବିନେଟ୍ରେ ନିଷ୍ପତ୍ତି ନିଆଯାଇଛି । ଏଥିସହ ଓଡ଼ିଶାର ଗୌରବମୟ ଐତିହ୍ୟ ତଥା ପ୍ରାଚୀନ କାଳରୁ ଆଧୁନିକ ଯୁଗ ପର୍ଯ୍ୟନ୍ତ ଏ ଜାତିକୁ ମହିମାମଣ୍ଡିତ କରିଥିବା ବରପୁତ୍ରଙ୍କ କାର୍ଯ୍ୟ ଓ ଜୀବନୀକୁ ବିଭିନ୍ନ ପାଠ୍ୟକ୍ରମରେ ସାମିଲ କରାଯିବ । ସପ୍ତମ, ଅଷ୍ଟମ ଓ ନବମ ଶ୍ରେଣୀର ମେଧାବୀ ଛାତ୍ରଛାତ୍ରୀଙ୍କୁ ମଧ୍ୟ ବାର୍ଷିକ ବୃତ୍ତି ପ୍ରଦାନ କରାଯିବ । ରାଜ୍ୟ କ୍ୟାବିନେଟ୍ରେ ଏହି ଦୁଇ ପ୍ରସ୍ତାବକୁ ମଞ୍ଜୁରୀ ଦିଆଯିବା ପରେ ସବୁ ମହଲରେ ନିଷ୍ପତ୍ତିକୁ ସ୍ଵାଗତ କରାଯିବା ସହ ଐତିହାସିକ ବୋଲି ମତବ୍ୟକ୍ତ କରିଛନ୍ତି । ରାଜ୍ୟ ସରକାରଙ୍କ ନିଷ୍ପତ୍ତି ପରେ ଆଜି ସନ୍ଧ୍ୟାରେ କ୍ୟାପିଟାଲ ହାଇସ୍କୁଲ, ୟୁନିଟ୍-୧ ବାଳକ ଉଚ୍ଚ ବିଦ୍ୟାଳୟରେ ଛାତ୍ରଛାତ୍ରୀ, ଶିକ୍ଷକ, ଶିକ୍ଷୟିତ୍ରୀ, ଅଭିଭାବକ ସାମିଲ ହୋଇ ଉତ୍ସବ ମନାଇଛନ୍ତି ।
ମୁଖ୍ୟମନ୍ତ୍ରୀ ଯାହା କୁହନ୍ତି, ତାହାକୁ କାର୍ଯ୍ୟକାରୀ କରନ୍ତି
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଐତିହାସିକ ନିଷ୍ପତ୍ତି ନେଇଛନ୍ତି । ସେ ପୁଣିଥରେ ପ୍ରମାଣ କରିଛନ୍ତି ଯେ ଯାହା କୁହନ୍ତି ତାହାକୁ କାର୍ଯ୍ୟରେ ପରିଣତ କରନ୍ତି । ବିଜୁ ଜନତା ଦଳର ରାଜ୍ୟ କାର୍ଯ୍ୟକାରିଣୀ ବୈଠକରେ ଯେଉଁ ପ୍ରସ୍ତାବ ଆସିଥିଲା ଦଳର ସଭାପତି ଭାବେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ତାହାକୁ ଗ୍ରହଣ କରିଥିଲେ । ଆଉ ଆଜି ପ୍ରସ୍ତାବରେ ମୋହର ବାଜିଛି । ସଂରକ୍ଷଣ ବ୍ୟବସ୍ଥା ନିଷ୍ପତ୍ତିକୁ ସବୁ ମହଲରେ ସ୍ଵାଗତ କରାଯାଉଛି । ଗ୍ରାମାଞ୍ଚଳର ପିଲାମାନେ ଉଚ୍ଚଶିକ୍ଷା ଲାଗି କୋଚିଂ ନେବାରେ ଯେଉଁ ଅସୁବିଧାର ସମ୍ମୁଖୀନ ହେଉଥିଲେ ତାହା ଦୂର ହେବ । ଏହାଦ୍ୱାରା ପିଲା ଓ ଅଭିଭାବକଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ିବ ।
ସମୀର ରଞ୍ଜନ ଦାଶ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ
ରିପୋର୍ଟ ପରେ ସ୍ପଷ୍ଟ ହେବ
ନିଷ୍ପତ୍ତି ସ୍ଵାଗତଯୋଗ୍ୟ। ତେବେ ଗଠିତ ହୋଇଥିବା କମିଟି ରିପୋର୍ଟ ଦେବା ପରେ ଏହାର ମୋଡାଲିଟି କ’ଣ ରହିଛି ତାହା ଜଣାପଡ଼ିବ । ସଂରକ୍ଷଣ ବ୍ୟବସ୍ଥା ହେବା ଦ୍ୱାରା ଓଡ଼ିଆ ଛାତ୍ରଛାତ୍ରୀଙ୍କ ମଧ୍ୟରେ ସାହସ ହେବ । ଆତ୍ମବିଶ୍ୱାସ ବଢ଼ିବ । ପିଲାମାନଙ୍କ ଉଚ୍ଚଶିକ୍ଷା ଲାଗି ଏହା ବେଶ ଉପଯୋଗୀ ହେବ । ଅଭିଭାବକ ବି ନିଜ ପିଲାଙ୍କୁ ସରକାରୀ ସ୍କୁଲରେ ପଢ଼ାଇବା ଲାଗି ଉତ୍ସାହିତ ହେବେ । ଛାତ୍ରଛାତ୍ରୀଙ୍କୁ ପିଲାଟି ଦିନକୁ ସେଭଳି ମାନସିକତାରେ ପ୍ରସ୍ତୁତ କରାଇବେ । ବିଜେଡି ରାଜ୍ୟ କାର୍ଯ୍ୟକାରିଣୀରେ ହୋଇଥିବା ପ୍ରସ୍ତାବ ଆଲୋଚନା କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏତେ ଶୀଘ୍ର ଘୋଷଣା କରି ଅନେକଙ୍କୁ ଆଶ୍ଚର୍ଯ୍ୟ କରିଛନ୍ତି ।
ଶରତ କୁମାର କର, ଶିକ୍ଷାବିତ୍
ସରକାରୀ ବିଦ୍ୟାଳୟ ପିଲାଙ୍କ ପାଇଁ ସୁଯୋଗ
ଏହା ଏକ ଭଲ ପଦକ୍ଷେପ । ସରକାରୀ ସ୍କୁଲର ମେଧାବୀ ପିଲାମାନେ ଭଲ ପ୍ରଦର୍ଶନ କରି ଇଞ୍ଜିନିୟରିଂ ଓ ମେଡିକାଲ ପାଠ୍ୟକ୍ରମରେ ପଢ଼ିବା ଲାଗି ଯୋଗ୍ୟତା ଅର୍ଜନ କରିପାରିବେ । ଏବେ ଦେଖାଯାଉଛି ଯେ ଘରୋଇ ବିଦ୍ୟାଳୟର ଛାତ୍ରଛାତ୍ରୀ ପଢ଼ିବା ସହ କୋଚିଂ ନେଇ ଜାତୀୟସ୍ତରୀୟ ପ୍ରବେଶିକା ପରୀକ୍ଷାରେ ଭଲ ପ୍ରଦର୍ଶନ କରିପାରୁଛନ୍ତି । ଏ କ୍ଷେତ୍ରରେ ଆମ ପିଲାମାନେ ପଛରେ ରହୁଛନ୍ତି । ରାଜ୍ୟ ସରକାରଙ୍କ ସଂରକ୍ଷଣ ବ୍ୟବସ୍ଥା ରହିବା ଫଳରେ ସେହି ପିଲାଙ୍କ ଲାଗି ସୁଯୋଗ ସୃଷ୍ଟି ହୋଇଛି । ସେମାନେ ବି ସଂରକ୍ଷଣ ବ୍ୟବସ୍ଥାରେ ରହି ଘରୋଇ ବିଦ୍ୟାଳୟ ପିଲାଙ୍କ ସହ ମିଶି ଉଚ୍ଚଶିକ୍ଷା କରିବାକୁ ଯୋଗ୍ୟତା ଅର୍ଜନ କରିପାରିବେ ।
ସୋନାମିକା ରୟ, ପ୍ରଧାନଶିକ୍ଷୟିତ୍ରୀ, କ୍ୟାପିଟାଲ ହାଇସ୍କୁଲ
ମେଧାବୀ ଛାତ୍ରଛାତ୍ରୀ ଉପକୃତ ହେବେ
ସରକାରୀ ବିଦ୍ୟାଳୟ ପିଲାଙ୍କ ଲାଗି ସଂରକ୍ଷଣ ବ୍ୟବସ୍ଥା ରହିବା ଏକ ଭଲ ପଦକ୍ଷେପ । ଏହାଦ୍ୱାରା ଅନେକ ମେଧାବୀ ଛାତ୍ରଛାତ୍ରୀ ଉପକୃତ ହେବେ । ବିଶେଷକରି ଗ୍ରାମାଞ୍ଚଳର ଯେଉଁ ପିଲାମାନେ ଉଚ୍ଚଶିକ୍ଷା ଲାଗି ଘରୋଇ ବିଦ୍ୟାଳୟ ତଥା ସିବିଏସ୍ଇ ମାଧ୍ୟମ ଛାତ୍ରଛାତ୍ରୀଙ୍କ ସହ ପ୍ରତିଦ୍ବନ୍ଦ୍ବିତା କରିପାରୁ ନ ଥିଲେ ସେମାନଙ୍କ ଲାଗି ଏହା ସହାୟକ ହେବ । ଅଭିଭାବକ ବି ସେମାନଙ୍କ ପିଲାଙ୍କୁ ସରକାରୀ ବିଦ୍ୟାଳୟରେ ପଢ଼ାଇବା ଲାଗି ଆଗ୍ରହ ଦେଖାଇବେ । ମେଧାବୀ ଛାତ୍ରଛାତ୍ରୀଙ୍କୁ ଉପଯୁକ୍ତ ନ୍ୟାୟ ମିଳିବ ବୋଲି ଆଶା କରାଯାଉଛି । ଭବିଷ୍ୟତରେ ଏହାର ପ୍ରଭାବ ଅଭିଭାବକଙ୍କ ଉପରେ ପଡ଼ିବ ।
ସୁଶ୍ରୀ ସଙ୍ଗୀତା ପଣ୍ଡା, ପ୍ରଧାନଶିକ୍ଷୟିତ୍ରୀ, ୟୁନିଟ୍-୧ ସରକାରୀ ବାଳକ ଉଚ୍ଚ ବିଦ୍ୟାଳୟ
ଗରିବ ଛାତ୍ରଛାତ୍ରୀ ଉପକୃତ ହେବେ
ଐତିହାସିକ ନିଷ୍ପତ୍ତି । ଆଧୁନିକ ଶିକ୍ଷା ସୁଯୋଗରୁ ବଞ୍ଚିତ ହେଉଥିବା ଗରିବ ମେଧାବୀ ଛାତ୍ରଛାତ୍ରୀ ଏହି ନିଷ୍ପତ୍ତି ଦ୍ୱାରା ଉପକୃତ ହେବେ । ତେବେ ରାଜ୍ୟ ସରକାର କେତେ ସଂଖ୍ୟକ ଛାତ୍ରଛାତ୍ରୀଙ୍କୁ ସଂରକ୍ଷଣ ସୁବିଧା କରିପାରିବେ ତାହା ଦେଖିବାକୁ ବାକି ରହିଲା । ଏହା ଏକ ସ୍ଵଳ୍ପମିଆଦି ଯୋଜନା । ସମାଧାନ ହେଇପାରେ । କିନ୍ତୁ ଦୀର୍ଘମିଆଦି ବ୍ୟବସ୍ଥା ପାଇଁ ରାଜ୍ୟ ସରକାର ବିଦ୍ୟାଳୟସ୍ତରରୁ ପ୍ରତିଯୋଗୀତାମୂଳକ ପରୀକ୍ଷା ପାଇଁ ଆଧୁନିକ ଶିକ୍ଷା ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦେବାର ଆବଶ୍ୟକତା ରହିଛି ।
ବିପ୍ଳବ ପ୍ରକାଶ ମହାନ୍ତି, ଆବାହକ, ଓଡ଼ିଶା ବୈଷୟିକ ଓ ବୃତ୍ତିଗତ ଛାତ୍ର ସଂଘ
ସ୍ବପ୍ନ ସାକାର କରିବାକୁ ସୁଯୋଗ
ଭବିଷ୍ୟତରେ ମେଡିକାଲ ପଢ଼ିବାକୁ ଲକ୍ଷ୍ୟ ରଖିଛି । ତେବେ ସିବିଏସ୍ଇ ବୋର୍ଡ ଅଧୀନରେ ପଢ଼ୁଥିବା ଘରୋଇ ବିଦ୍ୟାଳୟ ଛାତ୍ରଛାତ୍ରୀଙ୍କ ମାର୍କକୁ ଦେଖି ମନରେ ଭୟ ରହୁଥିଲା । ସେମାନଙ୍କ ସହ ପ୍ରତିଯୋଗିତା କରିପାରିବି କି ନାହିଁ । ତେବେ ଆଜି ଯେଉଁ ସଂରକ୍ଷଣ ବ୍ୟବସ୍ଥା ଲାଗୁ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି ତାହା ଦ୍ୱାରା ମୁଁ ଭାରି ଉତ୍ସାହିତ । ଆଗକୁ କଠିନ ପରିଶ୍ରମ କରିବି। ଯେକୌଣସି ମୋତେ ସ୍ଵପ୍ନକୁ ସାକାର କରିବାକୁ ଲକ୍ଷ୍ୟ ରଖିଛି ।
ହିମାଂଶୁ କେଶରୀ ପ୍ରଧାନ, ଛାତ୍ର, ଦଶମ ଶ୍ରେଣୀ, ୟୁନିଟ୍-୧ ବାଳକ ଉଚ୍ଚ ବିଦ୍ୟାଳୟ
ସବୁ କ୍ଷେତ୍ରରେ ସଂରକ୍ଷଣ ହେଲେ ଭଲ ହୁଅନ୍ତା
ସଂରକ୍ଷଣ ବ୍ୟବସ୍ଥା ଲାଗୁ ହେବା ଦ୍ୱାରା ଆମ ପରି ସରକାରୀ ବିଦ୍ୟାଳୟର ଛାତ୍ରଛାତ୍ରୀ ଉଚ୍ଚଶିକ୍ଷା ପଢ଼ିବାରେ ବିଶେଷ ଅସୁବିଧାର ସମ୍ମୁଖୀନ ହେବେ ନାହିଁ । ଭବିଷ୍ୟତ ପାଇଁ ଏବେଠାରୁ ପ୍ରସ୍ତୁତ ହେବୁ । ମେଡିକାଲ ଓ ଇଞ୍ଜିନିୟରିଂରେ କ୍ୟାରିୟର କରିବାକୁ ଚାହୁଁଥିବା ଛାତ୍ରଛାତ୍ରୀଙ୍କ ଲାଗି ଏହା ବିଶେଷ ସହାୟକ ହେବ । ସମସ୍ତ କ୍ଷେତ୍ରରେ ଏଭଳି ବ୍ୟବସ୍ଥା କରାଗଲେ ଭଲ ହୁଅନ୍ତା ।
ରାହୁଲ ମହାକୁଡ଼, ଛାତ୍ର, ଦଶମ ଶ୍ରେଣୀ, ୟୁନିଟ୍-୧ ବାଳକ ଉଚ୍ଚ ବିଦ୍ୟାଳୟ
ଭଲ ନିଷ୍ପତ୍ତି ନେଇଛନ୍ତି
ଏତେ ଦିନ ପରେ ଛାତ୍ରଛାତ୍ରୀଙ୍କ ଲାଗି ରାଜ୍ୟ ସରକାର ଭଲ ନିଷ୍ପତ୍ତି ନେଇଛନ୍ତି । ସର୍ବଭାରତୀୟ ପ୍ରବେଶିକା ପରୀକ୍ଷା ବେଳେ ଓଡ଼ିଆ ଓ ଇଂରାଜୀ ମାଧ୍ୟମ ବିଦ୍ୟାଳୟର ଛାତ୍ରଛାତ୍ରୀଙ୍କ ମଧ୍ୟରେ ସବୁବେଳେ ପାତରଅନ୍ତର ହୋଇଥାଏ । ଘରୋଇ ବିଦ୍ୟାଳୟର ପିଲାମାନେ ମୁଖ୍ୟତଃ ଇଂରାଜୀ ମାଧ୍ୟମ ବିଦ୍ୟାଳୟରେ ପଢ଼ୁଥିବାରୁ ସେମାନେ ଉଚ୍ଚଶିକ୍ଷା ଲାଗି ଭଲ ସୁଯୋଗ ପାଇଥାନ୍ତି । ଯାହାକି ସରକାରୀ ବିଦ୍ୟାଳୟ ଛାତ୍ରଛାତ୍ରୀଙ୍କ କ୍ଷେତ୍ରରେ ମିଳି ନ ଥାଏ । ସଂରକ୍ଷଣ ବ୍ୟବସ୍ଥା ଲାଗୁ ହେବା ଦ୍ୱାରା ମେଧାବୀ ଛାତ୍ରଛାତ୍ରୀ ଉପକୃତ ହୋଇପାରିବେ ।
ଗୌରୀ ସେନାପତି, ଅଭିଭାବକ
