ସତ୍ୟଶିଖା (ଭୁବନେଶ୍ୱର) ୦୫/୧୨/୨୦୨୦ : ଜୀବନ ମଣିଷକୁ କେତେବେଳେ କେଉଁ ପରିସ୍ଥିତିରେ ନେଇ ଛିଡ଼ା କରିଦେବ ତାହା କହିହେବ ନାହିଁ । ରାଜାରାଜୁଡ଼ାଙ୍କ ଭଳି ଚଳୁଥିବା ମଣିଷ ବି ଅତି ସାଧାରଣସ୍ତରର ଜୀବନଯାପନ କରିବାକୁ ବାଧ୍ୟ ହୋଇପାରେ । ଠିକ ଏଭଳି ଘଟିଛି ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ କ୍ଷେତ୍ରରେ । ଆଜିକୁ ତିନି ଦିନ ହେବ ସେ ଜେଲର ଚାରିକାନ୍ଥ ଭିତରେ ଜଣେ ସାଧାରଣ କଏଦୀର ଜୀବନ ଜିଉଛନ୍ତି । ଦିନ ଥିଲା ଅୟସ ଆରାମରେ ଜୀବନ ବିତାଉଥିଲେ ରାଜ୍ୟର ପ୍ରଭାବଶାଳୀ ବିଧାୟକ ପ୍ରଦୀପ ପାଣିଗ୍ରାହୀ । ଆକାଉଣ୍ଟକୁ ଆସୁଥିଲା କୋଟି କୋଟି ଟଙ୍କା । ଭାବୀ ଜ୍ବାଇଁ ଆକାଶ ପାଠକ ସହ ଚାର୍ଟର୍ ବିମାନରେ ଆକାଶରେ ଘୂରି ବୁଲୁଥିଲେ । ତାଜ୍ ପ୍ୟାଲେସ୍ ହୋଟେଲରେ ଗୋଟିଏ ଦିନରେ ଲକ୍ଷାଧିକ ଟଙ୍କା ଖର୍ଚ୍ଚ କରି ଦେଉଥିଲେ । କିନ୍ତୁ ସେ ଯେ ଦିନେ ଜେଲ୍ର ଚାରିକାନ୍ଥ ଦେଖିବେ, ତାହା ସ୍ବପ୍ନରେ ସୁଦ୍ଧା ଭାବି ନ ଥିଲେ । ଗୁରୁବାର ଗିରଫ ହୋଇ ଜେଲ୍ ଯିବା ପରେ ବଦଳି ଯାଇଛି ସବୁକିଛି । ସାଧାରଣ କଏଦୀଟିଏ ପାଲଟି ଯାଇଛନ୍ତି ପ୍ରଦୀପ ପାଣିଗ୍ରାହୀ । ରାତିରେ ନିଦ ଆସୁନାହିଁ । ଚିନ୍ତାରେ ବିତୁଛି ଚବିଶ ଘଣ୍ଟା ।
ଜାମିନ ନାମଞ୍ଜୁର ହେବା ପରେ ଗୁରୁବାର ରାତି ପ୍ରାୟ ସାଢ଼େ ୧୧ଟାରେ ଭୁବନେଶ୍ବରର ଝାରପଡ଼ା ଜେଲରେ ପହଞ୍ଚି ଥିବା ପ୍ରଦୀପଙ୍କୁ ମିଳିଥିଲା ୧୪ ନମ୍ବର ଓ୍ୱାର୍ଡ । ଜେଲ୍ ପକ୍ଷରୁ ଦୁଇଟି କମ୍ବଳ, ଦୁଇଟି ଥାଳି, ଦୁଇଟି ଗିନା ଯୋଗାଇ ଦିଆଯାଇଥିଲା । ରାତିରେ ଖାଦ୍ୟ ଖାଇ ଜେଲକୁ ଯାଇଥିଲେ। କିନ୍ତୁ ଭଲ ଭାବେ ନିଦ ହୋଇ ନ ଥିଲା । ଦୀର୍ଘ ସମୟ ଧରି କଡ଼ ଲେଉଟାଉଥିଲେ । ମଝିରେ ମଝିରେ ଉଠି ବସି ପଡ଼ୁଥିଲେ । ଥଣ୍ଡା ପଡ଼ିଥିବାରୁ କମ୍ବଳ ଘୋଡ଼ି ହୋଇଥିଲେ । ଭୋର୍ ସମୟରେ ନିଦ ଲାଗି ଯାଇଥିଲା । କିନ୍ତୁ ଜେଲ୍ ନିୟମ ଅନୁସାରେ, ସକାଳ ୬ଟା ସୁଦ୍ଧା ଉଠିବାକୁ ପଡ଼ିଥିଲା ।
