ସତ୍ୟଶିଖା (ନୂଆଦିଲ୍ଲୀ) ୪.୦୯.୨୦୨୦ : କଂଗ୍ରେସ କାର୍ଯ୍ୟ କମିଟି C.W.C ବୈଠକରେ ସାମ୍ନା ସାମ୍ନି ହୋଇଥିଲେ କଂଗ୍ରେସ ର ବରିଷ୍ଠ ନେତା ଏବଂ ଗାନ୍ଧୀ ପରିବାର । ଅସନ୍ତୁଷ୍ଟ ନେତାମାନେ ସୋନିଆ ଗାନ୍ଧୀଙ୍କୁ C.W.C ବୈଠକ ପୂର୍ବରୁ ଏକ ଚିଠି ଲେଖି ଦଳର ନେତୃତ୍ୱ ସ୍ତରରେ ପରିବର୍ତ୍ତନ ଆଣିବାକୁ ଦାବି କରିଥିଲେ । ଏହି ବୈଠକର 10 ଦିନ ପରେ ଏବେ ଅସନ୍ତୁଷ୍ଟ ନେତା ଏବଂ ଗାନ୍ଧୀ ପରିବାରର ସମର୍ଥକ ଏକଜୁଟ ହୋଇଛନ୍ତି । ସଂସଦ ର ଆଗାମୀ ମୌସୁମୀ ଅଧିବେଶନ ନେଇ ଏକଜୁଟ ହୋଇଛନ୍ତି କଂଗ୍ରେସ ସମସ୍ତ ନେତା। ଭିଡିଓ କନଫରେନ୍ସିଂ ମାଧ୍ୟମରେ ସଂସଦର ମୌସୁମୀ ଅଧିବେଶନ ପାଇଁ ଦଳର ରଣନୀତି ଉପରେ ଆଲୋଚନା କରାଯାଇଛି । ଏହି ବୈଠକରେ ଦଳର ସମସ୍ତ ବରିଷ୍ଠ ନେତା ଏବଂ ସାଂସଦ ଯୋଡି ହୋଇଥିଲେ । 14 ସେପ୍ଟେମ୍ବରରୁ ଆରମ୍ଭ ହେଉଥିବା ସଂସଦର ମୌସୁମୀ ଅଧିବେଶନରେ ଦଳ କେଉଁ କେଉଁ ପ୍ରସଙ୍ଗ କୁ ନିଜର ପ୍ରସଙ୍ଗ କରିବ ତାହା ଆଲୋଚନା ହୋଇଛି । ସଂସଦ ରେ ପ୍ରଶ୍ନକାଳ, ଆର୍ଥିକ ସମସ୍ୟା, ଚୀନ ସହ ସୀମା ବିବାଦ ଭଳି ପ୍ରସଙ୍ଗ ଚୁଡାନ୍ତ ହୋଇଛି । ଏଥିପାଇଁ କଂଗ୍ରେସ ଅନ୍ୟ ଆଞ୍ଚଳିକ ଦଳ ଏବଂ ନିଜର ସହଯୋଗୀ ମାନଙ୍କ ସହ ମଧ୍ୟ ଆଲୋଚନା କରିବ ।
ଏହି ସଭାରେ ରାଜ୍ୟସଭାରେ ବିରୋଧୀଦଳର ନେତା ଗୁଲାମ ନବୀ ଆଜାଦ, ବିରୋଧୀ ଦଳର ଉପ-ନେତା ଆନନ୍ଦ ଶର୍ମା ଏବଂ ଲୋକସଭାରେ ବିରୋଧୀ ଦଳର ନେତା ଅଧିର ରଂଜନ ଚୌଧୁରୀ ଯୋଗ ଦେଇଥିଲେ । ମହାମାରୀ ହେତୁ ଅର୍ଥନୈତିକ ମନ୍ଥରତା ପ୍ରସଙ୍ଗକୁ ସଂସଦୀୟ ପ୍ୟାନେଲ ମୁଖ୍ୟତ ଉଠାଇବାକୁ ନିଷ୍ପତ୍ତି ନେଇଛି । କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ମଧ୍ୟ ଭିଡିଓ ବାର୍ତ୍ତା ମାଧ୍ୟମରେ ମୋଦୀ ସରକାରଙ୍କୁ ଆକ୍ରମଣ କରି ଏହାର ପୃଷ୍ଠଭୂମି ପ୍ରସ୍ତୁତ କରିଛନ୍ତି। ଏହା ବ୍ୟତୀତ ଚୀନ୍ ସହିତ ଲଦାଖରେ ବିବାଦ, ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ ପରିସ୍ଥିତି, କରୋନା ମହାମାରୀ, ସହରାଞ୍ଚଳର ଗରିବ ଏବଂ ଗ୍ରାମାଞ୍ଚଳର ଲୋକଙ୍କ ଉପରେ ତାଲା ବନ୍ଦ ଭଳି ପ୍ରସଙ୍ଗ ମଧ୍ୟ ସଂସଦରେ ଉଠାଇବ ଦଳ। ଏହାକୁ ମୁକାବିଲା କରିବା ପାଇଁ ଏବଂ ବିରୋଧୀ ଙ୍କ ସମସ୍ତ ପ୍ରଶ୍ନର ଉତ୍ତର ଦେବାପାଇଁ ସରକାର ପ୍ରସ୍ତୁତ ବୋଲି କେନ୍ଦ୍ର ସଂସଦୀୟ ବ୍ୟପାର ମନ୍ତ୍ରୀ କହିଛନ୍ତି।
