କ୍ୱାରେଣ୍ଟାଇନ୍‌ କେନ୍ଦ୍ର ପରିସରରୁ ଉଦ୍ଧାର ମହିଳାଙ୍କ ଝୁଲନ୍ତା ମୃତଦେହ

ଜଳେଶ୍ୱର(ଅଜିତ ଦାସ): କ୍ୱାରେଣ୍ଟାଇନ୍‌ କେନ୍ଦ୍ର ପରିସରରୁ ଜଣେ ପ୍ରବାସୀ ମହିଳାଙ୍କ ଝୁଲନ୍ତା ଶବ ଉଦ୍ଧାର ହୋଇଛି। ହେଲେ ମୃତ୍ୟୁର କାରଣ ଜଣାପଡ଼ି ନାହିଁ। ଆଜି ଏପରି ଘଟଣା ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଅଞ୍ଚଳରେ ଘଟିଛି। ଏନେଇ ଅଭିଯୋଗ ହେବା ପରେ ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି।

ଜୟରାମପୁର ଗାଁର ଆରତୀ ଭୋଇ(୪୦)। ସ୍ୱାମୀଙ୍କ ସ୍ୱାସ୍ଥ୍ୟ ଅବସ୍ଥା ଭଲ ନଥିବାରୁ ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ। ମହାମାରୀ ‘କରୋନା’ ପାଇଁ ଦିଆଯାଇଥିବା ଲକ୍‌ଡାଉନ୍‌ ଯୋଗୁଁ କାମ ହରାଇ ସେଠାରେ ରହୁଥିଲେ। ତେବେ ଗତ ୨୦ରେ ସେ ହାଇଦ୍ରାବାଦରୁ ଫେରି ଜୟରାମପୁର ହାଇସ୍କୁଲରେ ହୋଇଥିବା କ୍ୱାରେଣ୍ଟାଇନ କେନ୍ଦ୍ରରେ ରହୁଥିଲେ। ଆଜି ତାଙ୍କର ଝୁଲନ୍ତା ମୃତଦେହ କ୍ୱାରେଣ୍ଟାଇନ୍‌ କେନ୍ଦ୍ର ପଛ ପାର୍ଶ୍ୱ ଏକ ଗଛରୁ ଉଦ୍ଧାର କରାଯାଇଛି। ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି। ବର୍ତ୍ତମାନ ସୁଦ୍ଧା ମୃତ୍ୟୁର ପ୍ରକୃତ କାରଣ ଜଣାପଡ଼ି ନାହିଁ।