ନୂଆଦିଲ୍ଲୀ: ଗଲୱାନ ଭ୍ୟାଲିରେ ଭାରତୀୟ ଯବାନଙ୍କ ଉପରେ ଚାଇନାର ଷଡ଼ଯନ୍ତ୍ରପୂର୍ଣ୍ଣ ଆକ୍ରମଣର ଜବାବ ଦେବାକୁ ସେନା ପ୍ରସ୍ତୁତ ରହିଛି। ଚାଇନା ବାରମ୍ବାର ଭାରତୀୟ ଅଞ୍ଚଳରେ ପ୍ରବେଶ କରୁଥିବାରୁ ଏହା ବିରୋଧରେ କିଛି ସାମାରିକ କାର୍ଯ୍ୟାନୁଷ୍ଠାନ ନିଆଯିବା ଦରକାର ବୋଲି ପ୍ରତିରକ୍ଷା ସ୍ତରର କରିଛି ଅଧିକାରୀ ପ୍ରସ୍ତାବ ରଖିଛନ୍ତି। ତେବେ ସେନା କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ଥିବା ବେଳେ ସରକାରଙ୍କ ନିର୍ଦ୍ଦେଶକୁ ଅପେକ୍ଷା କରାଯାଇଥିବା ଜଣାପଡ଼ିଛି।
ଚାଇନା ବାରମ୍ବାର ସୀମା ଉଲ୍ଲଙ୍ଘନ କରୁଥିବାରୁ ତା’କୁ ଜବାବ ଦେବାକୁ ଅନେକ ସେନା ଅଧିକାରୀ ପ୍ରସ୍ତାବ ଦେଇଛନ୍ତି। ତେବେ କେହି ବି ଚାଇନା ସହ ପୂର୍ଣ୍ଣକାଳୀନ ଯୁଦ୍ଧ ଲଢ଼ିବା ସପକ୍ଷରେ ନାହାନ୍ତି। ଚାଇନା ବାରମ୍ବାର ସୀମାର ସ୍ଥିତାବସ୍ଥା ବଦଳାଇବାକୁ ଚେଷ୍ଟା କରୁଛି। ଯଦି ଏବେ ଏହାକୁ ଉଚିତ ଜବାବ ଦିଆ ନ ଯାଏ, ତା’ହେଲେ ବେଜିଂ ହରକତ ଆହୁରି ବଢ଼ିବାର ଆଶଙ୍କା କରାଯାଉଛି। ତେଣୁ ସେନା ବାହିନୀର ଅଧିକାଂଶ ବରିଷ୍ଠ ଅଧିକାରୀମାନେ କାର୍ଯ୍ୟାନୁଷ୍ଠାନ ସପକ୍ଷରେ ମତ ରଖିଛନ୍ତି।
ଆହୁରି ପଢ଼ନ୍ତୁ
ସୋମବାର ଚାଇନା ସେନା ଗଲୱାନ ଭ୍ୟାଲିରେ ଭାରତୀୟ ଯବାନଙ୍କୁ ଆକ୍ରମଣ କରିଥିଲେ। ଏହାକୁ ନେଇ ଦୁଇ ଦେଶ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା। ଏବେ ସିକ୍କିମ ଓ ଅରୁଣାଚଳ ପ୍ରଦେଶ ସୀମାରେ ମଧ୍ୟ ଚାଇନା ବିପୁଳ ସଂଖ୍ୟାରେ ଫୋର୍ସ ମୁତୟନ କରିବା ଆରମ୍ଭ କରିଦେଇଛି।
ଭାରତୀୟ ଯବାନ ଏଠାରେ ବି ଚାଇନାକୁ ଜବାବ ଦେବାକୁ ପ୍ରସ୍ତୁତ ରହିଛନ୍ତି। ଚାଇନା ଦିନକୁ ଦିନ ନିଜର ବିସ୍ତାରବାଦୀ ନୀତିକୁ କାର୍ଯ୍ୟକାରୀ କରିବାକୁ ଚାହୁଁଥିବାରୁ ଭାରତ କିଛି ନିର୍ଦ୍ଦିଷ୍ଟ ପ୍ରକାରର ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମାନସମନ୍ଥନ ଆରମ୍ଭ କରିଛି। ହେଲେ ସରକାର ବିଭିନ୍ନ ଜିଓପଲିଟିକାଲ ଓ ଅନ୍ୟାନ୍ୟ ଦିଗଗୁଡ଼ିକୁ ଦୃଷ୍ଟିରେ ରଖି ହିଁ ଚୂଡ଼ାନ୍ତ ନିଷ୍ପତ୍ତି ନେବେ।
ଅନ୍ୟପକ୍ଷରେ ଚାଇନା ସହ ଲାଗିଥିବା ସମସ୍ତ ସୀମାରେ ଭାରତ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ସୀମାରେ ଅଧିକାଂଶ ସୁରକ୍ଷାକର୍ମୀଙ୍କୁ ମଧ୍ୟ ମୁତୟନ କରାଯାଇଛି। ବିଶେଷ କରି ଚାଇନାର ପିଏଲଏ ଗଲୱାନ ଭ୍ୟାଲି, ଦୌଲତ ବେଗ ଓଲଡି, ଦେପସାଙ୍ଗ ଓ ଛୁଶୁଲ ଭଳି ଅଞ୍ଚଳରେ ବିଭିନ୍ନ ନିର୍ମାଣ କାମ କରୁଥିବାରୁ ଏହା ଉପରେ ଭାରତୀୟ ଯବାନ ନଜର ରଖିଛନ୍ତି। ସୀମାରେ ଭାରତ ପକ୍ଷରୁ ସ୍ୟାଟେଲାଇଟ, ଡ୍ରୋନ ଓ ଲଙ୍ଗ ରେଞ୍ଜ ନାଭାଲ ଏୟାରକ୍ରାଫ୍ଟ ଯଥା ପି-୮ଆଇ ଦ୍ୱାରା ଚାଇନା ଉପରେ ନଜର ରଖାଯାଇଛି।
