ସତ୍ୟଶିଖା (ମୁମ୍ବାଇ) ୨୧/୧୧/୨୦୨୦ : ସୁଶାନ୍ତ ସିଂହ ରାଜପୁତ ମାମଲାରେ ପୁଣି ଥରେ ପ୍ରବର୍ତ୍ତନ ନିର୍ଦେଶାଳୟ(ଇଡି)ତଦନ୍ତ ଜୋରସୋରରେ ଚାଲିଛି । ଏହି ମାମଲାରେ ସୁଶାନ୍ତଙ୍କୁ ଦିଆଯାଇଥିବା କୋଟି କୋଟି ଟଙ୍କାର ପେମେଣ୍ଟକୁ ନେଇ ଏକ ତଥ୍ୟ ଇଡି ହାତରେ ଲାଗିଛି । ସୂଚନା ଅନୁଯାୟୀ ସୁଶାନ୍ତଙ୍କୁ ତାଙ୍କର ଏକ ଫିଲ୍ମ ପାଇଁ ସନ୍ଦିଗ୍ଧ ପେମେଣ୍ଟ କରାଯାଇଥିଲା । ଏହି ରକମ ୧୭କୋଟି ଟଙ୍କା ବୋଲି କୁହାଯାଉଛି ।
ଏହି ପେମେଣ୍ଟକୁ ନେଇ ତଦନ୍ତ ଚାଲିଛି । ୧୭କୋଟି ଟଙ୍କାର ଏହି ପେମେଣ୍ଟ ୨୦୧୭ମସିହାରେ ସୁଶାନ୍ତଙ୍କ ଫିଲ୍ମ ରାବତା ପାଇଁ କରାଯାଇଥିଲା । ଇଡି ଫିଲ୍ମର ପ୍ରଡ୍ୟୁସର ଦିନେଶ ବିଜାନଙ୍କୁ ଗତ ମାସରେ ଏବିଷୟରେ ପଚରାଉଚୁରା କରି ସାରିଛି । ଦିନେଶଙ୍କୁ ପେମେଣ୍ଟ ସମ୍ବନ୍ଧୀୟ କିଛି କାଗଜପତ୍ର ଜମା କରିବାକୁ କୁହାଯାଇଥିଲା ।
ସେ ହଙ୍ଗେରୀରେ ସୁଟ୍ ହୋଇଥିବା ଫିଲ୍ମର ଓଭରସିଜ ସୁଟ୍ ବଜେଟର ଡିଟେଲ୍ ଜମା କରି ପାରିନଥିଲେ । ଓଭରସିଜ ସୁଟିଂ ପାଇଁ ଫିଲ୍ମ ନିର୍ମାତାଙ୍କୁ ପେମେଣ୍ଟ ହିସାବରେ କିଛି ଟଙ୍କା ଦିଆଯାଇଥାଏ ଏବଂ ଏହା ସେହି ଦେଶରେ ସୁଟିଂ ଉପରେ ଖର୍ଚ୍ଚ କରାଯାଇଥିବା ମୋଟ ବଜେଟର ପାଖାପାଖି ୨୦ପ୍ରତିଶତ ହୋଇପାରେ । ଏହାକୁ ଓଭରସିଜ ପେମେଣ୍ଟ ପର୍କସ କୁହାଯାଇଥାଏ ।
