୪୦% ବିଦେଶ ଫେରନ୍ତାଙ୍କୁ ପତ୍ତା ନାହିଁ : ୨୪୬ ପଜିଟିଭଙ୍କ ଜିନମ୍ ସିକ୍ୱେନ୍ସିଂ ପାଇଁ ପଠାଯାଇଛି

ସତ୍ୟଶିଖା(ଭୁବନେଶ୍ୱର) ୦୭ .୧୨.୨୦୨୧: ବିଦେଶୀ ଫେରନ୍ତା ରାଜ୍ୟବାସୀଙ୍କ ଚିନ୍ତା ବଢ଼ାଇଛନ୍ତି । ବାସ୍ତବରେ ବିଦେଶୀରୁ ରାଜ୍ୟକୁ କେତେ ନାଗରିକ ଫେରିଛନ୍ତି, ତାହାର ସଠିକ ହିସାବ ରାଜ୍ୟ ସରକାରଙ୍କ ପାଖରେ ନାହିଁ । ରାଜ୍ୟ ସରକାର କେବଳ ଅନ୍ଧାରରେ ବାଡ଼ି ବୁଲେଇଲା ଭଳି ଆଚରଣ ପ୍ରଦର୍ଶନ କରୁଛନ୍ତି । ରାଜ୍ୟ ସ୍ୱାସ୍ଥ୍ୟ ବିଭାଗ କହିବା ଅନୁଯାୟୀ ଓମିକ୍ରନ୍ ଭୟରେ ଓଡ଼ିଶାକୁ ବିଦେଶରୁ ଫେରିଲେଣି ୮୦୦ରୁ ଅଧିକ ନାଗରିକ । ସେମାନଙ୍କ ଭିତରୁ ୪୦% ବିଦେଶ ଫେରନ୍ତାଙ୍କୁ ଠାବ କରାଯାଇପାରୁନାହିଁ । କେନ୍ଦ୍ର ସରକାର ଓମିକ୍ରନ୍ ନେଇ ସ୍ୱତନ୍ତ୍ର ଗାଇଡ୍‌ଲାଇନ୍‌୍ ଆଣିବା ପୂର୍ବରୁ ଓଡ଼ିଶାକୁ କେତେ ଫେରିଛନ୍ତି ତାହାର ସଠିକ ହିସାବ ସ୍ୱାସ୍ଥ୍ୟ ବିଭାଗ ପାଖରେ ନାହିଁ ।

ଏହାରି ଭିତରେ ରାଜ୍ୟରେ କୌଣସି ଓମିକ୍ରନ୍ ସଂକ୍ରମିତ ଚିହ୍ନଟ ହୋଇ ନଥିଲେ ହେଁ ଫେରନ୍ତାଙ୍କ କୋଭିଡ୍ ପରୀକ୍ଷା କରିବା ଲାଗି ରାଜ୍ୟ ସରକାର ସ୍ୱତନ୍ତ୍ର ବ୍ୟବସ୍ଥା ଆରମ୍ଭ କରିଛନ୍ତି । ସ୍ୱାସ୍ଥ୍ୟ ବିଭାଗ ଜଣେ ଅଧିକାରୀ କହିଛନ୍ତି ଯେ ବାସ୍ତବରେ ବିଦେଶରୁ ଓଡ଼ିଶାକୁ କେତେ ଫେରୁଛନ୍ତି, ତାହାର ହିସାବ ରଖିବା କଷ୍ଟକର । କାରଣ ସେମାନେ ଏକ ଘୋଷଣାନାମାରେ ବିଦେଶରୁ ଓଡ଼ିଶାକୁ ଫେରୁଛନ୍ତି ବୋଲି ଉଲ୍ଲେଖ କରୁଛନ୍ତି । ହେଲେ ସେମାନଙ୍କ ଭିତରେ କିଏ ଦିଲ୍ଲୀରେ ଓହ୍ଲାଉଛନ୍ତି ତ ଆଉ କିଏ ମୁମ୍ବାଇ, ଚେନ୍ନାଇ ଓ କୋଲକତା ଏୟାରପୋର୍ଟକୁ ଆସୁଛନ୍ତି । ତାପରେ ସେମାନେ ବିଜୁ ପଟ୍ଟନାୟକ ବିମାନ ବନ୍ଦରକୁ ଆସୁଛନ୍ତି ।

କିନ୍ତୁ ବିଜୁ ପଟ୍ଟନାୟକ ବିମାନ ବନ୍ଦରକୁ ବିଦେଶରୁ କୌଣସି ସିଧାସଳଖ ବିମାନ ଆସୁନାହିଁ । ଯେଉଁମାନେ ଅନ୍ୟ ରାଜ୍ୟରେ ଓହ୍ଲାଉଛନ୍ତି, ସେମାନଙ୍କ ଭିତରୁ ସମସ୍ତେ ଯେ ଓଡ଼ିଶା ଫେରୁଛନ୍ତି ତାହାର କୌଣସି ଗ୍ୟାରେଣ୍ଟି ନାହିଁ । ତେଣୁ ଏପରି କ୍ଷେତ୍ରରେ ବିଦେଶୀ ଫେରନ୍ତାଙ୍କ ପ୍ରକୃତ ହିସାବ ରଖିବା ସମ୍ଭବ ନୁହେଁ । ଏନେଇ ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ କହିଛନ୍ତି ଯେ ଯେଉଁମାନେ ବିଦେଶରୁ ଆସୁଛନ୍ତି ସେମାନଙ୍କ ଉପରେ ପ୍ରଶାସନ ନଜର ରଖିଛି । ରାଜ୍ୟର ୪୦% ବିଦେଶ ଫେରନ୍ତା ଠାବ ହୋଇପାରୁନାହାନ୍ତି । ଏବେ ସୁଦ୍ଧା ଓମିକ୍ରନ୍ ଚିହ୍ନଟ ରାଷ୍ଟ୍ରରୁ ୮୦୦ରୁ ଅଧିକ ଯାତ୍ରୀ ଓଡ଼ିଶାକୁ ଆସିଛନ୍ତି । ଏୟାର ସୁବିଧା ପୋର୍ଟାଲରେ ସେମାନେ ଭୁଲ୍ ଫୋନ୍ ନମ୍ବର, ଭୁଲ ଠିକଣା ଦେଇଥିବା କାରଣରୁ ସେମାନଙ୍କୁ ଠାବ କରିବା ସମ୍ଭବ ହେଉନି ।

ଏୟାର ସୁବିଧା ପୋର୍ଟାଲରେ ସେଲ୍ଫ ଡିକ୍ଲାରେସନ୍ ବ୍ୟବସ୍ଥା ଥିବାରୁ ଏମିତିକି ଅନେକ ଯାତ୍ରୀ ଅନ୍ୟ ରାଜ୍ୟର ଠିକଣା ମଧ୍ୟ ଦେଉଛନ୍ତି, ଯାହାକି ବିଦେଶ ଫେରନ୍ତାଙ୍କ ଟ୍ରେସିଂରେ ସମସ୍ୟା ସୃଷ୍ଟି କରୁଛି । ସେହିପରି ରାଜ୍ୟରେ ସନ୍ଧୀଗ୍ଧଙ୍କ ଜେନମ୍ ସିକ୍ୱେନ୍ସିଂ ନେଇ ମତ ରଖିଛନ୍ତି ଆଇଏଲଏସ ନିର୍ଦେଶକ ଡକ୍ଟର ଅଜୟ ପରିଡ଼ା । ସେ କହିଛନ୍ତି ଯେ ନଭେମ୍ବର ୨୪ ପରେ ପ୍ରଭାବିତ ଦେଶରୁ ରାଜ୍ୟକୁ ଫେରିଥିବା ୨୪୬ ଜଣ ପଜିଟିଭ ଚିହ୍ନଟ ହୋଇଛନ୍ତି । ସମସ୍ତ ନମୁନା ଜେନମ ସିକ୍ୱେନ୍ସିଂ ଲାଗି ଆଇଏଲଏସକୁ ଆସିଛି ।

ଏହାପୂର୍ବରୁ ନଭେମ୍ବର ମାସରେ ରାଜ୍ୟକୁ ଆସିଥିବା ୧୪୧ ପଜିଟିଭ ନମୁନାର ଜିନମ୍ ସିକ୍ୱେନ୍ସିଂ ହୋଇଥିଲା । ସେସବୁ ନମୁନାରେ ଓମିକ୍ରନ୍ ଚିହ୍ନଟ ହୋଇନାହିଁ । ଏଣେ ଜନସ୍ୱାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର କହିଛନ୍ତି, ଯେହେତୁ ଓମିକ୍ରନ୍ ପାଇଁ ସରକାର ଚିନ୍ତିତ ଅଛନ୍ତି, ଲୋକମାନେ ସହଯୋଗ କରିବା ଦରକାର । ସେମାନେ ସ୍ୱତଃପ୍ରବୃତ୍ତ ଭାବରେ ଆସି ଟେଷ୍ଟ କରାନ୍ତୁ । ଟେଷ୍ଟ ପରେ ଘରେ ରହିବେ । ଭୟ କରିବା ଆବଶ୍ୟକତା ନାହିଁ । ନିଜକୁ ଓ ନିଜ ପରିବାରକୁ ସଂକ୍ରମିତ ନ କରନ୍ତୁ । ଘର ଭିତରେ, ଗାଁରେ, ସମାଜରେ ଯେଭଳି କୋଭିଡ ନ ବ୍ୟାପୁ । ଆକ୍ରାନ୍ତ ଦେଶରୁ ଯେଉଁମାନେ ଆସୁଛନ୍ତି ସେମାନଙ୍କ ପାଇଁ ପ୍ରୋଟୋକଲ ଜାରି ହୋଇଛି । ୭ ଦିନ ସଙ୍ଗରୋଧରେ ରହିଲା ପରେ ଅଷ୍ଟମ ଦିନ ଟେଷ୍ଟ କରାଯିବ । ପଜିଟିଭ ବାହାରିଲେ ଜିନମ ସିକ୍ୱେନ୍ସିଂ କରାଯିବ ।