ସତ୍ୟଶିଖା( ଭୁବନେଶ୍ୱର )୧୪.୦୫.୨୦୨୨ : କୃଷି ପ୍ରଧାନ ରାଜ୍ୟ ଓଡ଼ିଶା। କିନ୍ତୁ ରାଜ୍ୟ ବାହାରୁ ଆସୁଛି ରାଜଧାନୀ ବଜାରର ସବୁ ପରିବା। ରାଜ୍ୟ ସରକାର ଆଳୁ ଉତ୍ପାଦନ ନାଁରେ କୋଟିକୋଟି ଟଙ୍କାର ଯୋଜନା ପ୍ରସ୍ତୁତ କହୁଥିଲେ ମଧ୍ୟ ଆଳୁ ପଶ୍ଚିମବଙ୍ଗ ଏବଂ ଉତ୍ତରପ୍ରଦେଶରୁ ଆସୁଛି। ସେହିଭଳି ପିଆଜ ଓ ଟମାଟୋ ନାସିକ ଏବଂ ରାୟପୁରରୁ, ପୋଟଳ, ଜହ୍ନି, ବାଇଗଣ କୋଲକାତାରୁ, କଖାରୁ ତାମିଲନାଡ଼ୁରୁ, ବିନ୍ସ ରାଞ୍ଚିରୁ ଆସୁଛି। ବର୍ତ୍ତମାନ ଆପଣ ବଜାରରୁ ଯେକୌଣସି ପରିବା ଉଠାଇ ଦେଖନ୍ତୁ, ବିକ୍ରେତାଙ୍କୁ ପଚାରିଲେ ସେମାନେ କହିଦେବେ ରାଜ୍ୟ ବାହାରର କେଉଁ ସହରରୁ ଆସିଛି। ପରନିର୍ଭରଶୀଳତା ଯୋଗୁଁ ପ୍ରଥମେ ଲେମ୍ବୁ ଏବଂ ବର୍ତ୍ତମାନ ଟମାଟୋ ଦର ୧୦୦ ଟଙ୍କା ପାର୍ କରିଛି। ଅନ୍ୟ ପରିବା ଦର ମଧ୍ୟ ବାକି ସମୟ ଅପେକ୍ଷା ବୃଦ୍ଧି ପାଇଛି। ପରନିର୍ଭରଶୀଳତା ଯୋଗୁଁ ପେଟ୍ରୋଲ, ଡିଜେଲ ଦର ବୃଦ୍ଧିର ସିଧାସଳଖ ପ୍ରଭାବ ପରିବା ଉପରେ ପଡ଼ୁଛି। ଯେଉଁ ପରିବା ଯେତେ ଦୂରରୁ ଆସୁଛି, ତା’ର ଦର ସେତେ ଅଧିକ ରହୁଛି। ଦ୍ବିତୀୟତଃ ପରିବା ଦର ନିର୍ଧାରଣ ବ୍ୟବସାୟୀଙ୍କ ନିୟନ୍ତ୍ରଣକୁ ଚାଲିଯାଉଛି। ଅନେକ ସମୟରେ ଜାଣିଶୁଣି ଆମଦାନି ହ୍ରାସ କରାଯାଇ କୃତ୍ରିମ ଅଭାବ ସୃଷ୍ଟି କରାଯାଉଛି ଏବଂ ମାତ୍ରାଧିକ ଟଙ୍କା ଗ୍ରାହକଙ୍କ ଠାରୁ ସଂଗ୍ରହ ହେଉଛି।
