ନ୍ୟୁଜ୍ରାଜ୍ୟଶିକ୍ଷା

୨୧ରୁ ଏକାଦଶ, ୨୫ ରୁ ଅଷ୍ଟମ ପିଲା ଯିବେ ସ୍କୁଲ୍

ସତ୍ୟଶିଖା(ଭୁବନେଶ୍ୱର )୧୬.୧୦ .୨୦୨୧: ଆସନ୍ତା ୨୧ ତାରିଖରୁ ଯୁକ୍ତ ଦୁଇ ପ୍ରଥମ ବର୍ଷ(ଏକାଦଶ) ଏବଂ ୨୫ ତାରିଖରୁ ଅଷ୍ଟମ ଶ୍ରେଣୀ ପିଲାଙ୍କ ପାଇଁ ଖୋଲିବ ସ୍କୁଲ । ସକାଳ ୧୦ଟାରୁ ଅପରାହ୍ନ ୧.୩୦ ମିନିଟ୍ ପର୍ଯ୍ୟନ୍ତ ଏକାଦଶ ଶ୍ରେଣୀ କ୍ଲାସ୍ ଚାଲିବ । ସେହିଭଳି ସକାଳ ୯ଟାରୁ ଅପରାହ୍ନ ୧୨.୩୦ ମିନିଟ୍ ପର୍ଯ୍ୟନ୍ତ ଚାଲିବ ଅଷ୍ଟମ ପିଲାଙ୍କ କ୍ଲାସ୍ । ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଆଜି ଏହାର ବିଜ୍ଞପ୍ତି ପ୍ରକାଶ ପାଇଛି ।

କରୋନା ପାଇଁ ସ୍କୁଲ ବନ୍ଦ ଥିବାରୁ ବର୍ଷକ ପରେ ଅଷ୍ଟମ ଶ୍ରେଣୀ ପିଲାମାନେ ଶ୍ରେଣୀଗୃହକୁ ଫେରିବେ । ସେହିଭଳି ମାଟ୍ରିକ୍ ପାସ୍ କରି କଲେଜରେ ନାମ ଲେଖାଇଥିବା ଛାତ୍ରଛାତ୍ରୀମାନେ ପ୍ରଥମ ଥର ପାଇଁ ଶ୍ରେଣୀଗୃହରେ ପ୍ରବେଶ କରିବେ । ପୂର୍ବରୁ ନବମ, ଦଶମ ଓ ଦ୍ୱାଦଶ ଶ୍ରେଣୀ ପିଲାଙ୍କ ପାଇଁ ସ୍କୁଲ, କଲେଜ ଖୋଲିସାରିଛି ।

ଅଷ୍ଟମ ଓ ଏକାଦଶ ପିଲାଙ୍କ ପାଇଁ ଅଫଲାଇନ କ୍ଲାସ୍ ର ସୁଯୋଗ ଦିଆଯାଇଥିଲେ ମଧ୍ୟ ଅନଲାଇନ୍ କ୍ଲାସ ବନ୍ଦ ହେବ ନାହିଁ । ଛାତ୍ରଛାତ୍ରୀମାନେ ଚାହିଁଲେ ପୂର୍ବଭଳି ଅନଲାଇନ୍ କ୍ଲାସ୍ କରିପାରିବେ । ଅଫଲାଇନ୍ କ୍ଲାସ୍ କରିବାକୁ ଚାହୁଁଥିବା ଛାତ୍ରଛାତ୍ରୀମାନେ ବାପାମାଆ କିମ୍ବା ଅଭିଭାବକମାନଙ୍କଠାରୁ ଅନୁମତିପତ୍ର ଆଣି ସ୍କୁଲ ଆସିପାରିବେ ।

ଅଷ୍ଟମ ଓ ଏକାଦଶ ପିଲାଙ୍କ ପାଇଁ ଉଦ୍ଦିଷ୍ଟ ହଷ୍ଟେଲଗୁଡ଼ିକ ମଧ୍ୟ ସ୍କୁଲ ସାଙ୍ଗରେ ଖୋଲିବ । ତେବେ ହଷ୍ଟେଲ୍ ରେ ରହିବା ପାଇଁ ଆଗ୍ରହୀ ଛାତ୍ରଛାତ୍ରୀମାନେ ସେମାନଙ୍କ ଘରୁ ଅନୁମତି ଆଣିବାକୁ ପଡ଼ିବ । ବିନା ଅନୁମତିରେ ସେମାନଙ୍କୁ ହଷ୍ଟେଲ୍ ରେ ରହିବାକୁ ଦିଆଯିବ ନାହିଁ । ସ୍କୁଲରେ ଅଷ୍ଟମ ପିଲାଙ୍କୁ ମଧ୍ୟାହ୍ନ ଭୋଜନ ବଦଳରେ ଡ୍ରାଏ ରାସନ ଦିଆଯିବ ।

ସ୍କୁଲ ଖୋଲିବା ପରେ ଛାତ୍ରଛାତ୍ରୀଙ୍କ ଗହଳି ହେବ । ତେଣୁ ସ୍କୁଲ ପରିସର ପରିଷ୍କାର ପରିଚ୍ଛନ୍ନ ଏବଂ ଶ୍ରେଣୀଗୃହର ଉତ୍ତମ ପରିଚାଳନା ପାଇଁ ଗଣଶିକ୍ଷା ବିଭାଗ ପକ୍ଷରୁ ଏକ ନିଦେ୍ର୍ଦଶାବଳୀ ବା ଏସଓପି ଜାରି କରାଯାଇଛି । କୋଭିଡ୍ ନିୟମ ଅନୁପାଳନରେ ଯେଭଳି କୌଣସି ଢ଼ିଲା ନହୁଏ ସେଥିପ୍ରତି ସଜାଗ କରାଯାଇଛି । ଏସଓପିର କଡ଼ାକଡ଼ି ଅନୁପାଳନ ଲାଗି ଆସନ୍ତାକାଲି ସବୁ ଜିଲ୍ଲା ଓ ବ୍ଲକ୍ ଶିକ୍ଷାଧିକାରୀଙ୍କ ଭର୍ଚୁଆଲ୍ ବୈଠକ ଡକାଯାଇଛି ।

ପ୍ରଥମରୁ ସପ୍ତମ ଶ୍ରେଣୀ ପିଲାଙ୍କ ପାଇଁ ଅନଲାଇନ୍ କ୍ଲାସ୍ ଜାରି ରହିବ । ତେବେ କରୋନା ପରିସ୍ଥିତିକୁ ଦେଖି ପର୍ଯ୍ୟାୟକ୍ରମେ ସେମାନଙ୍କର ଅଫଲାଇନ୍ କ୍ଲାସ୍ ସମ୍ପର୍କରେ ବିଚାର କରାଯିବ ବୋଲି ବିଭାଗୀୟ ମନ୍ତ୍ରୀ ସମୀର ଦାଶ କହିଛନ୍ତି ।

Show More
Back to top button