ସତ୍ୟଶିକ୍ଷା (ନୂଆଦିଲ୍ଲୀ) ୨୩.୦୯.୨୦୨୦ : ସନରାଇଜର୍ସ ହାଇଦ୍ରାବାଦ ପାଇଁ ବଡ ଝଟକା । ଅଲରାଉଣ୍ଡର ମିଚେଲ ମାର୍ଶ ଆଇପିଏଲ ୨୦୨୦ରୁ ବାହାର ହୋଇ ଯାଇଛନ୍ତି । କ୍ରିକେଟ୍ ଅଷ୍ଟ୍ରେଲିଆ ବୁଧବାର ଏହାର ସୂଚନା ଦେଇଛି । ସନରାଇଜର୍ସ ହାଇଦ୍ରାବାଦ ତରଫରୁ ଖେଳୁଥିବା ଅଷ୍ଟ୍ରେଲିଆ ଅଲରାଉଣ୍ଡର ମିଚେଲ ମାର୍ଶ ସେପ୍ଟେମ୍ବର ୨୧ରେ ଦୁବାଇରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ(ଆରସିବି) ବିରୋଧ ମ୍ୟାଚ୍ରେ ବୋଲିଂ ସମୟରେ ପାଦ ଗଣ୍ଠିରେ ଆଘାତ ଲାଗିଥିଲା ।
ଆରସିବି ଇନିଂସର ପଞ୍ଚମ ଓଭର ବୋଲିଂ କରୁଥିବା ବେଳେ ୨୮ ବର୍ଷୀୟ ଏହି ବୋଲରଙ୍କ ପାଦ ଗୋଇଠି ମୋଡି ହୋଇ ଯାଇଥିଲା । ଏହା ପରେ ଅତି କଷ୍ଟରେ ସେ ପଡିଆ ବାହାରକୁ ଯାଇଥିଲେ । ବିଜୟ ଶଙ୍କର ତାଙ୍କ ଓଭରର ବାକି ୨ଟି ବଲ ବୋଲିଂ କରି ୯ ରନ ଦେଇଥିଲେ । କେବଳ ଚାରୋଟି ବଲ୍ ବୋଲିଂ କରିଥିବା ମିଚେଲ ମାର୍ଶ ଏହା ପୂର୍ବରୁ ମଧ୍ୟ ଅନେକ ଥର ଆହତ ହୋଇଛନ୍ତି । ଆରସିବି ଇନିଂସର ବାକି ଓଭର ଦେବା ପାଇଁ ମଧ୍ୟ ମାର୍ଶ ପଡିଆକୁ ଓହ୍ଲାଇନଥିଲେ ।
ଏହା ପରେ ମାର୍ଶ ଦଶମ ନମ୍ବରରେ ବ୍ୟାଟିଂ କରିବାକୁ ଆସିଥିଲେ । ହେଲେ ତାଙ୍କଠାରେ ଯନ୍ତ୍ରଣା ସ୍ପଷ୍ଟ ଭାବେ ବାରି ହୋଇ ପଡିଥିଲା । ପୂର୍ବରୁ ଅନୁମାନ କରାଯାଉଥିଲା ଯେ, ମାର୍ଶ ଆହତ କାରଣରୁ ଟୂର୍ଣ୍ଣାମେଣ୍ଟରୁ ବାଦ୍ ପଡି ପାରନ୍ତି । ଏବେ କ୍ରିକେଟ୍ ଅଷ୍ଟ୍ରେଲିଆ ଏହା ଉପରେ ମୋହର ମାରିଛି । ଏବେ ତାଙ୍କ ସ୍ଥାନରେ ଚୂଡାନ୍ତ ଏକାଦଶରେ ମହମ୍ମଦ ନବିଙ୍କୁ ସ୍ଥାନ ମିଳିପାରେ ।
