ସତ୍ୟଶିଖା (ନୂଆଦିଲ୍ଲୀ) ୧୨/୦୧/୨୦୨୧ : କରୋନା ମହାମାରୀ ପରବର୍ତୀ ସମୟରେ ଅର୍ଥନୀତିରେ ଯେଉଁ ସୁଧାର ଦେଖିବାକୁ ମିଳୁଛି ସେଥିରେ ଘରୋଇ କ୍ଷେତ୍ର ମହତ୍ବପୂର୍ଣ୍ଣ ଭୂମିକା ଗ୍ରହଣ କରିଛି । ଚଳିତ ଆର୍ଥିକ ବର୍ଷର ତୃତୀୟ ତ୍ରୟମାସ (୨୦୨୦ ଅକ୍ଟୋବର-ଡିସେମ୍ବର)ରେ ଦେଶର ମାନୁଫାକ୍ଚରିଂ କ୍ଷେତ୍ରରେ ୨,୭୬,୪୬୮ କୋଟି ଟଙ୍କାର ଘରୋଇ ପୁଞ୍ଜିନିବେଶ ହୋଇଛି । ସେଥିରୁ ୨୦,୨୧୭ କୋଟି ଟଙ୍କା ଓଡ଼ିଶାରେ ନିବେଶ ହୋଇଥିବା ଜଣାପଡ଼ିଛି । ମାନୁଫାକ୍ଚରିଂରେ ଘରୋଇ କ୍ଷେତ୍ରର ନିବେଶ ହାସଲ କରିବାରେ ଓଡ଼ିଶା ପଞ୍ଚମ ସ୍ଥାନରେ ରହିଛି । ମହାରାଷ୍ଟ୍ର ସର୍ବାଧିକ ୫୪,୭୧୪ କୋଟି ଟଙ୍କା, ଆନ୍ଧ୍ରପ୍ରଦେଶ ୨୯,୭୮୪ କୋଟି ଟଙ୍କା, ଗୁଜରାଟ ୨୬,୩୫୦ କୋଟି ଟଙ୍କା ଓ ତାମିଲନାଡୁ ୨୪,୧୨୪ କୋଟି ଟଙ୍କାର ଘରୋଇ ପୁଞ୍ଜିନିବେଶ ହାସଲ କରି ପ୍ରଥମ ଚାରିଟି ସ୍ଥାନରେ ରହିଛନ୍ତି । ଓଡ଼ିଶା ପଛକୁ ଉତ୍ତରପ୍ରଦେଶ, କର୍ଣ୍ଣାଟକ, ତେଲେଙ୍ଗାନା, ପଞ୍ଜାବ ଓ ଛତିଶଗଡ଼ ରହିଛନ୍ତି । ଲକ୍ଡାଉନ୍ କଟକଣା ହଟିବା ପରଠାରୁ ଘରୋଇ କ୍ଷେତ୍ରରେ ପୁଞ୍ଜିନିବେଶ ବଢ଼ିବାରେ ଲାଗିଛି ।
ବିଶେଷ କରି ମାନୁଫାକ୍ଚରିଂରେ ନିବେଶ ବଢ଼ୁଛି । ଏହି କ୍ଷେତ୍ରରେ ନିବେଶ ୨୦୧% ବଢ଼ିଛି । କିନ୍ତୁ ୨୦୨୦ ଅକ୍ଟୋବର-ଡିସେମ୍ବର ତିନି ମାସରେ ସରକାରୀ ବ୍ୟୟ କିନ୍ତୁ ହ୍ରାସ ପାଇଥିଲା । ରାଜସ୍ବ ଚିନ୍ତା ଯୋଗୁଁ ରାଜ୍ୟଗୁଡ଼ିକର ନୂଆ ପ୍ରକଳ୍ପରେ ବ୍ୟୟ ପ୍ରାୟ ୨୫% ହ୍ରାସ ପାଇଥିଲା । ତୃତୀୟ ତ୍ରୟମାସରେ ମୋଟ ୨୦୮୫ ପ୍ରକଳ୍ପ ଘୋଷଣା କରାଯାଇଥିଲା । ମାନୁଫାକ୍ଚରିଂ, ୟୁଟିଲିଟି ଓ ଖଣି କ୍ଷେତ୍ରରେ ନିବେଶ ବଢ଼ିଥିବା ବେଳେ ଜଳସେଚନ ଓ ବିଦ୍ୟୁତ ପ୍ରକଳ୍ପରେ ନିବେଶ ପରିମାଣ ହ୍ରାସ ପାଇଥିବା ଜଣାପଡ଼ିଛି । ନିବେଶ ପ୍ରକଳ୍ପଗୁଡ଼ିକ ଉପରେ ନଜର ରଖୁଥିବା ଘରୋଇ କ୍ଷେତ୍ରର ସଂସ୍ଥା ପ୍ରୋଜେକ୍ଟସ୍ ଟୁଡେ ପକ୍ଷରୁ କୁହାଯାଇଛି ଯେ ସରକାରୀ ସ୍ତରରେ ବିଭିନ୍ନ ପ୍ରକଳ୍ପରେ ନିବେଶ ହ୍ରାସ ପାଇବା ଏକ ଶୁଭସଙ୍କେତ ନୁହେଁ । ଅଳ୍ପ ସମୟ ପାଇଁ ଏହି ସ୍ଥିତି ରହିବ ବୋଲି ଏହାର ସିଇଓ ଶଶିକାନ୍ତ ହେଗ୍ଡେ ଆଶା ପ୍ରକଟ କରିଛନ୍ତି । ଦେଶର ବିଭିନ୍ନ ପ୍ରକଳ୍ପରେ ଦ୍ଵିତୀୟ ତ୍ରୟମାସ ସୁଦ୍ଧା ଘରୋଇ କ୍ଷେତ୍ରର ନିବେଶ ପରିମାଣ ୪୦% ଥିଲା ।
