ସତ୍ୟଶିଖା(ବ୍ରହ୍ମପୁର) ୦୭ .୧୨.୨୦୨୧: ଜଣେ ନାବାଳିକାକୁ ଅପହରଣ ଓ ବଳାତ୍କାର ମାମଲାର ବିଚାର କରି ପୋକ୍ସୋ କୋର୍ଟ ଜଜ୍ ଗୁରୁପ୍ରସାଦ ସାହୁ ଆଜି ଅଭିଯୁକ୍ତଙ୍କୁ ୧୦ ବର୍ଷ ଜେଲ୍ ଦଣ୍ଡର ଶୁଣାଣି କରିଛନ୍ତି । ଏହାସହ ୧୩ ହଜାର ଟଙ୍କା ଜୋରିମାନା ଧାର୍ଯ୍ୟ କରିଛନ୍ତି । ସେ ଜୋରିମାନା ଅନାଦେୟ ହେଲେ ଅଧିକ ୧୫ ମାସ କାରାଦଣ୍ଡ ଭୋଗିବାକୁ ଅଦାଲତ ନିର୍ଦ୍ଦେଶ ଦେଇଛନ୍ତି । ଅଭିଯୁକ୍ତ ଜଣଙ୍କ ହେଲେ ଗଞ୍ଜାମ ଜିଲ୍ଲା ଭଞ୍ଜନଗର ଅଞ୍ଚଳର ଅରୁଣ ନାୟକ(୩୪) । ଏହି ମାମଲାରେ ୧୧ଜଣ ସାକ୍ଷୀଙ୍କ ବୟାନକୁ ଆଧାର କରି ସମସ୍ତ ତଥ୍ୟ ପ୍ରମାଣକୁ ନେଇ କୋର୍ଟ ଶୁଣାଣି କରିଥିଲେ । ସରକାରଙ୍କ ପକ୍ଷରୁ ଅତିରିକ୍ତ ପିପି ନରେଶ ପ୍ରସାଦ ପାତ୍ର ମାମଲାର ପରିଚାଳନା କରିଥିଲେ ।
ସୂଚନାଯୋଗ୍ୟ ଯେ, ୨୦୧୪ ଜୁନ୍ ୨୯ ତାରିଖ ଦିନ ୧ଟା ବେଳେ ଅଭିଯୁକ୍ତ ଅରୁଣ ସଂପୃକ୍ତ ନାବାଳିକାଙ୍କୁ ଅପହରଣ କରି ବଳାତ୍କାର କରିଥିଲେ । ଏହି ୧୪ ବର୍ଷୀୟ ନାବାଳିକା ଜଣଙ୍କ ନିଜ ଘରେ ଏକୁଟିଆ ଥିବାର ସୁଯୋଗ ନେଇ ଅଭିଯୁକ୍ତ ଏହି କାରନାମା କରିଥିଲା । ଘଟଣା ସାମ୍ନାକୁ ଆସିବା ପରେ ପୀଡ଼ିତା ନାବାଳିକାଙ୍କ ପକ୍ଷରୁ ଭଞ୍ଜନଗର ଥାନାରେ ଏତଲା ଦିଆଯାଇଥିଲା । ପୁଲିସ ଏକ ମାମଲା ରୁଜୁ କରି ପୋକ୍ସୋ ଆଇନ ଅନୁସାରେ ତଦନ୍ତ ଆରମ୍ଭ କରିବା ସହ ଅଭିଯୁକ୍ତ ଅରୁଣକୁ ଗିରଫ କରି ଅଦାଲତ ଚାଲାଣ କରିଥିଲା । କିଛିବର୍ଷ କାରାଗାରରେ ରହିବା ପରେ ଅଭିଯୁକ୍ତ ଅରୁଣ ସର୍ତ୍ତମୂଳକ ଜାମିନରେ ମୁକୁଳିଥିଲେ ।
