ରେୱା: ନାଏକ ଦୀପକ କୁମାର ସିଂହ ତାଙ୍କ ଜେଜେ ମା’ଙ୍କୁ କିଛି ଦିନ ତଳେ ଫୋନ କରିଥିଲେ। କହିଥିଲେ, ମା’ ତୁ ବ୍ୟସ୍ତ ହଅନା। ଲକଡାଉନ ସରିବା କ୍ଷଣି ମୁଁ ଘରକୁ ଫେରିବି। ତେବେ ଏକଥା କହିବା ବେଳେ ନାଏକ ଦୀପକ କୁମାର ଜାଣି ନଥିଲେ ଯେ ସେ ଶେଷଥର ପାଇଁ ତାଙ୍କ ପରିବାର ଲୋକଙ୍କ ସହ କଥା ହେଉଛନ୍ତି।
କାରଣ ଏହି ଫୋନ କଲ୍ ପରେ ଦେଶ ପାଇଁ ଚାଇନା ସହ ସଂଘର୍ଷ କରି ସବୁଦିନ ପାଇଁ ସହିଦ ହୋଇଯାଇଛନ୍ତି ନାଏକ ଦୀପକ କୁମାର। ମାତ୍ର ୭ ମାସ ତଳେ ଦୀପକ କୁମାର ବିବାହ କରିଥିଲେ। ସୋମବାର ଚାଇନା ସହ ଗଲୱାନ ଭ୍ୟାଲିରେ ହୋଇଥିବା ସଂଘର୍ଷରେ ଦୀପକ କୁମାର ମଧ୍ୟ ରହିଥିଲେ। ଚାଇନା ସେନାର ଆକ୍ରମଣରେ ସେ ପ୍ରାଣ ହରାଇଛନ୍ତି।
ମଧ୍ୟପ୍ରଦେଶର ରେୱା ଜିଲ୍ଲା ମୁଖ୍ୟାଳୟ ଠାରୁ ୪୦ କିମି ଦୂରରେ ୩୦ ବର୍ଷୀୟ ସହିଦ ଦୀପକ କୁମାରଙ୍କ ଗାଁ। ନାତିର ମୃତ୍ୟୁ ଖବର ଶୁଣି ଜେଜେ ମା’ଙ୍କ ସମେତ ପୂରା ଗାଁ ସ୍ତବ୍ଧ ହୋଇଯାଇଛି। ଦୀପକଙ୍କ ୮୫ ବର୍ଷୀୟ ବୃଦ୍ଧ ଜେଜେ ମା’ ଏବେ ନାତିକୁ ଝୁରିବାରେ ଲାଗିଛନ୍ତି। ସେ ଲୁହ ଝରର ଆଖିରେ କହିଛନ୍ତି ଯେ “ମୁଁ ମାତ୍ର କିଛିଦିନ ତଳେ ତା’ ସହ କଥା ହୋଇଥିଲି। ଲକଡାଉନ ସରିଲେ ସେ ଘରକୁ ଫେରିବ କହିଥିଲା।
ଆହୁରି ପଢ଼ନ୍ତୁ
ଛୁଟି ନେଇ ଆସିବ ଓ ଆମ ସହ ସମୟ କାଟିବ ବୋଲି କଥା ଦେଇଥିଲା। ହେଲେ ଲକଡାଉନ ଶେଷ ହେବା ପୂର୍ବରୁ ହିଁ ସେ ଆମ ସମସ୍ତଙ୍କୁ ସବୁଦିନ ପାଇଁ ଦୁଃଖ ସାଗରରେ ଭସାଇ ଦେଇ ଚାଲିଯାଇଛି।”
ଦୀପକ କୁମାରଙ୍କ ମା’ ବହୁ ବର୍ଷ ପୂର୍ବରୁ ପ୍ରାଣ ହରାଇଥିଲେ। ଜେଜେମା’ ଫୁଲ କୁମାରୀ ହିଁ ତାଙ୍କର ଦେଖାଶୁଣି କରି ବଡ଼ ମଣିଷ କରିଛନ୍ତି। ଦୀପକଙ୍କ ବିଷୟରେ କହିବା ବେଳେ ଫୁଲ କୁମାରୀ ନିଜ ଲୁହକୁ ଅଟକାଇ ପାରୁ ନଥିଲେ। ତଥାପି ସେ ଦୀପକ ଦେଶ ପାଇଁ ପ୍ରାଣବଳୀ ଦେଇଥିବାରୁ ବେଶ ଗର୍ବ ଅନୁଭବ କରିଛନ୍ତି।
ଦୀପକ କୁମାର ସିଂହ ୨୦୧୯ ନଭେମ୍ବର ୩୦ରେ ବିବାହ କରିଥିଲେ। ତାଙ୍କ ପତ୍ନୀ ରେଖା ସିଂହ ମଧ୍ୟପ୍ରଦେଶର ସିରମାଉର ସ୍ଥିତ ନବୋଦୟ ରେସିଡେଣ୍ଟାଲ ସ୍କୁଲରେ କାର୍ଯ୍ୟ କରନ୍ତି। ସେନା ପକ୍ଷରୁ ମଙ୍ଗଳବାର ଦିନ ଦୀପକଙ୍କ ମୃତ୍ୟୁ ସମ୍ପର୍କରେ ପରିବାର ଲୋକଙ୍କୁ ଖବର ଦିଆଯାଇଥିଲା। ସେବେଠାରୁ ପରିବାର ସଦସ୍ୟଙ୍କ ଆଖିରୁ ଲୁହ ଶୁଖିନାହିଁ।
୨୦୧୩ରେ ଆର୍ମିରେ ଯୋଗଦେଇଥିବା ଦୀପକ ବିହାର ରେଜିମେଣ୍ଟ ସହ ଗଲୱାନ ଭ୍ୟାଲିରେ କାର୍ଯ୍ୟ କରୁଥିଲେ। ତାଙ୍କ ବାପା ଗଜରାଜ ସିଂହ ଜଣେ ଚାଷୀ ଓ ବଡ଼ ଭାଇ ପ୍ରକାଶ ଆର୍ମିରେ କାମ କରନ୍ତି।
