ମିଳିତ ଜାତିସଂଘ: ବିଶ୍ୱରେ ରହୁଥିବା ଅଧେ ବା ପ୍ରାୟ ୧୦୦ କୋଟି ପିଲା ମାନସିକ ଓ ଯୌନ ହିଂସାର ଶିକାର ହେଉଛନ୍ତି। ନିର୍ଯାତନା ପାଇଁ ଆହତ ହେଉଛନ୍ତି। ଏପରି କି ପ୍ରାଣ ମଧ୍ୟ ହରାଉଛନ୍ତି। ବିଭିନ୍ନ ଦେଶର ସରକାରମାନେ ପିଲାମାନଙ୍କ ସୁରକ୍ଷା ପାଇଁ ପ୍ରସ୍ତୁତ କରିଥିବା ଯୋଜନାକୁ କାର୍ଯ୍ୟକାରୀ କରୁ ନଥିବାରୁ ଏଭଳି ଘଟଣା ଘଟୁଛି।
ପିଲାମାନଙ୍କ ବିରୋଧରେ ହେଉଥିବା ହିଂସା ନେଇ ବିଶ୍ୱର ଷ୍ଟାଟସ ରିପୋର୍ଟ ୨୦୨୦ରେ ଏ ବିଷୟରେ କୁହାଯାଇଛି। ୧୫୫ଟି ଦେଶରେ ଘଟୁଥିବା ଘଟଣାକୁ ସମୀକ୍ଷା କରି ଏହି ରିପୋର୍ଟ ପ୍ରସ୍ତୁତ କରାଯାଇଛି। ଜାତିସଂଘରେ ଏହି ରିପୋର୍ଟ ଉପସ୍ଥାପନ କରାଯିବା ପରେ ପୂରା ତଥ୍ୟ ସାମ୍ନାକୁ ଆସିଛି।
୧୫୫ଟି ଦେଶରୁ ୮୮% ରାଷ୍ଟ୍ର ପିଲାଙ୍କ ବିରୋଧରେ ହେଉଥିବା ହିଂସାକାଣ୍ଡକୁ ରୋକିବା ପାଇଁ ସ୍ୱତନ୍ତ୍ର ଆଇନ ପ୍ରଣୟନ କରିଛନ୍ତି। ତେବେ ଏହା ମଧ୍ୟରୁ କେବଳ ୪୭% ରାଷ୍ଟ୍ର ଏହାକୁ ଦୃଢ଼ ଭାବେ କାର୍ଯ୍ୟକାରୀ କରୁଥିବା ସ୍ୱୀକାର କରିଛନ୍ତି। ୧୮ ବର୍ଷ ବୟସର କମ ପିଲାଙ୍କ ପ୍ରତି ବିଶ୍ୱରେ ନିର୍ଯାତନା ବଢ଼ୁଥିବାରୁ ସମସ୍ତେ ଚିନ୍ତା ପ୍ରକଟ କରିଛନ୍ତି।
ଆହୁରି ପଢ଼ନ୍ତୁ
୨୦୧୭ରେ ବିଶ୍ୱର ପ୍ରାୟ ୪୦ ହଜାର ପିଲା ହତ୍ୟାର ଶିକାର ହୋଇଛନ୍ତି। ୟୁନିସେଫର କାର୍ଯ୍ୟନିର୍ବାହୀ ନିର୍ଦ୍ଦେଶକ କହିଛନ୍ତି, “ପୂର୍ବରୁ ବି ଛୋଟ ପିଲାଙ୍କ ବିରୋଧରେ ହିଂସାକାଣ୍ଡ ଘଟୁଥିଲା। ହେଲେ ଏବେ ଏହା ଅଧିକ ଜଟିଳ ହୋଇଯାଇଛି। ଲକଡାଉନ, ସ୍କୁଲ ବନ୍ଦ ଓ ଗମନାଗମନରେ ରୋକ ଲାଗିଥିବାରୁ ପିଲାମାନେ ଏବେ ସେମାନଙ୍କୁ ନିର୍ଯାତନା ଦେଉଥିବା ଲୋକଙ୍କ ପାଖରେ ଫସି ରହିଛନ୍ତି।
ତେଣୁ ପିଲାମାନଙ୍କୁ ଏହି ସମୟରେ ସୁରକ୍ଷା ଯୋଗାଇବା ହିଁ ପ୍ରାଥମିକତା ହେବା ଦରକାର। ଏଥିପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ପଡ଼ିବ ବୋଲି ସେ କହିଛନ୍ତି।
୮୩% ଦେଶରେ ପିଲାମାନଙ୍କ ଉପରେ ହୋଇଥିବା ନିର୍ଯାତନାର ତଥ୍ୟ ରହିଛି। ତେବେ ଏମାନଙ୍କ ମଧ୍ୟରୁ ମାତ୍ର ୨୧% ଦେଶ କେବଳ ତଥ୍ୟକୁ ଦେଖି ଏହାର ମୁକାବିଲା କରିବାକୁ ରଣନୀତି ପ୍ରସ୍ତୁତ କରୁଛନ୍ତି। ୮୦% ଦେଶ ବିଭିନ୍ନ ଯୋଜନା ପ୍ରଣୟନ କରିଥିଲେ ହେଁ ଏହାର କାର୍ଯ୍ୟକାରିତା ବେଶ ନିରୁତ୍ସାହିତ।
