ନୂଆଦିଲ୍ଲୀ: ବ୍ୟବସାୟିକ ଲକ୍ଷ୍ୟ ରଖି ଖଣି ନିଲାମ ପ୍ରକ୍ରିୟା ଆରମ୍ଭ ହେବା ଅବସରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଉଦବୋଧନ ଦେଇଛି। ପୂର୍ବରୁ ବିଭିନ୍ନ କମ୍ପାନୀ ନିଜର ଆବଶ୍ୟକତା ଅନୁଯାୟୀ ଖଣି ଉତ୍ତୋଳନ କରୁଥିଲେ। ହେଲେ ଏବେ କମ୍ପାନୀଗୁଡ଼ିକ ଖଣିର ରପ୍ତାନୀ ପାଇଁ ଏହାକୁ ଉତ୍ତୋଳନ କରିପାରିବେ। ଏହା ଉପରେ କୌଣସି ପ୍ରକାରର ପ୍ରତିବନ୍ଧକ ରହିବନାହିଁ।
ବ୍ୟବସାୟିକ ନିଲାମୀ ପ୍ରକ୍ରିୟାରେ ପ୍ରାୟ ୪୧ଟି ଖଣିକୁ ବିଭିନ୍ନ କମ୍ପାନୀକୁ ଦିଆଯିବ। ଏହି ପ୍ରକ୍ରିୟାରେ ଉଭୟ ଘରୋଇ ଓ ବିଦେଶୀ କମ୍ପାନୀ ସାମିଲ ହୋଇପାରିବେ। ଶତପ୍ରତିଶତ ଏଫଡିଆକୁ ବି ଏଥିରେ ସୁଯୋଗ ମିଳିଛି। ଏଭଳି ବ୍ୟବସ୍ଥା ଦ୍ୱାରା ଅର୍ଥନୀତିକ ସ୍ତରରେ ଭାରତ ସୁଦୃଢ଼ ହୋଇପାରିବ ଓ ଆତ୍ମନିର୍ଭର ହୋଇପାରିବ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି।
ଆଜି ମୋଦି କହିଛନ୍ତି, “କରୋନା ସଙ୍କଟ ଆମକୁ ଆତ୍ମନିର୍ଭରଶୀଳ ହେବାକୁ ଶିକ୍ଷା ଦେଇଛି। ଆମକୁ ଏହି ସଙ୍କଟମୟ ସ୍ଥିତିର ଫାଇନା ଉଠାଇବାକୁ ପଡ଼ିଛି। ସଙ୍କଟରୁ ସୁଯୋଗ ସୃଷ୍ଟି କରିବା ପାଇଁ କାର୍ଯ୍ୟ କରିବା ଦରକାର। ଶକ୍ତି କ୍ଷେତ୍ରରେ ସ୍ୱାବଲମ୍ବୀ ହେବାକୁ ଆଜି ବଡ଼ ପଦକ୍ଷେପ ନିଆଯାଇଛି।
ଆମଦାନୀ ହ୍ରାସ, ରପ୍ତାନୀ ବୃଦ୍ଧି କରିବା ଭାରତର ମୂଳ ଲକ୍ଷ୍ୟ। କୋଇଲା କ୍ଷେତ୍ରରେ ସଂସ୍କାର ଅନ୍ୟ ଶିଳ୍ପକୁ ସୁଯୋଗ ଦେବ। ଆଲୁମିନିୟମ,ସାର, ଇସ୍ପାତ କ୍ଷେତ୍ରକୁ ଏଥିପାଇଁ ଅଧିକ ସୁଯୋଗ ମିଳିବ। ୨୦୩୦ ମଧ୍ୟରେ ଶହେ ମିଲିୟନ ଟନ୍ କୋଇଲାକୁ ଗ୍ୟାସରେ ପରିଣତ କରିବାକୁ ଲକ୍ଷ୍ୟ ରଖାଯାଇଛି। ଏଥିପାଇଁ ୪ଟି ପ୍ରକଳ୍ପ ଚିହ୍ନଟ କରାଯାଇଛି ଓ ପ୍ରାୟ ୨୦ ହଜାର କୋଟି ଟଙ୍କା ନିବେଶ କରାଯିବ।
ଆହୁରି ପଢ଼ନ୍ତୁ
କୋଇଲା ଖଣି ନିଲାମ ସମସ୍ତଙ୍କ ପାଇଁ ଭଲ ଖବର ଆଣିବ। ଏଥିରେ ସମସ୍ତଙ୍କର ଫାଇଦା ହେବ। ଦେଶର ରାଜସ୍ୱ ମଧ୍ୟ ବୃଦ୍ଧି ପାଇବ। ପୂର୍ବ ଏବଂ କେନ୍ଦ୍ର ଭାରତର ବିକାଶ ପାଇଁ ଏହା ବଡ଼ ମାଧ୍ୟମ ହେବ। ଦେଶରେ ୧୬ଟି ଆକାଂକ୍ଷୀ ଜିଲ୍ଲାରେ ବଡ଼ କୋଇଲା ଖଣି ରହିଛି। କିନ୍ତୁ କୋଇଲା ଖଣି ଥିବା ସତ୍ତ୍ୱେ ସେଠିକା ଲୋକ ଲାଭ ପାଉନାହାନ୍ତି। ନିଜ ବୁଢ଼ା ବାପାମା’ଙ୍କୁ ଛାଡ଼ି ସ୍ଥାନୀୟ ଲୋକମାନେ ଦୂରକୁ ଖଟିବାକୁ ଯାଉଛନ୍ତି।
ଏଥିରେ ଏବେ ପରିବର୍ତ୍ତନ ହେବ। ସ୍ଥାନୀୟ ଲୋକଙ୍କୁ ନିଜ ଅଞ୍ଚଳରେ ହିଁ କାମ ମିଳିବ। କୋଇଲା ଖଣି ଥିବା ଅଞ୍ଚଳର ବିକାଶ ପାଇଁ ୫୦ ହଜାର କୋଟି ଖର୍ଚ୍ଚ ହେବ। ଭାରତକୁ ଆତ୍ମନିର୍ଭର ଭାବେ ଗଢ଼ି ତୋଳିବାକୁ ଲକ୍ଷ୍ୟ ରଖାଯାଇଛି। ଏଥିରେ ଆମେ ନିଶ୍ଚିତ ସଫଳ ହେବା।
ଏହି ଆତ୍ମନିର୍ଭର ଯୋଜନା ଅନୁଯାୟୀ, ଭାରତ ଖୁବଶୀଘ୍ର ବିଦେଶକୁ ଗୁରୁତ୍ୱପୂର୍ଣ୍ଣ ଓ ଜରୁରୀ ମେଡିକାଲ ସାମଗ୍ରୀ ରପ୍ତାନୀ କରିବ। ଭାରତର ଭାଗ୍ୟ ବଦଳାଇବାକୁ ସୁଯୋଗ ରହିଛି ଓ ଏହାକୁ ଆମେ ହାତଛଡ଼ା କରିବା ନାହିଁ। ଉଦ୍ୟୋଗ ଜଗତକୁ କଥା ଦେଉଛି, ମୁଁ ଆପଣମାନଙ୍କ ସହ ଅଛି। ଦେଶର ବିକାଶ ପାଇଁ ଆପଣ ୨ ପାଦ ଚାଲନ୍ତୁ, ମୁଁ ୪ ପାଦ ଚାଲିବି।”
ସୂଚନା ଅନୁଯାୟୀ, ଏଭଳି ବ୍ୟବସାୟକି ଖଣି ଉତ୍ତୋଳନ ନିଲାମ ପ୍ରକ୍ରିୟା ଯୋଗୁ ୫ରୁ ୭ ବର୍ଷ ମଧ୍ୟରେ ପ୍ରାୟ ୩୩,୦୦୦ କୋଟିର କ୍ୟାପିଟାଲ ଇନଭେଷ୍ଟମେଣ୍ଟ ହୋଇପାରିବ। ସେହିପରି ରାଜ୍ୟଗୁଡ଼ିକ ବାର୍ଷିକ ୨୦ ହଜାର କୋଟିରୁ ଅଧିକ ରାଜସ୍ୱ ପାଇବେ।
