ସେପ୍ଟେମ୍ବର-ଅକ୍ଟୋବରରେ ଆଇପିଏଲ! ଜାଣନ୍ତୁ କେମିତି ହେବ ମ୍ୟାଚ୍

ମୁମ୍ବାଇ: କ୍ରିକେଟ ପ୍ରେମୀଙ୍କ ପାଇଁ ବଡ଼ ଆଶ୍ୱସ୍ତ କରିବା ଭଳି ଖବର ସାମ୍ନାକୁ ଆସିଛି। କରୋନା ମହାମାରୀ ଯୋଗୁ ସ୍ଥଗିତ ରହିଥିବା ଆଇପିଏଲର ୧୩ତମ ସଂସ୍କରଣ ଅନୁଷ୍ଠିତ ହେବା ନେଇ ବାଟ ପିଟିଛି। ଆସନ୍ତା ସେପ୍ଟେମ୍ବର-ଅକ୍ଟୋବରରେ ଭାରତରେ ଆଇପିଏଲ ଖେଳାଯିବ ବୋଲି ସୂଚନା ମିଳିଛି।

ଆଇପିଏଲ ଗଭର୍ଣ୍ଣିଂ କାଉନସିଲର ଅଧ୍ୟକ୍ଷ ବ୍ରିଜେଶ ପଟେଲ କହିଛନ୍ତି, ଆମେ ସେପ୍ଟେମ୍ବର-ଅକ୍ଟୋବରେ ଆଇପିଏଲର ମ୍ୟାଚ୍‌ ଗୁଡ଼ିକ ଆରମ୍ଭ କରିବାକୁ ଲକ୍ଷ୍ୟ ରଖିଛୁ। ହେଲେ ଏହାପୂର୍ବରୁ ଆଇସିସି ଟି-୨୦ ବିଶ୍ୱକପ ଉପରେ କ’ଣ ନିଷ୍ପତ୍ତି ନେଉଛି, ତା’ ଉପରେ ନଜର ରଖିଛୁ।

ଆଇସିସି ଟି-୨୦ ବିଶ୍ୱକପକୁ ସ୍ଥଗିତ ରଖିବା କଥା ଘୋଷଣା କରିବା କ୍ଷଣି ଆମେ ଆଇପିଏଲ ପାଇଁ ପ୍ରସ୍ତୁତି ଆରମ୍ଭ କରିବୁ। ଆମର ଆଶା ଖୁବଶୀଘ୍ର ଆଇସିସି ଅଷ୍ଟ୍ରେଲିଆରେ ହେବାକୁ ଥିବା ଟି-୨୦ ବିଶ୍ୱକପ ଚଳିତ ବର୍ଷ ହେବ କି ନାହିଁ ସେ ସମ୍ପର୍କରେ ଘୋଷଣା କରିବ। ଆମ କଥା ବିଚାରକୁ ନେଲେ ଆମେ ସେପ୍ଟେମ୍ବର-ଅକ୍ଟୋବରେ ଆଇପିଏଲ କରିବାକୁ ସକ୍ଷମ ରହିଛୁ ବୋଲି ସେ କହିଛନ୍ତି।

ଅନ୍ୟପକ୍ଷରେ ବିସିସିଆଇ ବସ୍ ସୌରଭ ଗାଙ୍ଗୁଲି କହିଛନ୍ତି,“ଆଇପିଏ ଆରମ୍ଭ କରିବାକୁ ବୋର୍ଡ ସବୁ ପ୍ରକାରର ବିକଳ୍ପକୁ ବ୍ୟବହାର କରୁଛି। ଦରକାର ପଡ଼ିଲେ ଖାଲି ଷ୍ଟାଡିୟମରେ ବି ମ୍ୟାଚ୍‌ ଅନୁଷ୍ଠିତ ହେବ। ଫ୍ୟାନଙ୍କ ଠାରୁ ଆରମ୍ଭ କରି ବିଭିନ୍ନ ଟିମ୍‌ର ମାଲିକ ଓ ଖେଳାଳିମାନେ ଚଳିତ ବର୍ଷ ଆଇପିଏଲ ହେବ ବୋଲି ଆଶା ବାନ୍ଧି ବସିଛନ୍ତି।

କେବଳ ଭାରତୀୟମାନେ ନୁହନ୍ତି ବିଦେଶୀ ଖେଳାଳି ବି ଆଇପିଏଲ ଆରମ୍ଭ ହେବା ସପକ୍ଷରେ କହିଛନ୍ତି। ତେଣୁ ବିସିସିଆଇ ଖୁବଶୀଘ୍ର ଏହା ଉପରେ ନିଷ୍ପତ୍ତି ନେବ।”

ଚଳିତ ବର୍ଷ ଆଇପିଏଲର ୧୩ତମ ସଂସ୍କରଣ ମାର୍ଚ୍ଚ ୨୯ରେ ଆରମ୍ଭ ହୋଇଥାଆନ୍ତା। କିନ୍ତୁ କରୋନା ସଙ୍କଟ ପାଇଁ ଏହାକୁ ସ୍ଥଗିତ ରଖାଯାଇଛି।