ଭୁବନେଶ୍ୱର: ରାଜଧାନୀ ଭୁବନେଶ୍ୱର ମାଷ୍ଟର କ୍ୟାଣ୍ଟିନ ଠାରେ ଥିବା ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନବି) ବ୍ରାଞ୍ଚରେ ୩୨ କୋଟି ଟଙ୍କାର ଋଣ ଜାଲିଆତି ଘଟଣାର ତଦନ୍ତ ଆରମ୍ଭ କରି ସିବିଆଇ। ୨୦୧୦ରୁ ୨୦୧୫ ମଧ୍ୟରେ ଏଭଳି ଋଣ ହେରଫେର କରାଯାଇଛି। ଏହି ଘଟଣାରେ ସିବିଆଇ ୯ ଜଣଙ୍କ ନାଁରେ ମାମଲା ରୁଜୁ କରିଛି। ୯ ଜଣଙ୍କ ମଧ୍ୟରେ ବ୍ରାଞ୍ଚର ୪ ଜଣ ପୂର୍ବତନ ବରିଷ୍ଠ ଅଧିକାରୀଙ୍କ ନାଁ ରହିଛି। ଋଣ ଜାଲିଆତି ନେଇ ପିଏନବି ଅଭିଯୋଗ କରିବା ପରେ ସିବିଆଇ ଆକ୍ସନ ମୋଡକୁ ଆସିଛି।
ଆହୁରି ପଢ଼ନ୍ତୁ
ସିବିଆଇ ପକ୍ଷରୁ ଅଭିଯୁକ୍ତମାନଙ୍କ ଅଫିସିଆଲ ଓ ଘରୋଇ ବାସଭବନରେ ଚଢ଼ଉ କରାଯାଇଥିଲା। ଭୁବନେଶ୍ୱର, କଟକ, ବିଶାଖାପଟନମ,କୋଲକାତା ଓ ଜମ୍ମୁରେ ରେଡ କରାଯାଇଛି। ସିବିଆଇ କହିଛି ଯେ ବ୍ରାଞ୍ଚର ୪ ଜଣ ପୂର୍ବତନ ଅଧିକାରୀଙ୍କୁ ଭୁବନେଶ୍ୱରରେ ଥିବା ଏକ କମ୍ପାନୀ ପ୍ରଲୋଭିତ କରିଥିଲା। ଏହାପରେ ବେଆଇନ ଭାବେ ଋଣ ଦିଆଯାଇଥିଲା।
ଏହି ଘଟଣାରେ ବ୍ରାଞ୍ଚର ପୂର୍ବତନ ମୁଖ୍ୟ ମ୍ୟାନେଜର, ପୂର୍ବତନ ଆସିସଷ୍ଟାଣ୍ଟ ଜେନେରାଲ ମ୍ୟାନେଜର, ପୂର୍ବତନ ମୁଖ୍ୟ ମ୍ୟାନେଜର ଓ ପୂର୍ବତନ ବରିଷ୍ଠ ମ୍ୟାନେଜରଙ୍କ ନାଁରେ ମାମଲା ରୁଜୁ ହୋଇଛି। ଏହାବାଦ ଘରୋଇ କମ୍ପାନୀ ଓ ଏହାର ୪ ଜଣ କର୍ମକର୍ତ୍ତାଙ୍କ ନାଁରେ ବି ମାମଲା ହୋଇଛି।
