ସିଏଏ ବିରୋଧୀ ଆନ୍ଦୋଳନର ଆୟୋଜକଙ୍କୁ କରୋନା

ନୂଆଦିଲ୍ଲୀ: ଦିଲ୍ଲୀରେ ସିଏଏ ବିରୋଧରେ ଆନ୍ଦୋଳନ ଆୟୋଜନ କରିଥିବା ଜଣେ ବ୍ୟକ୍ତି କରୋନା ଆକ୍ରାନ୍ତ ବୋଲି ଜଣାପଡ଼ିଛି। କର୍ତ୍ତୃପକ୍ଷ ଆଜି ଏପରି ହୋଇଥିବା ନିଶ୍ଚିତ କରିଛନ୍ତି।

ସାଉଦି ଆରବ ଯାଇଥିବା ତାଙ୍କ ଭଉଣୀ ସହ ବ୍ୟକ୍ତି ଜଣକ ସଂସ୍ପର୍ଶରେ ଆସିଥିଲେ। ଏହି ବ୍ୟକ୍ତିଙ୍କ ଭଉଣୀ ମଧ୍ୟ କରୋନା ପଜିଟିଭ୍‌ ବୋଲି ଚିହ୍ନଟ କରାଯାଇଛି।

ପ୍ରଶାସନ ପକ୍ଷରୁ କୁହାଯାଇଛି, “ମହିଳା ଜଣକ ଗତ ୧୧ ତାରିଖରେ ସାଉଦିରୁ ଫେରିଥିଲେ। ଏହାର ଦୁଇ ଦିନ ପରେ ଭାଇଙ୍କୁ ଭେଟିଥିଲେ। ଏହା ପରେ ବ୍ୟକ୍ତି ଜଣକ ଧାରଣାସ୍ଥଳକୁ ଯାଇଥିବା କୁହାଯାଉଛି।” ଉତ୍ତର-ପଶ୍ଚିମ ଦିଲ୍ଲୀରେ ଏହି ବ୍ୟକ୍ତି ସିଏଏ ବିରୋଧୀ ଆନ୍ଦୋଳନ ଆୟୋଜନ କରିଥିବା କୁହାଯାଉଛି।

ଗୁରୁବାର ସକାଳେ ଆକ୍ରାନ୍ତଙ୍କୁ ରାମ ମନୋହର ଲୋହିଆ ହସ୍ପିଟାଲ ନିଆଯାଇଥିଲା। ଏବେ ସେ ଏଲ୍‌ଏନ୍‌ଜେପି ହସ୍ପିଟାଲରେ ଚିକିତ୍ସିତ ହେଉଛନ୍ତି। ତାଙ୍କ ଭଉଣୀ ସଫଦରଗଞ୍ଜ ହସ୍ପିଟାଲରେ ଚିକିତ୍ସିତ ହେଉଛନ୍ତି।