ସତ୍ୟଶିଖା( ଭୁବନେଶ୍ୱର )୦୫.୦୪.୨୦୨୨ : ରାଜ୍ୟର ୩ ଟି ସ୍ଥାନରେ ପାରଦ ୪୨ ଡିଗ୍ରୀ ସେଲସିୟସକୁ ବୃଦ୍ଧି ପାଇଛି । ଓଡିଶାର ତିନି ସହରରେ ତାପମାତ୍ରା ୪୨ ଡିଗ୍ରୀ ଉପରେ ରହିଛି । ଭାରତ ପାଣିପାଗ କେନ୍ଦ୍ରର ଆଞ୍ଚଳିକ କେନ୍ଦ୍ର ଦେଇଥିବା ସୂଚନା ଅନୁଯାୟୀ ବାଲାଙ୍ଗୀର ୪୨.୬ ଡିଗ୍ରୀ ସେଲସିୟସ ସହିତ ରାଜ୍ୟର ସବୁଠାରୁ ଉତ୍ତପ୍ତ ସ୍ଥାନ ଥିଲା।
ଏହା ପରେ ଟିଟିଲାଗଡ଼ରେ ୪୨.୬ ଏବଂ ବୌଦ୍ଧରେ ୪୨ ଡିଗ୍ରୀ ସେଲସିୟସରେ ରେକର୍ଡ କରାଯାଇଥିଲା । ଏହା ବ୍ୟତୀତ ପ୍ରାୟ ପାଞ୍ଚଟି ସ୍ଥାନ ୪୦ ଡିଗ୍ରୀ ସେଲସିୟସରୁ ଅଧିକ ତାପମାତ୍ରା ଅନୁଭୁତ ହୋଇଛି । ସେଗୁଡ଼ିକ ହେଉଛି ଝାରସୁଗୁଡା (୪୦.୮), ସମ୍ବଲପୁର (୪୦.୧), ସୁନ୍ଦରଗଡ (୪୦.୫), ଭବାନୀପାଟଣା (୪୦.୬) ଏବଂ ସୋନେପୁର (୪୦.୬) । ସେହିଭଳି ରାଜଧାନୀ ଭୁବନେଶ୍ୱରର ବାସିନ୍ଦାମାନେ ୩୪.୪ ଡିଗ୍ରୀ ସେଲସିୟସ ହୋଇଥିବାବେଳେ କଟକର ଲୋକମାନେ ୩୪.୨ ଡିଗ୍ରୀ ସେଲସିୟସ ତାପମାତ୍ରା ଦେଖିଲେ ।
ସେପଟେ ବଙ୍ଗୋପସାଗର ସମେତ ଦକ୍ଷିଣ ଆଣ୍ଡାମାନ୍ ସାଗରରେ ଏହି ଲଘୁଚାପ କ୍ଷେତ୍ର ସୃଷ୍ଟି ହେବାକୁ ଯାଉଛି । ଯାହା ଆସନ୍ତା ୮ ତାରିଖ ବେଳକୁ ଘନୀଭୂତ ହୋଇ ବାତ୍ୟାର ରୂପ ମଧ୍ୟ ନେଇପାରେ ବୋଲି ପାଣିପାଗ କେନ୍ଦ୍ର ପକ୍ଷରୁ ଅନୁମାନ କରାଯାଇଛି ।
ତେବେ ଏପର୍ଯ୍ୟନ୍ତ ଏହା କେତେ ଶକ୍ତିଶାଳୀ ଲଘୁଚାପ କ୍ଷେତ୍ର ସୃଷ୍ଟି କରିବ ଏହାର ପ୍ରଭାବ କେଉଁଠି ପଡିବ ଓ କେଉଁ ଦିଗରେ ଗତି କରିବ ତାକୁ ନେଇ ଆକଳନ କରାଯାଇ ନାହିଁ । ଏପ୍ରିଲ ୬ ତାରିଖ ପରେ ଏହା ସ୍ପଷ୍ଟ ହେବ ବୋଲି ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି ।
