ଇମ୍ଫାଲ: ମଣିପୁରରେ ବିଜେପି ଗାଦିଚ୍ୟୁତ ହେବା ଏକ ପ୍ରକାରର ନିଶ୍ଚିତ ହୋଇଯାଇଛି। ରାଜ୍ୟରେ ବିଜେପି ନେତୃତ୍ୱାଧୀନ ସରକାରର ୯ ଜଣ ବିଧାୟକ ସମର୍ଥନ ପ୍ରତ୍ୟାହାର କରି ନେବାରୁ ଏବେ ଦଳ ସଙ୍କଟରେ ପଡ଼ିଛି। ଏଭଳି ସ୍ଥିତିରେ କଂଗ୍ରେସ ରାଜ୍ୟରେ ସରକାର ଗଠନ ପାଇଁ ଦାବି ଜଣାଇଛି।
ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଓକରାମ ଇବୋବି ସିଂହ ରାଜ୍ୟପାଳ ନଜମା ହେଫତୁଲ୍ଲାଙ୍କୁ ଭେଟି ବିଧାନସଭାର ସ୍ୱତନ୍ତ୍ର ଅଧିବେଶ ଡାକିବାକୁ ଅନୁରୋଧ କରିଛନ୍ତି। ଏହି ଅଧିବେଶନରେ ବୀରେନ ସିଂହ ସରକାରଙ୍କୁ ହଟାଇବା ପାଇଁ କଂଗ୍ରେସ ଅନାସ୍ଥା ପ୍ରସ୍ତାବ ଆଣିବ। ଇବୋବି ରାଜ୍ୟପାଳ ନଜମାଙ୍କୁ ସରକାର ଗଠନ କରିବାକୁ ନିମନ୍ତ୍ର କରିବାକୁ ମଧ୍ୟ କହିଛନ୍ତି।
ଏହି ସମୟରେ ସେ କଂଗ୍ରେସକୁ ଟିଏମସି, ଏନପିପି ଓ ସ୍ୱାଧୀନ ବିଧାୟକମାନେ କରିଥିବା ସମର୍ଥନର ଚିଠି ମଧ୍ୟ ଦେଇଛନ୍ତି। କଂଗ୍ରେସ ଏହି ସବୁ ଦଳଗୁଡ଼ିକ ସହ ମିଶି ସେକ୍ୟୁଲାର ପ୍ରୋଗ୍ରେସିଭ ଫ୍ରଣ୍ଟ(ଏସପିଏଫ) ନାମରେ ନୂଆ ସଂଗଠନ କରିଛି।
ଅନ୍ୟପକ୍ଷରେ କଂଗ୍ରସର ଆଉ ୧୨ ବିଧାୟକ ମଣିପୁର ବିଧାନସଭା ସଚିବଙ୍କୁ ଚିଠି ଲେଖି ବର୍ତ୍ତମାନର ବାଚସ୍ପତି ୟୁମନାମ ଖେମଚାନ୍ଦଙ୍କୁ ନିଜ ପଦରୁ ହଟାଇବାକୁ ନିବେଦନ କରିଛନ୍ତି। ପୂର୍ବରୁ ଖେମଚାନ୍ଦ ୭ କଂଗ୍ରେସ ବିଧାୟକ ଅଯୋଗ୍ୟ ଘୋଷିତ ହେବେ କି ନାହିଁ, ତା’ର ବିଚାର ଜୁନ୍ ୨୨ରେ କରାଯିବ ବୋଲି କହିଥିଲେ।
ଆହୁରି ପଢ଼ନ୍ତୁ
ତେବେ ପୁଣିଥରେ ଏହାକୁ ବଦଳାଇ ବିଜେପିକୁ ସହଯୋଗ କରୁଥିବା ସେମାନେ କହିଛନ୍ତି। ଏହି ୭ ବିଧାୟକ କଂଗ୍ରେସର ସଦସ୍ୟ ହୋଇଥିଲେ ହେଁ ବିଜେପିକୁ ସମର୍ଥନ କରିଥିଲେ। ଏମାନଙ୍କୁ ଅଯୋଗ୍ୟ ଘୋଷଣା କରିବାକୁ ଦାବି ହୋଇଛି।
ମଣିପୁର ହାଇକୋର୍ଟ ସମସ୍ତ ୭ ବିଧାୟକଙ୍କୁ ଗୃହରେ ପ୍ରବେଶ ନ କରିବା ପାଇଁ କହିଛନ୍ତି। ବାଚସ୍ପତି ଏମାନଙ୍କ ଅଯୋଗ୍ୟ ଘୋଷଣା ପ୍ରସଙ୍ଗରେ ନିଷ୍ପତ୍ତି ନ ନେବା ଯାଏ, ଏମାନା ଗୃହରେ ପ୍ରବେଶ କରିପାରିବେ ନାହିଁ ବୋଲି କୋର୍ଟ କହିଛନ୍ତି।
ବିଜେପିର ୩ ବିଧାୟକ ଇସ୍ତଫା ଦେବା ସହ ଏନପିପିର ୬ ବିଧାୟକ ବୀରେନ ସିଂହ ସରକାରଙ୍କ ଠାରୁ ସମର୍ଥନ ପ୍ରତ୍ୟାହାର କରି ନେବାରୁ ସରକାର ସଙ୍କଟମୟ ସ୍ଥିତିକୁ ଚାଲି ଯାଇଛି।
୨୦୧୭ରେ ମଣିପୁରରେ ବିଧାନସଭା ନିର୍ବାଚନ ହୋଇଥିଲା। ୬୦ଟି ଆସନରୁ କଂଗ୍ରେସ ୨୮ଟି ଜିତିଥିଲା। ବିଜେପି ୨୧ଟି ଆସନରେ ବିଜୟୀ ହୋଇଥିଲା। ହେଲେ ଏନପିପି ଏବଂ ଏନପିଏଫର ୪ ବିଧାୟକ, ଏଲଜେପିର ଜଣେ, ଜଣେ ସ୍ୱାଧୀନ ଓ ଜଣେ ଟିଏମସି ବିଧାୟକ ବିଜେପିକୁ ସମର୍ଥନ କରିବାରୁ ଦଳ ସରକାର ଗଠନ କରିଥିଲା।
ଏବେ ଦଳୀୟ ବିଧାୟକଙ୍କ ଇସ୍ତଫା ଏବଂ ସହଯୋଗୀ ଦଳର ସମର୍ଥନ ପ୍ରତ୍ୟାହାର ଯୋଗୁ ବିଜେପି ପାଖରେ ମୋଟ୍ ୨୨ଜଣ ବିଧାୟକ ରହିଛନ୍ତି।
