ଭୋପାଳ: ସ୍କୁଲର ଶୌଚାଳୟରେ ଯୁବକଙ୍କ ଏକାନ୍ତବାସ। ଶୌଚାଳୟରେ ରହିବା ସହିତ ଖାଉଥିବାର ଫଟୋ ଏବେ ସୋଶାଲ ମିଡିଆରେ ଭାଇରଲ ହୋଇଛି। ମଧ୍ୟପ୍ରଦେଶ ଗୁନା ଜିଲ୍ଲାର ଦେବିପୁରା ଗାଁରେ ଥିବା ସରକାରୀ ସ୍କୁଲ (ଏକାନ୍ତବାସ କେନ୍ଦ୍ର)ରେ ଏଭଳି ଦେଖିବାକୁ ମିଳିଛି। ଆଜି ଜିଲ୍ଲା ପ୍ରଶାସନର ଟିମ୍ ଏକାନ୍ତବାସର ଏଭଳି ବିଚିତ୍ର ଚିତ୍ର ଦେଖିବା ପରେ ଅସନ୍ତୋଷ ପ୍ରକାଶ କରିଛି। ଶନିବାର ରାତିରେ ରାଜଗଡ ଜିଲ୍ଲାରୁ ଏହି ଯୁବକ ତା’ଙ୍କର ପରିବାର (ସ୍ତ୍ରୀ ଓ ଦୁଇ ଛୁଆ) ଲୋକଙ୍କୁ ନେଇ ଚାଲି ଆସିଥିଲେ। ଏହାପରେ ତାଙ୍କୁ ଗୁନାର ଦେବିପୁରା ଗାଁରେ ଏକାନ୍ତବାସରେ ରହିବାକୁ କୁହାଯାଇଥିଲା।
ଏହାକୁ ନେଇ ରାଜନୀତି ମଧ୍ୟ ଆରମ୍ଭ ହୋଇଛି। ରାଜ୍ୟରେ ବିରୋଧୀ ଦଳ କଂଗ୍ରେସ ତା’ର ପୂର୍ବତନ ନେତା ତଥା ବର୍ତ୍ତାମାନର ବିଜେପି ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କୁ ଏ ନେଇ ଟାର୍ଗେଟ କରିଛି। ସିନ୍ଧିଆ କଂଗ୍ରେସରେ ଥିବାବେଳେ ଲୋକଙ୍କ ସମସ୍ୟା ନେଇ ପ୍ରତି କଥାରେ ରାସ୍ତାକୁ ଚାଲିଆସିବାକୁ ଧମକ ଦେଉଥିଲେ। ଏବେ ସେ କେଉଁଠି ବୋଲି କଂଗ୍ରେସ ପ୍ରଶ୍ନ କରିଛି।
ଆହୁରି ପଢ଼ନ୍ତୁ
ରବିବାର ସକାଳେ ଜିଲ୍ଲା ସ୍ୱାସ୍ଥ୍ୟ ବିଭାଗର ଏକ ଟିମ୍ ଦେବିପୁରା ସରକାରୀ ସ୍କୁଲକୁ ଯାଇଥିଲା ଏକାନ୍ତବାସରେ ଥିବା ପରିବାର ଲୋକଙ୍କ ସ୍ୱାସ୍ଥ୍ୟାବସ୍ଥା ପରଖିବାକୁ। ଏହି ସମୟରେ ଯୁବକ ଜଣଙ୍କ ଶୌଚାଳରେ ରହି ଖାଉଥିବାର ଚିତ୍ର ଦେଖିବାକୁ ପାଇଥିଲେ। ହେଲେ ଯୁବକଙ୍କ ସ୍ତ୍ରୀ ଓ ଦୁଇ ଛୁଆ ସ୍କୁଲ ଘରେ ରହିଥିବା ଦେଖିବାକୁ ମିଳିଥିଲା। ତେବେ ଯୁବକ ଶୌଚାଳୟରେ ରହିଥିବାର ଫଟୋ ଉଠାଇ ସ୍ୱାସ୍ଥ୍ୟ ବିଭାଗର ଟିମ୍ ଜିଲ୍ଲା ପ୍ରଶାସନକୁ ପଠାଇଥିଲା। ଏହାପରେ ଫଟୋ ଭାଇରାଲ ହୋଇଥିଲା।
ତେବେ ଜିଲ୍ଲା ପ୍ରଶାସନ ଏ ନେଇ ପ୍ରତିକ୍ରିୟା ରଖିଛି। ମଦ ପିଇଥିବାରୁ ଯୁବକ ଜଣଙ୍କ ସ୍ତ୍ରୀ ସହିତ ଝଗଡ଼ା କରିଥିଲେ। ଏହାପରେ ବଚସା ହେବାରୁ ଯୁବକ ଜଣଙ୍କ ଶୌଚାଳୟରେ ଯାଇ ଏକୁଟିଆ ରହିଥିଲେ। ହେଲେ ଯୁବକଙ୍କ ସ୍ତ୍ରୀ ଓ ଦୁଇ ଛୁଆ ଏକାନ୍ତବାସ ଗୃହରେ ଠିକ୍ ଭାବରେ ରହିଛନ୍ତି ବୋଲି ପ୍ରଶାସନ କହିଛି।
