ଶେଷରେ କରୋନା ଉପରେ ଆଲୋଚନା କରିବ ଜାତିସଂଘର ସୁରକ୍ଷା ପରିଷଦ

ମିଳିତ ଜାତିସଂଘ: ବିଶ୍ୱରେ ମହାମାରୀର ରୂପ ନେଇଥିବା କରୋନା ଭାଇରସ ଉପରେ ଆଲୋଚନା କରିବା ପାଇଁ ଶେଷରେ ଜାତିସଂଘର ସୁରକ୍ଷା ପରିଷଦ ରାଜି ହୋଇଛି। ଆସନ୍ତା ଗୁରୁବାର ଏହା ଉପରେ ଆଲୋଚନା ହେବ। ବିଶ୍ୱରେ ୭୪ ହଜାରରୁ ଅଧିକ ଲୋକଙ୍କ ମୁଣ୍ଡ ନେଇ ସାରିଥିବା କରୋନା ଭାଇରସ ଉପରେ ଜରୁରୀ ବୈଠକ କରିବା ପାଇଁ ଏକାଧିକ ଦେଶ ବାରମ୍ବାର ଦାବି କରି ଆସୁଥିଲେ।

ହେଲେ ଆମେରିକା ଓ ଚାଇନା ମଧ୍ୟରେ ଚାଲିଥିବା ବାକଯୁଦ୍ଧ ଯୋଗୁ ପରିଷଦର ବୈଠକ ବସି ପାରୁ ନଥିଲା। ହେଲେ ଏବେ ବୈଠକ କରିବାକୁ ନିଷ୍ପତ୍ତି ହୋଇଛି। ଏପ୍ରିଲ ମାସ ପାଇଁ ପରିଷଦର ସଭାପତି ଭାବେ କାର୍ଯ୍ୟ କରୁଥିବା ଡୋମିକାନ ରିପ୍ଲବିକ କହିଛି, “ଶେଷରେ ଗୁରୁବାର ପରିଷଦର ବୈଠକ ବସିବାକୁ ନିଷ୍ପତ୍ତି ହୋଇଛି।

ଭିଡିଓ କନଫରେନ୍ସିଂ ଜରିଆରେ କୋଭିଡ୍‌-୧୯ ପ୍ରସଙ୍ଗ ଉପରେ ଆଲୋଚନା ହେବ। ଜାତିସଂଘର ମହାସଚିବ ଆଣ୍ଟୋନିଓ ଗୁଟେରସ ମଧ୍ୟ ଏଥିରେ ଯୋଗଦେବେ।” ତେବେ ବୈଠକ ପରେ ଗଣାମଧ୍ୟମକୁ କୌଣସି ବିବୃତି ଜାରି କରାଯିବ କି ନାହିଁ, ତା’ ଉପରେ ସମସ୍ତଙ୍କ ନଜର ରହିଛି।