ସତ୍ୟଶିଖା (ନୂଆଦିଲ୍ଲୀ )୦୪.୦୩.୨୦୨୧: ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କ ଗାଡି ସଂସଦରୁ ବାହାରିବା ସମୟରେ ଜନତାଙ୍କୁ ଆଉ ଅସୁବିଧା ହେବନାହିଁ। ନୂଆ ସଂସଦରେ ଏଥିପାଇଁ ଏକ ସୁଡ଼ଙ୍ଗ ନିର୍ମାଣ କରାଯାଉଛି ଯାହା ଅଣ୍ଡରଗ୍ରାଉଣ୍ଡ ରାସ୍ତା ଦେଇ ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କ ବାସଭବନ ଯାଏଁ ଯିବ। ଯାହାଫଳରେ ସାଧାରଣ ଜନତାଙ୍କୁ ଭିଭିଆଇପି ମୁଭମେଣ୍ଟ ପାଇଁ ଆଉ କୌଣସି ଅସୁବିଧା ହେବନାହିଁ ଏବଂ ସଂସଦ ବାହାରେ ଟ୍ରାଫିକ ମଧ୍ୟ ସାମାନ୍ୟ ରହିବ। ଏହି ସୁଡ଼ଙ୍ଗ ନିର୍ମାଣର ଉଦ୍ଦେଶ୍ୟ ହେଲା ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କ ଭଳି ହସ୍ତୀଙ୍କ ଗାଡି ଟ୍ରାଫିକ ନିୟମକୁ ବାଧିତ ନ କରି ସଂସଦରେ ଯିବାଆସିବା ସୁନିଶ୍ଚିତ କରିବା।
ସେଣ୍ଟ୍ରାଲ ଭିଷ୍ଟାର ନିର୍ମାଣ ଯୋଜନା ଅନୁଯାୟୀ, ନୂଆ ପ୍ରଧାନମନ୍ତ୍ରୀ ଆବାସ ଓ ପିଏମଓ ସାଉଥ ବ୍ଲକରେ ରହିବ। ନୂଆ ଭିପି ଚାମ୍ବର ନର୍ଥ ବ୍ଲକରେ ରହିବ ଏବଂ ସାଂସଦଙ୍କ ଚାମ୍ବର ଟ୍ରାନ୍ସପୋର୍ଟ ଓ ଶ୍ରମ ଶକ୍ତି ଭବନ ଆଡକୁ ରହିବ। ସୁଡ଼ଙ୍ଗ ସିଙ୍ଗଲ ଲେନ ବିଶିଷ୍ଟ ହେବ। କାରଣ ଏହି ସୁଡ଼ଙ୍ଗ କିଛି ବିଶେଷ ଲୋକ ହିଁ ବ୍ୟବହାର କରିବେ। ଏହା ଛୋଟ ଜାଗା ହୋଇଥିବାରୁ ସଂସଦ ଯାଏଁ ପହଞ୍ଚିବାକୁ ଗଲ୍ଫ କୋର୍ଟ ବ୍ୟବହାର କରାଯାଇପାରେ ବୋଲି କୁହାଯାଉଛି। ରାଷ୍ଟ୍ରପତି ଭବନରୁ ଏହିଭଳି ଲିଙ୍କର ଆବଶ୍ୟକତା ନଥିଲା କାରଣ ଏହା ଅଳ୍ପ ଦୂରରେ ଅଛି ଏବଂ ସଂସଦକୁ ରାଷ୍ଟ୍ରପତି କମ ଆସିଥାନ୍ତି ଏବଂ ପୂର୍ବରୁ ନିର୍ଦ୍ଧାରିତ ହୋଇଥାଏ।
ସୂତ୍ର ଅନୁଯାୟୀ, ସେଣ୍ଟ୍ରାଲ ଭିଷ୍ଟା ଡେଭେଲମେଣ୍ଟର ପ୍ରାଥମିକ ଉଦ୍ଦେଶ୍ୟ ସଂସଦ ପରିସର ଉପରେ ଓ ଆଖପାଖ ଅଞ୍ଚଳରେ ସାଧାରଣ ଜନତା ସହଜରେ ପହଞ୍ଚିପାରିବେ। ବର୍ତ୍ତମାନ ସେଣ୍ଟ୍ରାଲ ଭିଷ୍ଟା ଓ ଲୁଟିୟାନ୍ସ ବଙ୍ଗଳା ଜୋନର ଅନେକ ସ୍ଥାନରେ ସୁରକ୍ଷା କାରଣରୁ ଏବଂ ଭିଆଇପିଙ୍କ ଯିବାଆସିବା ଯୋଗୁଁ କଡା ସୁରକ୍ଷା ବ୍ୟବସ୍ଥା ଥାଏ। ଯାହାଫଳରେ ଜନତାଙ୍କ ମୁଭମେଣ୍ଟ ଉପରେ ପ୍ରଭାବ ପଡିଥାଏ। ଆଗାମୀ ଦିନରେ ଭିଆଇପି ରାସ୍ତା କେବଳ ଜାନୁଆରୀ ୨୬ ତାରିଖ ପରେଡ ଭଳି କାର୍ଯ୍ୟକ୍ରମ ପାଇଁ ବ୍ୟବହାର କରାଯାଇପାରେ।
