ସତ୍ୟଶିଖା ୧୯/୦୧/୨୦୨୧ : କୋରାପୁଟ ଜିଲ୍ଲା ମାଛକୁଣ୍ଡ ଅଞ୍ଚଳର ଜୟନ୍ତୀଗିରି ଜଙ୍ଗଲରେ ବିପୁଳ ପରିମାଣର ଗଞ୍ଜେଇ ଚାଷ ନଷ୍ଟ କରିଛି ପୋଲିସ । ଲମତାପୁଟ, ନନ୍ଦପୁର କୋରାପୁଟ ପୋଲିସ, ଡିଭିଏଫ ଏବଂ ଅବକାରୀ ବିଭାଗ ସ୍ଥାନୀୟ ମାଜିଷ୍ଟ୍ରେଟଙ୍କ ଉପସ୍ଥିତିରେ ପ୍ରାୟ ୨୦ଏକର ଗଞ୍ଜେଇ ଚାଷ ନଷ୍ଟ କରାଯାଇ ସାରିଲାଣି । ଏହାର ମୂଲ୍ୟ ୨୦ କୋଟିରୁ ଉର୍ଦ୍ଧ୍ବ ହେବ ବୋଲି ପୋଲିସ ସୂଚନା ଦେଇଛି । ଚଳିତ ବର୍ଷ ଅପରେସନ ଗ୍ରୀନ୍ କ୍ଲିନ୍ ପାଇଁ ଏକ ସ୍ଵତନ୍ତ୍ର ବ୍ଲୁପ୍ରିଣ୍ଟ ପ୍ରସ୍ତୁତ କରିଛି ପୋଲିସ । ଚଳିତ ବର୍ଷ ୫୧୫ ଏକର ଗଞ୍ଜେଇ ଚାଷ ନଷ୍ଟ କରିସାରିଲାଣି ପୋଲିସ ।
ଯେଉଁ ଅଞ୍ଚଳରେ ଗଞ୍ଜେଇ ଚାଷ ନଷ୍ଟ କରାଯାଉଛି ସେହି ଅଞ୍ଚଳରେ ମାଓ ପ୍ରଭାବିତ ଅଞ୍ଚଳ ହୋଇଥିବାରୁ ପୋଲିସ ଡ୍ରୋନ୍ ସାହାଯ୍ୟରେ ନଜର ରଖିବା ସହ ବମ୍ ସ୍କ୍ବାଡ୍ ଏବଂ ୪ ପ୍ଲାଟୁନ ପୋଲିସ ମୁତୟନ କରି କଡା ସୁରକ୍ଷାରେ ଗଞ୍ଜେଇ ଚାଷ ନଷ୍ଟ କରୁଛି । ପୋଲିସ ପାଇଁ ଏହା ବଡ ଚ୍ୟାଲେଞ୍ଚ ସୃଷ୍ଟି କରିଛି । କାରଣ ଏବେବି ସେହି ଅଞ୍ଚଳରେ ମାଓବାଦୀଙ୍କ ଦବଦବା ରହିଛି । ପୋଲିସ କଡା ସୁରକ୍ଷା ନେବା ସହ ଏସଓପି ପାଳନ କରି ଅପରେସନ ଗ୍ରୀନ୍ କ୍ଲିନ୍ ଜାରି ରଖିଛି । ମଙ୍ଗଳବାର ସନ୍ଧ୍ୟା ସୁଦ୍ଧା ୧୦୦ ଏକରରୁ ଅଧିକ ଏକର ଗଞ୍ଜେଇ ଚାଷ ନଷ୍ଟ କରିବାର ଲକ୍ଷ୍ୟ ରଖିଛି ପୋଲିସ ।
