ସତ୍ୟଶିଖା(ବଲାଙ୍ଗୀର )୨୩.୦୯ .୨୦୨୧: ସ୍କୁଲ ଭିତରେ ପଶି ଶିକ୍ଷୟିତ୍ରୀଙ୍କ ତଣ୍ଟି କାଟିଦେଇଛନ୍ତି ତାଙ୍କ ଶିକ୍ଷକ ସ୍ୱାମୀ । ଏଭଳି ଅଭାବନୀୟ ଘଟଣା ଘଟିଛି ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକ ଦୁର୍ଗାପାଲି ଉଚ୍ଚ ବିଦ୍ୟାଳୟରେ । ଗୁରୁତର ଶିକ୍ଷୟିତ୍ରୀ ସଞ୍ଜୁରାଣୀ ଦେବ (୩୦)ଙ୍କୁ ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ନୃଶଂସ ସ୍ୱାମୀ ପ୍ରଦୀପ ପଣ୍ଡାକୁ ସ୍କୁଲର ଅନ୍ୟ ଶିକ୍ଷକ ଓ ଗ୍ରାମବାସୀ କାବୁ କରି ପୁଇଁତଳା ପୁଲିସର ଜିମା ଦେଇଛନ୍ତି । ଆହତ ଶିକ୍ଷୟିତ୍ରୀଙ୍କ ଘର ବରଗଡ଼ ଜିଲ୍ଲା ବରଗାଁରେ । ସେ ୧୪ ମାସ ତଳେ ଆଗଲପୁର ବନ୍ଧବାହାଲିର ପ୍ରଦୀପଙ୍କୁ ବିବାହ କରିଥିଲେ । ବିବାହର ମାତ୍ର ପାଞ୍ଚ ଦିନ ପରେ ସ୍ୱାମୀ ଓ ଶାଶୂଘର ଲୋକେ ଯୌତୁକ ପାଇଁ ନିର୍ଯାତନା ଦେବା ଆରମ୍ଭ କରିଥିଲେ । ନିର୍ଯାତନା ଧୀରେ ଧୀରେ ଅସହ୍ୟ ହେବାରୁ ସେ ଶାଶୁ ଘରୁ ଚାଲିଆସିବା ସହ ଡିଭୋର୍ସ ଫାଇଲ କରିଥିଲେ । ପୁଇଁତଳା ଦୁର୍ଗାପାଲିରେ ରହି ସଂସ୍କୃତ ଶିକ୍ଷୟିତ୍ରୀ ଭାବେ ଦୁର୍ଗାପାଲି ଉଚ୍ଚ ବିଦ୍ୟାଳୟରେ କାର୍ଯ୍ୟ କରୁଥିଲେ । ସ୍ୱାମୀ ପ୍ରଦୀପ ମଧ୍ୟ ଟିଟିଲାଗଡ଼ର ଏକ ସ୍କୁଲରେ ସଂସ୍କୃତ ଶିକ୍ଷକ ଅଛନ୍ତି । ହଠାତ ପ୍ରଦୀପ ଦୁର୍ଗାପାଲି ସ୍କୁଲରେ ପହଞ୍ଚି ସଞ୍ଜୁରାଣୀଙ୍କ ସହ କଥା ହେବାକୁ ଡାକିଥିଲେ । ହେଲେ ସେ ମନା କରିଦେବାରୁ କମନ ରୁମକୁ ପଶିଆସିଥିଲେ । ସେଠାରେ ଥିବା ସମସ୍ତ ଶିକ୍ଷକଙ୍କୁ ଛୁରୀ ଦେଖାଇ ଭୟଭୀତ କରିଥିଲେ । ପରେ ସଞ୍ଜୁରାଣୀଙ୍କ ଚୁଟିକୁ ଧରି ଘୋଷାଡି ଆଣି ଧରିଥିବା ଛୁରୀରେ ତାଙ୍କ ଗଳା କାଟି ଦେଇଥିଲେ । କୌଶଳ କ୍ରମେ ଅନ୍ୟ ଶିକ୍ଷକ ଏବଂ ସ୍ମାଟକାର୍ଡ ବଣ୍ଟନ କାର୍ଯ୍ୟକ୍ରମ ପାଇଁ ଉପସ୍ଥିତ ଥିବା କିଛି ଗ୍ରାମବାସୀ ତାଙ୍କୁ କାବୁ କରି ଗଛରେ ବାନ୍ଧିଦେବା ସହ ପୁଲିସ ଜିମା ଦେଇଥିଲେ ।
