ରାଜ୍ୟସଭା ନିର୍ବାଚନ ପୂର୍ବରୁ ଘୋଡ଼ା ବେପାରକୁ ନେଇ ତମ୍ଭିତୋଫାନ

ଜୟପୁର: ଆସନ୍ତା ୧୯ ତାରିଖରେ ରଜ୍ୟସଭା ନିର୍ବାଚନ ହେବ। ରାଜସ୍ଥାନରେ କଂଗ୍ରେସ କ୍ଷମତାରେ ଥିଲେ ହେଁ ବିଜେପି ଘୋଡ଼ା ବେପାର ଜରିଆରେ ବିଧାୟକଙ୍କୁ ନେଇ କିଛି ହେରଫେର କରିବାକୁ ଚେଷ୍ଟା କରୁଥିବା ଅଭିଯୋଗ ହୋଇଛି। ଏଥିପାଇଁ କଂଗ୍ରେସ ପକ୍ଷରୁ ଦଳୀୟ ବିଧାୟକଙ୍କୁ ରିଜର୍ଟରେଏକାଠି କରି ରଖାଯାଇଛି। ବିଜେପି ସେମାନଙ୍କୁ ୨୫ କୋଟି ଲେଖାଏ ଟଙ୍କା ଦେଇ ନିଜ ସପକ୍ଷଙ୍କୁ ଆଣିବାକୁ ଚାହୁଁଥିବା ଖୋଦ ମୁଖ୍ୟମନ୍ତ୍ରୀ ଅଶୋକ ଗେହଲଟ କହିଥିଲେ।

ଆଜି ପୁଣିଥରେ ଗେହଲଟ ବିଜେପି ବିରୋଧରେ ଘୋଡ଼ା ବେପାର ଅଭିଯୋଗ ଆଣିଛନ୍ତି। ଆଜି ସେ କହିଛନ୍ତି, ଦୁଇ ମାସ ତଳୁ ଏହି ରାଜ୍ୟସଭା ନିର୍ବାଚନ ଶେଷ ହେବାର ଥିଲା। କିନ୍ତୁ କୌଣସି କାରଣ ନଥାଏ ଏହାକୁ ସ୍ଥଗିତ ରଖାଯାଇଥିଲା। ବିଜେପିକୁ ଘୋଡ଼ା ବେପାର କରିବାକୁ ସୁଯୋଗ ଦେବା ପାଇଁ ରାଜ୍ୟସଭା ନିର୍ବାଚନକୁ ବିଳମ୍ବିତ କରାଯାଇଥିଲା। ଏବେ ବିଜେପି ଟଙ୍କା ବଳରେ ବିଧାୟକଙ୍କୁ କିଣିବାକୁ ଚେଷ୍ଟା କରୁଛି।

ତେବେ ବିଜେପି ଗୋଟିଏ କଥା ମନେ ରଖିବା ଦରକାର ଯେ ଆମେ ସମସ୍ତେ ଏକାଠି ଅଛୁ। ରାଜ୍ୟସଭା ନିର୍ବାଚନ ଆମ ବିଧାୟକଙ୍କ ଭୋଟ କାହାକୁ ବି ଯିବ ନାହିଁ। ଏପରି କି ସିପିଏମର ଦୁଇ ବିଧାୟକ ବି ଆମ ସହ ରହିଛନ୍ତି ବୋଲି ସେ ଦମ୍ଭୋକ୍ତି କରିଛନ୍ତି।

ଅଶୋକ ଗେହଲଟଙ୍କ ସହ ଉପ ମୁଖ୍ୟମନ୍ତ୍ରୀ ସଚିନ ପାଇଲଟ ମଧ୍ୟ ଉପସ୍ଥିତ ରହିଥିଲେ। ସେ କହିଛନ୍ତି, “ଆମ ପ୍ରାର୍ଥୀ ହିଁ ଜିତିବେ। ଏଥିରେ କୌଣସି ସନ୍ଦେହ ନାହିଁ। ଆମ ବିଧାୟକଙ୍କ ଠାରୁ ଆରମ୍ଭ କରି ଆମକୁ ସମର୍ଥନ କରୁଥିବା ଦଳର ବିଧାୟକ ଓ ସ୍ୱାଧୀନ ବିଧାୟକମାନେ ଆମ ସହ ରହିଛନ୍ତି। ସଂଖ୍ୟା ଗରିଷ୍ଠତା ଠାରୁ ଆମ ପାଖରେ ଅଧିକ ବିଧାୟକଙ୍କ ସମର୍ଥନ ରହିଛି। ଆମର ରାଜ୍ୟସଭା ପ୍ରାର୍ଥୀ ନୀରଜ ଡାଙ୍ଗି ଓ କେସି ଭେନୁଗୋପାଲ ନିଶ୍ଚିତ ଜିତିବେ।”