ଭୁବନେଶ୍ୱର (ସତ୍ୟଶିଖା): ବଙ୍ଗୋପ ସାଗର ମଧ୍ୟରେ ଆଜି ଦିନ ସାଢ଼େ ୧୧ ଟାରେ ’ଅମ୍ଫାନ’ ସୁପର ସାଇକ୍ଲୋନ ବା ମହାବାତ୍ୟାରେ ପରିଣତ ହୋଇସାରିଛି। ଏହା ଫଳରେ ପବନର ବେଗ ଘଣ୍ଟା ପ୍ରତି ସର୍ବାଧିକ ୨୬୫ କିଲୋ ମିଟର ଯାଏ ହେବ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ କୁହାଯାଇଛି। ତେବେ ଯଦିଓ ‘ଅମ୍ପାନ’ ମହାବାତ୍ୟାରେ ପରିଣତ ହୋଇଛି, କିନ୍ତୁ ଆସନ୍ତାକାଲି ସ୍ଥଳ ଭାଗକୁ ଗତି କରିବା ବେଳେ ବଙ୍ଗୋପ ସାଗରର ଉତ୍ତର ଭାଗରେ ପହଞ୍ଚିବା ସମୟରେ ପବନର ବେଗ କମିଯିବ।
୨୦ ତାରିଖରେ ଅମ୍ପନ ପଶ୍ଚିମ ବଙ୍ଗର ଦୀଘା ଓ ବାଂଲାଦେଶର ହାଟିଆ ଦ୍ୱୀପ ଭିତରେ ଭେରି ସିଭିୟର ସାଇକ୍ଲୋନିକ୍ ଷ୍ଟର୍ମ ଭାବେ ସ୍ଥଳଭାଗ ଛୁଇଁବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। କିନ୍ତୁ ନିର୍ଦ୍ଦିଷ୍ଟ ଭାବେ କେଉଁ ସ୍ଥାନରେ ଲାଣ୍ଡଫଲ୍ ହେବ, ତାହା ସ୍ଫଷ୍ଟ ହୋଇନି। ଅନ୍ୟପକ୍ଷରେ ଓଡ଼ିଶାରେ ଆଜି ସଂଧ୍ୟାରୁ ବର୍ଷା, ପବନ ଆରମ୍ଭ ହୋଇ ୨୦ ତାରିଖ ଅପରାହ୍ନ ଯାଏଁ ଚାଲିବ।
ଆହୁରି ପଢ଼ନ୍ତୁ
‘ଅମ୍ଫାନ’ ପ୍ରଭାବରେ କଟକ, ପୁରୀ ଓ ଖୋର୍ଦ୍ଧା ଜିଲ୍ଲାରେ ବି ପ୍ରବଳ ବର୍ଷା ହେବ। ସ୍ୱତନ୍ତ୍ର ରିଲିଫ୍ କମିଶନର (ଏସ୍ଆର୍ସି) ପ୍ରଦୀପ ଜେନା ଆଜି ଏହି ସୂଚନା ଦେଇଛନ୍ତି।
ଶ୍ରୀ ଜେନା କହିଛନ୍ତି, ଏହା ପ୍ରଭାବରେ ଆଜି ସଂଧ୍ୟାରେ ଗଞ୍ଜାମ, ଗଜପତି, ପୁରୀ, କେନ୍ଦ୍ରାପଡ଼ାରେ ବର୍ଷା ହେବ। ୧୯ ତାରିଖ ସକାଳୁ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ। ଉତ୍ତର ଓଡ଼ିଶାର ୫ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହେବ। କଟକ, ପୁରୀ ଓ ଖୋର୍ଦ୍ଧା ଜିଲ୍ଲାରେ ବି ପ୍ରବଳ ବର୍ଷା ହେବ।
ଏସ୍ଆର୍ସି କହିଛନ୍ତି, ତଳି ଅଞ୍ଚଳ ଲୋକଙ୍କୁ ଆଜିଠୁ ସ୍ଥାନାନ୍ତର କରାଯିବ। କାଲି ସ୍ଥାନାନ୍ତର ପ୍ରକ୍ରିୟା ଜୋରଦାର ହେବ। ପବନ ବହୁଥିବା ବେଳେ ଘରୁ ବାହାରିବା ନାହିଁ କି ଗାଡ଼ି ଚଳାଇବାନି। ସାଇକେଲ, ୨ ଚକିଆ ଓ ୪ ଚକିଆ ଗାଡ଼ି ଆଦୌ ବାହାର କରନ୍ତୁନି ବୋଲି ସେ କହିଛନ୍ତି।
