ମଦ ଦୋକାନରେ ଅସମ୍ଭାଳ ଭିଡ଼, ଲାଠିଚାର୍ଜ ପରେ ଶଟର ବନ୍ଦ

ନୂଆଦିଲ୍ଲୀ: ମାର୍ଚ୍ଚ ୨୪ରୁ ଦେଶରେ ବନ୍ଦ ଥିବା ମଦ ଦୋକାନ ଗୁଡ଼ିକ ଆଜି ଖୋଲିବାକୁ ଅନୁମତି ପାଇଛନ୍ତି। କିଛି ରାଜ୍ୟ କେନ୍ଦ୍ରର ଗାଇଡଲାଇନ ଅନୁଯାୟୀ ମଦ ଦୋକାନ ଖୋଲିବାକୁ ଅନୁମତି ଦେଇଥିବା ବେଳେ ଆଉ କିଛି ରାଜ୍ୟରେ ପୂର୍ବଭଳି ଶଟର ବନ୍ଦ ରହିଛି।

ତେବେ ଆଜି ଯେଉଁ ସବୁ ସ୍ଥାନରେ ମଦ ଦୋକାନ ଖୋଲିଥିଲା, ସେଠାରେ ଅସମ୍ଭାଳ ଭିଡ଼ ଦେଖିବାକୁ ମିଳିଛି। ବିଶେଷ କରି ଦିଲ୍ଲୀ, କର୍ଣ୍ଣାଟକା ଓ ଛତିଶଗଡ଼ରେ ଲୋକମାନେ ମଦ ପାଇଁ ପ୍ରବଳ ଭିଡ଼ ଜମାଇଥିଲେ। ଲୋକମାନେ ସାମାଜିକ ଦୂରତାକୁ ପାଳନ ନ କରିବାରୁ ପୁଲିସ୍‌ ରେଡ ଜୋନରେ ଥିବା ଦିଲ୍ଲୀରେ ଲାଠିଜାର୍ଜ କରିଥିଲା। ତଥାପି ସ୍ଥିତିରେ ସୁଧାର ନ ଆସିବାରୁ ପୁଲିସ୍‌ ବାଧ୍ୟ ହୋଇ ଦିଲ୍ଲୀର ଏକାଧିକ ସ୍ଥାନରେ ମଦ ଦୋକାନଗୁଡ଼ିକୁ ବନ୍ଦ କରିଦେଇଛି।

ଆଜି ମଦ ଦୋକାନ ଖୋଲିବାର ନିଷ୍ପତ୍ତି ହୋଇଥିବାରୁ ଲୋକମାନେ ସକାଳ ୭.୩୦ରୁ ହିଁ ଲାଇନ ଲଗାଇବା ଆରମ୍ଭ କରିଥିଲେ। ଦୋକାନ ୧୦ଟା ପରେ ଖୋଲିଥିଲା। ହେଲେ ଲୋକମାନେ ଏହାର ଯଥେଷ୍ଟ ପୂର୍ବରୁ ମଦ ପାଇଁ ଧାଡ଼ି କରିଥିଲେ। ଦିଲ୍ଲୀ ଓ କର୍ଣ୍ଣାଟକାରେ ଏଭଳି ସ୍ଥିତି ଉପୁଜିବାରୁ ପୁଲିସ୍‌ ଫୋର୍ସ ମୁତୟନ କରାଯାଇଥିଲା।

ମଦ ଦୋକାନ ଖୋଲିବା ପରେ ଲୋକଙ୍କ ମଧ୍ୟରେ ଠେଲାପେଲା ଆରମ୍ଭ ହୋଇଯାଇଥିଲା। କେହି ବି କରୋନାର ମୂଳ ଅସ୍ତ୍ର ସାମାଜିକ ଦୂରତାକୁ ପାଳନ କରି ନଥିଲେ। ଏହି କାରଣରୁ ପୁଲିସ୍‌କୁ ଲାଠି ଚାର୍ଜ କରିବାକୁ ପଡ଼ିଥିଲା। ଶେଷରେ ଶଟର ବନ୍ଦ ମଧ୍ୟ କରିଦେଇଥିଲା।

କେନ୍ଦ୍ରର ଗାଇଡଲାଇନ ଅନୁଯାୟୀ, ଏକକାଳୀନ ମଦ ଦୋକାନକୁ ୫ ଜଣ ଗ୍ରାହକ ଯାଇପାରିବେ। ପ୍ରତି ଗ୍ରାହକଙ୍କ ମଧ୍ୟରେ ୬ ଫୁଟ ଦୂରତା ରହିବ। ତଥାପି ଏହାକୁ କେହି ବି ପାଳନ କରୁନାହାନ୍ତି।

ଉତ୍ତର ପ୍ରଦେଶରେ ସକାଳ ୧୦ଟାରୁ ୭ଟା ଯାଏ ମଦ ଦୋକାନ ଖୋଲିବାକୁ ଅନୁମତି ମିଳିଛି। ତଥାପି ସକାଳୁ ଲୋକଙ୍କର ପ୍ରବଳ ଭିଡ଼ ଦେଖିବାକୁ ମିଳିଥିଲା।