ଭିଡିଓ କଲରେ ବାପା ଋଷିଙ୍କ ଶେଷକୃତ୍ୟ ଦେଖିଲେ ରିଦ୍ଧିମା

ମୁମ୍ବାଇ: କରୋନା ପାଇଁ ଦେଶରେ ଜାରି ହୋଇଥିବା ଲକଡାଉନ ଯୋଗୁ ବଲିଉଡ ସୁପରଷ୍ଟାର ଋଷି କପୁରଙ୍କ ଅନ୍ତିମ ସଂସ୍କାରରେ ପହଞ୍ଚି ପାରିନାହାନ୍ତି ତାଙ୍କ ଝିଅ ରିଦ୍ଧିମା। ଆଜି ସକାଳେ ଋଷିଙ୍କ ମୃତ୍ୟୁ ଖବର ତାଙ୍କ ପାଖରେ ପହଞ୍ଚିଥିଲା। ବାପାଙ୍କ ଅନ୍ତିମ ଦର୍ଶନ ପାଇଁ ଦିଲ୍ଲୀରେ ଥିବା ରିଦ୍ଧିମା ସବୁ ପ୍ରକାରର ଉଦ୍ୟମ କରିଥିଲେ।

ତାଙ୍କୁ ଦିଲ୍ଲୀ ମୁମ୍ବାଇ ୧୪ଶହ କିମି ରାସ୍ତା ଯିବାକୁ ସରକାର ପାସ ମଧ୍ୟ ଯୋଗାଇ ଦେଇଥିଲେ। ହେଲେ ଏତେ ବାଟ ଗାଡ଼ି ଚଳାଇ ଆସି ଅନ୍ତିମ ସଂସ୍କାରରେ ପହଞ୍ଚିବା ରିଦ୍ଧିମାଙ୍କ ପକ୍ଷରେ ସମ୍ଭବ ହୋଇ ନଥିଲା।

ସେ ପହଞ୍ଚିବାରେ ବିଳମ୍ବ ହେବାରୁ ପୁଅ ରଣବୀର କପୁର ଓ କପୁର ପରିବାରର କିଛି ନିକଟ ସମ୍ପର୍କୀୟଙ୍କ ଉପସ୍ଥିତିରେ ତାଙ୍କର ଶେଷ କୃତ୍ୟ ହୋଇଥିଲା। ରିଦ୍ଧିମା ଶଶ୍ମାନରେ ପହଞ୍ଚି ପାରି ନଥିଲେ ମଧ୍ୟ ବାପାଙ୍କ ଅନ୍ତିମ କାର୍ଯ୍ୟକୁ ସିଧାସଳଖ ଦେଖିପାରିଥିଲା।

 

ଏଥିପାଇଁ ସେ ଭିଡିଓ କଲର ସହାୟତା ନେଇଥିଲେ। ରଣବୀର କପୁରଙ୍କ ଗାର୍ଲଫ୍ରେଣ୍ଡ ତଥା ଅଭିନେତ୍ରୀ ଆଲିଆ ଭଟ୍ଟ ତାଙ୍କୁ ଏଥିରେ ସହାୟତା କରିଥିଲେ। ଅନ୍ତିମ ସଂସ୍କାର ବେଳେ ଆଲିଆ ନିଜ ଫୋନରେ ଭିଡିଓ କଲ କରିଥିଲେ। ଏହା ମାଧ୍ୟମରେ ରିଦ୍ଧିମା ବାପାଙ୍କ ଦର୍ଶନ କରିବା ସହ ଅନ୍ତିମ ସଂସ୍କାର ଦେଖିଥିଲେ।

ଆଲିଆ ଅନ୍ତିମ ସଂସ୍କାର ବେଳେ କାନ୍ଦୁଥିଲେ ହେଁ ନିଜ ଫୋନକୁ ଅନ ରଖିଥିବା ଦେଖିବାକୁ ମିଳିଥିଲା। ତାଙ୍କ ପାଖରେ ଋଷିଙ୍କ ପତ୍ନୀ ନିତୁ ଓ ଭଉଣୀ ରିମା ଜୈନ ମଧ୍ୟ ଦୁଃଖରେ ଭାଙ୍ଗିପଡ଼ି ଛିଡ଼ା ହୋଇଥିବା ଦେଖିବାକୁ ମିଳିଛି।

ରିଦ୍ଧିମା ଆସନ୍ତାକାଲି ସନ୍ଧ୍ୟାରେ ମୁମ୍ବାଇରେ ପହଞ୍ଚିବେ। ବାପାଙ୍କ ମୃତ୍ୟୁ ଖବର ପାଇବା ପରେ ରିଦ୍ଧିମା ନିଜ ଇନଷ୍ଟାଗ୍ରାମରେ ଋଷିଙ୍କ ସହ ଉଠାଇଥିବା ଫଟୋକୁ ପୋଷ୍ଟ କରି ଶ୍ରଦ୍ଧାଞ୍ଜଳି ଜଣାଇଥିଲେ।