ଭାରତୀୟ ଯବାନଙ୍କ ମୃତଦେହକୁ ବିକୃତ କରିଦେଇଥିଲା ଚାଇନା!

ନୂଆଦିଲ୍ଲୀ: ସୋମବାର ଲଦାଖର ଗଲୱାନ ସୀମାରେ ଘଟିଥିବା ରକ୍ତାକ୍ତ ସଂଘର୍ଷ ଘଟଣାରେ ନୂଆ ତଥ୍ୟ ସାମ୍ନାକୁ ଆସିଛି। ଚାଇନା ବେଶ ଭୟଙ୍କର ଓ ଯୋଜନାବଦ୍ଧ ଭାବେ ଭାରତୀୟ ସେନା ଉପରେ ଆକ୍ରମଣ କରିଥିବା ଘଟଣା ସାମ୍ନାକୁ ଆସିଛି। ଏପରି କି ଭାରତୀୟ ସେନାଙ୍କୁ ଆକ୍ରମଣ କରି ସେମାନଙ୍କ ଶରୀରକୁ ଚାଇନାର ଯବାନମାନେ ବିକୃତ କରିଦେଇଥିବା ଜଣାପଡ଼ିଛି। ତେବେ ସେନା କିମ୍ବା ସରକାରଙ୍କ ପକ୍ଷରୁ ଏ ସମ୍ପର୍କରେ କିଛି ବି କୁହାଯାଇ ନାହିଁ।

ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେର ରିପୋର୍ଟ ଅନୁଯାୟୀ, ଭାରତୀୟ ଯବାନଙ୍କୁ ଆକ୍ରମଣ କରିବା ପାଇଁ ଚାଇନା ସେନା ପୂରା ଯୋଜନା କରିଥିଲା। ଗଲୱାନ ଭ୍ୟାଲିର ପିପି ୧୪ ନିକଟ ଭାରତୀୟ ସୀମାରେ ଚାଇନା ପକ୍ଷରୁ ଟେଣ୍ଟ ନିର୍ମାଣ କରାଯାଇଥିଲା। ପୂର୍ବ ବୁଝାମଣା ଅନୁଯାୟୀ, ଚାଇନା ସ୍ଥାନ ଛାଡ଼ିଥାଆନ୍ତା। ହେଲେ ଚାଇନା ଏପରି ନ କରିବାରୁ କମାଣ୍ଡିଂ ଅଫିସର ବି ସନ୍ତୋଷ ବାବୁ ଅଳ୍ପ ସଂଖ୍ୟକ ଯବାନଙ୍କୁ ନେଇ ସେଠାରେ ପହଞ୍ଚିଥିଲେ।

ଚାଇନା ସେନା ଭାରତୀୟ ଯବାନଙ୍କୁ ଦେଖି ଚାଲି ଯାଇଥିଲେ। ତେବେ ଏହାର କିଛି ସମୟ ପରେ ପ୍ରାୟ ପିଏଲଏର ୬୦୦ ଜଣ ଯବାନ କାଠ ଫାଳିଆ, ଲୁହା ରଡ ଓ ବେସ ବଲ ଷ୍ଟିକରେ ଗୁଡ଼ର ଯାଇଥିବା ଲୁହା ତାର ଧରି ସେଠାରେ ପହଞ୍ଚିଥିଲେ। ସେମାନେ ଭାରତୀୟ ଯବାନଙ୍କୁ ପଣବନ୍ଦୀ କରି ମାଡ଼ ମାରିଥିଲେ। ଏହାପରେ ୧୨୦ ଜଣ ଭାରତୀୟ ଯବାନ ସେଠାରେ ପହଞ୍ଚିଥିଲେ। ସେମାନଙ୍କୁ ବି ଚାଇନାର ଯବାନମାନେ ଘେରି ଯାଇ ଆକ୍ରମଣ କରିବା ଆରମ୍ଭ କରିଥିଲେ।

ଚାଇନାର ଅଧିକ ସଂଖ୍ୟକ ସେନା ସେଠାରେ ରହିଥିଲେ। ୧:୫ରେ ଭାରତୀୟ ଯବାନ ଚାଇନା ସେନାକୁ ସମ୍ମୁଖୀନ ହୋଇଥିଲା। ତଥାପି ଭାରତୀୟ ଯବାନ ହାର ମାନି ନଥିଲେ। ସେମାନେ ବି ପ୍ରତି ଆକ୍ରମଣ କରିଥିଲେ। ତେବେ ଚାଇନା ସହ ଧୋକା କରି ବିନା ଅସ୍ତ୍ରଶସ୍ତ୍ରରେ ଶାନ୍ତି ପ୍ରତିଷ୍ଠା ପାଇଁ ଯାଇଥିବା ଭାରତୀୟ ଯବାନଙ୍କୁ ଅତ୍ୟନ୍ତ ବର୍ବର ଭାବେ ଆକ୍ରମଣ କରିଥିଲେ।

କିଛି ଯବାନଙ୍କୁ ନିଜ କବଜାକୁ ନେଇ ସେମାନେ ଦୀର୍ଘ ସମୟ ଧରି ମାଡ଼ ମାରିଥିବା ବେଳେ ଆଉ କିଛି ଯବାନଙ୍କୁ ପାଣିକୁ ଠେଲି ଦେଇଥିଲେ। ଏପରି କି ମାଡ଼ ଖାଇ ଅଚେତ ହୋଇଯାଇଥିବା ଯବାନଙ୍କ ମୃତଦେହକୁ ମଧ୍ୟ ଚାଇନା ସେନା ବିକୃତ କରିଦେଇଥିବା ଜଣାପଡ଼ିଛି। ମାରପିଟ ବେଳେ ଚାଇନା ପକ୍ଷରୁ ଡ୍ରୋନ ଦ୍ୱାରା ଅନ୍ୟ ଭାରତୀୟ ସେନା ଯବାନଙ୍କ ଉପରେ ମଧ୍ୟ ନଜର ରଖାଯାଇଥିଲା।