ବିମାନ ଚଳାଚଳ ମନ୍ତ୍ରଣାଳୟର କର୍ମଚାରୀଙ୍କୁ କରୋନା

ନୂଆଦିଲ୍ଲୀ: ବେସାମରିକ ବିମାନ ଚଳାଚଳ ମନ୍ତ୍ରାଳୟର ଜଣେ କର୍ମଚାରୀ କରୋନା ଭାଇରସରେ ଆକ୍ରାନ୍ତ ହୋଇଛନ୍ତି। ଏହି ଘଟଣା ପରେ ତାଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ସେଲଫ ଆଇସୋଲେସନରେ ରହିବାକୁ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଏଥିସହ ସମ୍ପୂର୍ଣ୍ଣ ମନ୍ତ୍ରଣାଳୟର ଅଫିସକୁ ସାନିଟାଇଜ କରାଯାଇଛି।

ମନ୍ତ୍ରଣାଳୟର କର୍ମଚାରୀ ଜଣଙ୍କ ୧୫ ତାରିଖରେ ଅଫିସ ଆସିଥିଲେ। ତାଙ୍କର ଫ୍ଲୁ ଲକ୍ଷଣ ଦେଖାଯିବାରୁ ତାଙ୍କର କରୋନା ପରୀକ୍ଷା କରାଯାଇଥିଲା। ୨୧ ତାରିଖରେ ସେ କରୋନାରେ ଆକ୍ରାନ୍ତ ହୋଇଥିବା ପରୀକ୍ଷାରୁ ଜଣାପଡ଼ିଛି। କର୍ମଚାରୀ ଜଣଙ୍କ କରୋନାରେ ଆକ୍ରାନ୍ତ ହୋଇଥିବାରୁ ମନ୍ତ୍ରାଳୟର ବି’ ୱିଙ୍ଗକୁ ସଂପୂର୍ଣ୍ଣ ଭାବେ ସିଲ୍‌ କରିଦିଆଯାଇଛି।

ମନ୍ତ୍ରାଳୟର କର୍ମଚାରୀଙ୍କ ସହ ଆମେ ସମସ୍ତେ ଛିଡ଼ା ହୋଇଛୁ ବୋଲି ଟ୍ୱିଟ୍ କରି ସୂଚନା ଦେଇଛନ୍ତି ବେସମାରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂହ ପୁରୀ । ପଜିଟିଭ୍ ଚିହ୍ନଟ ହୋଇଥିବା ସମସ୍ତ କର୍ମଚାରୀଙ୍କ ଶୀଘ୍ର ଆରୋଗ୍ୟ ଲାଭ କରନ୍ତୁ ବୋଲି ସେ ପ୍ରାର୍ଥନା କରିଛନ୍ତି।