ନୂଆଦିଲ୍ଲୀ: ଭାରତ ଓ ଚାଇନା ମଧ୍ୟରେ ସୃଷ୍ଟି ହୋଇଥିବା ସୀମା ବିବାଦକୁ ନେଇ ଆଜି ପୁଣିଥରେ ଉଭୟ ଦେଶ ଆଲୋଚନା କରିଛନ୍ତି। ଉଭୟ ଦେଶର ସେନା ଅଧିକାରୀମାନେ ପରସ୍ପର ସହ ଆଲୋଚନା କରି ଉତ୍ତେଜନା କେମିତି ହ୍ରାସ ପାଇବ, ତା’ ଉପରେ ମାନସମନ୍ଥନ କରିଛନ୍ତି। ଗଲୱାନ, ପିପି ୧୪, ପିପି୧୫ ଓ ୧୭ଏରେ ବିବାଦର ସମାଧାନ କରିବା ଏହି ମେଜର ଜେନେରାଲ ସ୍ତରୀୟ ଆଲୋଚନାର ମୂଳ ଲକ୍ଷ୍ୟ ରହିଥିଲା।
ଆହୁରି ପଢ଼ନ୍ତୁ
ଲଦାଖ ସୀମାରେ ବିବାଦ ସୃଷ୍ଟି ହେବା ଦିନଠାରୁ ୫ମଥର ପାଇଁ ଦୁଇ ଦେଶ ମଧ୍ୟରେ ପ୍ରତିରକ୍ଷା ସ୍ତରୀୟ ଆଲୋଚନା ହୋଇଛି। ପୂର୍ବରୁ ବ୍ରିଗେଡିୟର ଓ କର୍ଣ୍ଣେଲ ସ୍ତରୀୟ ଆଲୋଚନା ଦ୍ୱାରା ଉତ୍ତେଜନା ହ୍ରାସ କରିବାକୁ ଉଦ୍ୟମ ହୋଇଥିଲା। ଆଲୋଚନା ପରେ ସୀମାନ୍ତର ଏକାଧିକ ସ୍ଥାନରୁ ଉଭୟ ଦେଶ ନିଜ ନିଜ ସେନା ମଧ୍ୟ ପ୍ରତ୍ୟାହାର କରିଛନ୍ତି। ତେବେ ପଙ୍ଗୋଙ୍ଗ ଟିଏସଓରେ ବିବାଦ ଥମି ନଥିବାରୁ ଏହାକୁ ନେଇ ଭାରତ ଓ ଚାଇନା ମଧ୍ୟରେ ଘନଘନ ବୈଠକ ବସୁଛି।
ଆଜି ବସିଥିବା ବୈଠକର ନିଷ୍ପତ୍ତି ସମ୍ପର୍କରେ କୌଣସି ସୂଚନା ଏଯାଏ ସାର୍ବଜନୀନ କରାଯାଇନାହିଁ। ତେବେ ଆଲୋଚନା ସକାରାତ୍ମକ ରହିଥିବା ଜଣାପଡ଼ିଛି। ଉଭୟ ଦେଶ ଆଲୋଚନା ଦ୍ୱାରା ବିବାଦର ସମାଧାନ କରିବାକୁ ଚାହୁଁଥିବା ଏକାଧିକଥର ଗଣମାଧ୍ୟମ ଆଗରେ ମତ ରଖିଛନ୍ତି।
