ସତ୍ୟଶିଖା (ନୂଆଦିଲ୍ଲୀ) ୦୬/୦୧/୨୦୨୧ : ଯଦି ଆପଣ ଏଚପିସିଏଲ୍ (HPCL) ର ଏଲପିଜି ସିଲିଣ୍ଡର ବ୍ୟବହାର କରୁଛନ୍ତି ତାହେଲେ ଏହି ଖବର ନିଶ୍ଚୟ ପଢନ୍ତୁ । ଏଲପିଜି ସିଲିଣ୍ଡର୍ ପାଇଁ ପେମେଣ୍ଟକୁ ନେଇ ଏଚପିସିଏଲ ଏକ ଖାସ ସୂଚନା ଦେଇଛି। ସିଲିଣ୍ଡର ଡେଲିଭରୀ ସମୟରେ ଡେଲିଭରୀ ବଏକୁ କୌଣସି ଚାର୍ଜ ଦେବା ଆବଶ୍ୟକ ନାହିଁ । କିଛି ମିଡ଼ିଆ ରିପୋର୍ଟରେ ସୂଚନା ଅଧିକାରରେ କୁହାଯାଇଛି ଯେ କମ୍ପାନୀ ସ୍ପଷ୍ଟ ଭାବେ କହିଛି ଯେ ଡେଲିଭରୀ ବଏଙ୍କୁ ଗ୍ରାହକ କୌଣସି ଡେଲିଭରୀ ଚାର୍ଜ ଦେବା ଦରକାର ନାହିଁ । ଆରଟିଆଇ ଜରିଆରେ ଆବେଦନ କରିବା ପରେ ଏଚପିସିଏଲ ଏ ସମ୍ପର୍କରେ ସୂଚନା ଦେଇଛି ।
ଏଚପିସିଏଲ୍ ନିଜ ଜବାବରେ କହିଛି ଯେ ଗ୍ୟାସ ସିଲିଣ୍ଡର ଗ୍ରାହକଙ୍କ ଦ୍ୱାରମୁହଁ ଯାଏଁ ପହଞ୍ଚାଇବା ଡିଷ୍ଟ୍ରିବ୍ୟୁଟରଙ୍କ ଦାୟିତ୍ତ୍ୱ। କୌଣସି ବିଲଡିଂ କିମ୍ବା ଫ୍ଲାଟର ଯେକୌଣସି ମହଲାରେ ଗ୍ୟାସ ସିଲିଣ୍ଡର ଡେଲିଭରୀ ପାଇଁ କୌଣସି ଚାର୍ଜ ଦେବାକୁ ପଡ଼ିନଥାଏ । ଗ୍ରାହକଙ୍କୁ କେବଳ ବିଲରେ ଦିଆଯାଇଥିବା ଆମାଉଣ୍ଟ ହିଁ ଦେବେ ।
ହାଇଦ୍ରାବାଦର ଜଣେ ଯୁବକ ଆରଟିଆଇ ଜରିଆରେ ଏଚପିସିଏଲକୁ ଏ ସମ୍ବନ୍ଧରେ ପ୍ରଶ୍ନ କରିଥିଲେ । ଜଣେ ଡେଲିଭରୀ ବଏ ତାଙ୍କୁ ଡେଲିଭରୀ ଚାର୍ଜ ଦାବି କରିବାରୁ ସେ ଏହି ପ୍ରଶ୍ନ କରିଥିଲେ । ଏଚପିସିଏଲ କହିଥିଲା ଯେ ଗ୍ରାହକ ଅତିରିକ୍ତ ଚାର୍ଜ ଦେବାକୁ ମନା କରିପାରିବେ । ଡେଲିଭରୀ ପାଇଁ ଅତିରିକ୍ତ ଚାର୍ଜ ଦେବାର କୌଣସି ନିୟମ ନାହିଁ । ବିଲରୁ ଅଧିକ ଟଙ୍କା ଦେବାକୁ କମ୍ପାନୀ ମନା କରିଛି । ଆରଟିଆଇ ପ୍ରଶ୍ନର ଜବାବରେ ଏଚପିସିଏଲ୍ କହିଥିଲା ଯେ ଡେଲିଭରୀ ପାଇଁ ଅତିରିକ୍ତ ଚାର୍ଜ ଦାବି କଲେ ଗ୍ରାହକ ଡେଲିଭରୀ ବଏ କିମ୍ବା ଗ୍ୟାସ ଡିଷ୍ଟ୍ରିବ୍ୟୁଟର ବିରୋଧରେ ମାମଲା ରୁଜ୍ଜୁ କରିପାରିବେ ।
